ಕಾಯಕ ಜೀವಿಗಳ ಆಸ್ತಿ ಜನಪದ

ಶಿರಾ: ಜಾನಪದ ಯಾವುದೋ ಒಂದು ಜಾತಿ, ಧರ್ಮಕ್ಕೆ ಸೀಮಿತವಾಗಿಲ್ಲ. ನಿಸರ್ಗ ಧರ್ಮಕ್ಕೆ ನಿಷ್ಠವಾಗಿದ್ದು ಕಾಯಕ ಜೀವಿಗಳ ಆಸ್ತಿಯಾಗಿದೆ. ಇದನ್ನು ಉಳಿಸಿ ಬೆಳೆಸಬೇಕು ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಪ್ರೊ.ಎಸ್.ಜಿ.ಸಿದ್ದರಾಮಯ್ಯ ಹೇಳಿದರು.

. ನಗರದ ಸರ್ಕಾರಿ ಬಾಲಕಿಯರ ಪದವಿ ಪೂರ್ವ ಕಾಲೇಜು ಆವರಣದಲ್ಲಿ ಶನಿವಾರ ಕರ್ನಾಟಕ ಜಾನಪದ ಆಕಾಡೆಮಿಯಿಂದ ನಡೆದ ‘ಜಿಲ್ಲಾ ಜಾನಪದ ಸಂಭ್ರಮ’ ಉದ್ಘಾಟಿಸಿ ಮಾತನಾಡಿದರು.

. ಜಾನಪದಕ್ಕೆ ಭವ್ಯ ಪರಂಪರೆ ಇದೆ. ಯಾವುದೇ ಧರ್ಮದಲ್ಲಿ ಸಿಗದ ಸಾರ ಜಾನಪದದಲ್ಲಿ ದೊರೆಯುತ್ತದೆ. ಸಾಂಸ್ಕೃತಿಕ ಜಗತ್ತನ್ನು ಜೀವಂತವಾಗಿಡುವುದು ಆಕಾಡೆಮಿಗಳ ಕೆಲಸ ಎಂದರು.

. ದೇಶದಲ್ಲಿ ಹಲವು ಧರ್ಮ, ಜಾತಿ, ಭಾಷೆಗಳಿಂದ ಬಹುಸಂಸ್ಕೃತಿ ಇದ್ದರೂ, ದೇಶವೇ ಒಂದು ಕುಟುಂಬವಾಗಿದೆ. ಇತ್ತೀಚಿನ ದಿನಗಳಲ್ಲಿ ಏಕ ಭಾಷೆ, ಏಕ ದೇಶ, ಏಕ ಸಂಸ್ಕೃತಿ ಎಂದು ಬಹುಸಂಸ್ಕೃತ ಪದ್ಧತಿಯನ್ನು ನಾಶ ಮಾಡಲು ನೀಚ ಸಂಸ್ಕೃತಿಯವರು ಹೊರಟಿದ್ದು, ಈ ಬಗ್ಗೆ ಎಚ್ಚರ ವಹಿಸಬೇಕು ಎಂದರು.

. ಆಕಾಡೆಮಿ ಅಧ್ಯಕ್ಷ ಗೊಲ್ಲಹಳ್ಳಿ ಶಿವಪ್ರಸಾದ್ ಮಾತನಾಡಿ, ‘ಜನಪದದ ಆಹಾರ, ವೈದ್ಯ ಪದ್ಧತಿ, ಸಂಸ್ಕೃತಿ ನಮಗೆ ಮಾದರಿಯಾಗಬೇಕು. ನಾವು ಕಟ್ಟುವ ಕೈಗಳಾಗಬೇಕೇ ಹೊರತು ಕೆಡವುವ ಕೈಗಳಾಗಬಾರದು’ ಎಂದರು.

. ಆಕಾಡೆಮಿ ಸದಸ್ಯ ಸಂಚಾಲಕ ಮಲ್ಲಿಕಾರ್ಜುನ ಕೆಂಕೆರೆ ಮಾತನಾಡಿ, ಜನಪದ ಕಲೆ ಮತ್ತು ಕ್ರೀಡೆಗಳು ಮಾಯವಾಗುತ್ತಿವೆ. ಎಲ್ಲಾ ಕಡೆ ಮೊಬೈಲ್ ವ್ಯಾಪಿಸಿದೆ ಎಂದರು.

. ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರದ ಸದಸ್ಯ ಡಾ.ಚಿತ್ತಯ್ಯ ಪೂಜಾರ್ ಅವರು ‘ತುಮಕೂರು ಜಿಲ್ಲೆ ಜಾನಪದ ಕಲೆಗಳ ಅನನ್ಯತೆ' ಬಗ್ಗೆ ಉಪನ್ಯಾಸ ನೀಡಿದರು. ಕಸಾಪ ಜಿಲ್ಲಾಧ್ಯಕ್ಷ ಕೆ.ಎಸ್.ಸಿದ್ದಲಿಂಗಪ್ಪ, ಪದವಿ ಪೂರ್ವ ಶಿಕ್ಷಣ ಇಲಾಖೆ ಉಪನಿರ್ದೇಶಕ ಡಾ.ಬಾಲ ಗುರುಮೂರ್ತಿ ಮಾತನಾಡಿದರು.

. ಕಸಾಪ ತಾಲ್ಲೂಕು ಘಟಕದ ಅಧ್ಯಕ್ಷ ಬಿ.ಪಿ.ಪಾಂಡುರಂಗಯ್ಯ, ಚಿ.ನಾ.ಹಳ್ಳಿ ತಾಲ್ಲೂಕು ಘಟಕದ ಅಧ್ಯಕ್ಷ ರವಿಕುಮಾರ್ ಕಟ್ಟೆಮನೆ, ಗಾಯತ್ರಿ ಶಿವಪ್ರಸಾದ್, ಪ್ರಾಂಶುಪಾಲ ಚಂದ್ರಯ್ಯ, ಪಿ.ಎಚ್.ಮಹೇಂದ್ರಪ್ಪ, ನರೇಶ್ ಬಾಬು, ಸಂಜಯ್ ಎಸ್.ಗೌಡ, ಶಿವು ಚಂಗಾವರ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯ ತಿಪ್ಪೇಶ್ ಹಾಜರಿದ್ದರು.

. - ಮೆರವಣಿಗೆಗೆ ಸೀಮಿತ

ತುಮಕೂರು ವಿ.ವಿ ಕುಲಸಚಿವೆ ನಾಹಿದಾ ಜಮ್ ಜಮ್ ಮಾತನಾಡಿ ಹಿಂದೆ ಶಾಲಾ ಕಾರ್ಯಕ್ರಮಗಳಲ್ಲಿ ಜಾನಪದ ಭಾವಗೀತೆ ದೇಶ ಭಕ್ತಿ ಗೀತೆಗಳಿಗೆ ಹೆಚ್ಚು ಮಹತ್ವ ನೀಡಲಾಗುತ್ತಿತ್ತು. ಆದರೆ ಈಗ ಸಿನಿಮಾ ಹಾಡುಗಳು ಈ ಜಾಗವನ್ನು ವ್ಯಾಪಿಸಿಕೊಂಡಿವೆ. ಜಾನಪದ ಕಲಾವಿದರು ಕೇವಲ ಮೆರವಣಿಗೆಗೆ ಸೀಮಿತರಾಗುತ್ತಿದ್ದು ವೇದಿಕೆಯಲ್ಲಿ ಅವರಿಗೆ ಸ್ಥಾನವಿಲ್ಲದಂತಾಗಿದೆ. ಹಿಂದೆ ಕಾಲೇಜು ಮುಗಿಸಿ ಕುವೆಂಪು ಬೇಂದ್ರೆ ಅವರಂತಹ ಮಹನೀಯರು ಹೊರ ಬಂದರೆ ಇಂದು ಹೊರಬರುತ್ತಿರುವರನ್ನು ನೋಡಿದರೆ ನೋವಾಗುತ್ತಿದೆ. ಸಂಸ್ಕೃತಿಯನ್ನು ಮರೆಯುತ್ತಿರುವುದೇ ಇದಕ್ಕೆ ಕಾರಣ ಕಳವಳ ವ್ಯಕ್ತಪಡಿಸಿದರು.