ಸೊರಬ: ಉಪ್ಪಿನಕಾಯಿ ಉದ್ಯಮದಲ್ಲಿ ಯಶ ಕಂಡ ಹಳ್ಳಿ ಹುಡುಗ

ಆರಂಭದಲ್ಲಿ ಉದ್ಯೋಗಕ್ಕಾಗಿ ಅಲೆದಾಡಿದ ಕೃಷಿ ಕುಟುಂಬದ ಇವರು, ಉಪ್ಪಿನಕಾಯಿ ಉತ್ಪಾದನಾ ಘಟಕವೊಂದರಲ್ಲಿ ಕೂಲಿ ಕೆಲಸಕ್ಕೆ ಸೇರಿ, ಕಾರ್ಮಿಕರ ಶ್ರಮ ಮತ್ತು ಉದ್ಯಮದ ಪ್ರಗತಿಯನ್ನು ಮನಗಂಡು, 2006ರಲ್ಲಿ ಪಟ್ಟಣದಲ್ಲಿ ಕಟ್ಟಡ ಬಾಡಿಗೆ ಪಡೆದು ಸಣ್ಣದಾಗಿ ಉಪ್ಪಿನಕಾಯಿ ಉದ್ಯಮ ಸ್ಥಾಪಿಸಿದರು. ನಂತರ ಆರ್ಥಿಕವಾಗಿ ಚೇತರಿಕೆ ಕಂಡು ಪಟ್ಟಣದ ಹೊರ ವಲಯದಲ್ಲಿ 1 ಎಕರೆ ಜಮೀನು ಖರೀದಿಸಿ ‘ಓಂ’ ಪಿಕಲ್ ಹೆಸರಿನಲ್ಲಿ ಉದ್ಯಮ ಆರಂಭಿಸಿದ್ದಾರೆ.

ಜೊತೆಗೆ ಜೋನಿ‌ ಬೆಲ್ಲದ ಘಟಕ ತೆರೆದು ಬಹು ಉದ್ಯಮಿಯಾಗಿ ಬೆಳೆದಿರುವುದು ವಿಶೇಷ. ಮಾವಿನಕಾಯಿ, ಅಪ್ಪೆ ಮಿಡಿ, ನಿಂಬೆಕಾಯಿ, ಕವಳೆಕಾಯಿ, ಶುಂಠಿ, ಹಸಿಮೆಣಸು, ಅರಳೆಕಾಯಿ, ಗೋಣಿಕಾಯಿ ಸೇರಿ ಹತ್ತಾರು ಬಗೆಯ ಉಪ್ಪಿನಕಾಯಿಗಳು ಹಾಗೂ ಮಸಾಲೆ ಪದಾರ್ಥಗಳು ಹಾಗೂ ಜೋನಿ ಬೆಲ್ಲವನ್ನು ತಯಾರಿಸಲಾಗುತ್ತಿದೆ. ಪ್ರತಿ ದಿನ 35ಕ್ಕೂ ಅಧಿಕ ಕಾರ್ಮಿಕರು ಕೆಲಸ ನಿರ್ವಹಿಸುತ್ತಾರೆ.

‘ಉಪ್ಪಿನಕಾಯಿ ಉದ್ಯಮದಲ್ಲಿ ತೊಡಗಿ ಎಲ್ಲರೂ ಸೈ ಎನಿಸಿಕೊಳ್ಳಲು ಸಾಧ್ಯವಿಲ್ಲ. ಈ ಉದ್ಯಮ ಆರಂಭಿಸುವುದು ಬೇಡ ಎನ್ನುವ ಸಲಹೆಯನ್ನು ಸಂಬಂಧಿಕರು, ಸ್ನೇಹಿತರು ನೀಡಿದ್ದರು. ಯಾವುದೇ ಕೆಲಸದಲ್ಲಿ ಪ್ರಾಮಾಣಿಕತೆ, ನಿಷ್ಠೆ ಹಾಗೂ ಅಚಲ ಗುರಿ ಇದ್ದರೆ ಯಶಸ್ಸು ಕಾಣಬಹುದು’ ಎಂದು ಅವರು ಹೇಳುತ್ತಾರೆ.

‘ಪ್ರಾರಂಭದಲ್ಲಿ ವರ್ಷಕ್ಕೆ 50ರಿಂದ 100 ಕೆ.ಜಿ. ಉಪ್ಪಿನಕಾಯಿ ಮಾರಾಟ ಮಾಡುತ್ತಿದ್ದೆ. ಇದೀಗ ವರ್ಷಕ್ಕೆ 700 ಕ್ವಿಂಟಲ್‌ ಉಪ್ಪಿನಕಾಯಿ ಮಾರಾಟ ಮಾಡುತ್ತಿದ್ದಾರೆ. ಮೊದಲು ಬೆರಳೆಣಿಕೆಯಷ್ಟು ಜನರ ಸಹಕಾರ ಪಡೆದು ಉಪ್ಪಿನಕಾಯಿ ತಯಾರಿಕೆ ಮತ್ತು ಮಾರಾಟದಲ್ಲಿ ತೊಡಗುತ್ತಿದ್ದರು. ಈಗ‌ 40 ಕುಟುಂಬಗಳು ನೇರವಾಗಿ ಉಪ್ಪಿನಕಾಯಿ ತಯಾರಿಕೆಯಲ್ಲಿ ತೊಡಗಿಸಿಕೊಂಡಿವೆ.

ಮಾರಾಟ ವಿಭಾಗದಲ್ಲಿ 30ಕ್ಕೂ ಹೆಚ್ಚು ಕುಟುಂಬಗಳ ಜೀವನ ಸಾಗುತ್ತಿದೆ. ಈ ಉದ್ಯಮವು ಸ್ಥಳೀಯರಿಗೆ ಉದ್ಯೋಗ ಅವಕಾಶ ಕಲ್ಪಿಸಿದೆ. ಕೆಲಸ ಬಯಸಿ ಬಂದವರಿಗೆ ವಾಪಸ್‌ ಕಳುಹಿಸಿದ ಉದಾಹರಣೆ ಇಲ್ಲ. ಅಂತೆಯೇ ಬಡ ನಿರುದ್ಯೋಗಿಗಳಿಗೆ ಇವರ ಉದ್ಯಮ ಜೀವನಾಧಾರವಾಗಿದೆ.