ಹಾರೋಹಳ್ಳಿ: ಆಧುನಿಕ ಪದ್ಧತಿ ಅನುಸರಿಸಿ ಕೃಷಿಯಲ್ಲಿ ಪಾರಮ್ಯ ಸಾಧಿಸಿದ ರೈತ

ಹಾರೋಹಳ್ಳಿ: ಭೂಮಿ ತಾಯಿ ನಂಬಿ ನಿತ್ಯ ಹೊಲದಲ್ಲಿ ಶ್ರಮವಹಿಸಿ ಕೆಲಸ ಮಾಡುವವರಿಗೆ ಒಂದಿಲ್ಲೊಂದು ರೀತಿ ಲಾಭ ಕಟ್ಟಿಟ್ಟ ಬುತ್ತಿ. ಅದರಂತೆ ಸಮಗ್ರ ಕೃಷಿಯಲ್ಲಿ ತೊಡಗಿರುವ ರೈತರೊಬ್ಬರದ್ದು ಮಾದರಿ ನಡೆ.

. ತಾಲ್ಲೂಕಿನ ಚಿಕ್ಕದೇವರಹಳ್ಳಿ ಮುದ್ದುವೀರಪ್ಪ ಡಿಪ್ಲೊಮಾ ಇನ್ ಸಿವಿಲ್ ಎಂಜಿನಿಯರಿಂಗ್ ಓದಿ ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದರು. ಕೆಲಸ ಬಿಟ್ಟು ಕೃಷಿಯತ್ತ ಮುಖ ಮಾಡಿದ ಅವರು, ಈಗ ಸಮಗ್ರ ಕೃಷಿ ಮಾಡಿ ಸೈ ಎನಿಸಿಕೊಂಡಿದ್ದಾರೆ.

. ಮೂರು ಎಕರೆ ಜಮೀನು ಹೊಂದಿರುವ ಅವರು, ಹಲವು ರೀತಿಯ ವಾಣಿಜ್ಯ ಬೆಳೆಗಳನ್ನು ಬೆಳೆಯುತ್ತಿದ್ದಾರೆ. ಸುತ್ತಮುತ್ತಲಿನ ರೈತರು ಅಚ್ಚರಿಪಡುವ ರೀತಿಯಲ್ಲಿ ಕೃಷಿಯಲ್ಲಿ ಹಲವು ರೀತಿಯ ಪ್ರಯೋಗ ಕೈಗೊಂಡಿದ್ದಾರೆ.

. ಲಾಭದಾಯಕ ವಾಣಿಜ್ಯ ಬೆಳೆಗಳತ್ತ ಮುಖ ಮಾಡಿ ಅದರಲ್ಲಿ ಲಾಭ ಗಳಿಸುತ್ತಿದ್ದಾರೆ. 6 ಗುಂಟೆ ಜಾಗದಲ್ಲಿ 10 ಕ್ವಿಂಟಲ್ ಶುಂಠಿ ಹಾಗೂ 5 ಎಕರೆ ಜಾಗದಲ್ಲಿ 10 ಕ್ವಿಂಟಲ್ ಅರಿಸಿನ ಬೆಳೆದಿದ್ದಾರೆ.

. ಸಮಗ್ರ ಕೃಷಿ: ಸುಮಾರು 70 ತೆಂಗಿನ ಮರ, ಕರಿಬೇವು, ನುಗ್ಗೆ, ಭತ್ತ 25 ಕ್ವಿಂಟಲ್, ರಾಗಿ 10 ಕ್ವಿಂಟಲ್,ಮುಸುಕಿನ ಜೋಳ, ತೊಗರಿ, ಶೇಂಗಾ ಅವರೆ ಸಮಗ್ರ ಕೃಷಿಯಲ್ಲಿ ಲಾಭ ಗಳಿಸಿದ್ದಾರೆ.

. ಸಾವಯವ ಗೊಬ್ಬರ ಬಳಕೆ: ಹೊಂಗೆ, ಬೇವಿನ ಬೀಜ ಸಂಗ್ರಹಿಸಿ ಸಗಣಿ ಗೊಬ್ಬರದೊಂದಿಗೆ ಮಿಶ್ರಣ ಮಾಡಿ ಬಳಸುತ್ತಿದ್ದಾರೆ.

. ಅಧುನಿಕ ಕೃಷಿ ಪದ್ಧತಿ: ಆಧುನಿಕ ಕೃಷಿ ಪದ್ಧತಿ ಅನುಸರಿಸುವ ಮೂಲಕ ಕೃಷಿಯಲ್ಲಿ ಹೊಸತನ ಮೆರೆದಿದ್ದಾರೆ.

. ಭೂಮಿ ಅಗತ್ಯತೆ ಅರಿತು ಪೋಷಕಾಂಶ, ಗೊಬ್ಬರ ನೀಡುತ್ತಾರೆ. ಕಾಲ ಕಾಲಕ್ಕೆ ಪ್ರತಿ ವರ್ಷ ಮಣ್ಣು ಪರೀಕ್ಷೆ ನಡೆಸಿ ಪೋಷಕಾಂಶ ಒದಗಿಸುತ್ತಾರೆ. ಎಲ್ಲವೂ ಸರಿ ಇದ್ದರೆ ಮಾತ್ರ ಉತ್ತಮ ಬೆಳೆ ನಿರೀಕ್ಷೆ ಮಾಡಬಹುದು ಎನ್ನುತ್ತಾರೆ ಮುದ್ದುವೀರಪ್ಪ.