ಮಂಗಳವಾರ, ಅಕ್ಟೋಬರ್ 15, 2019
26 °C
ಮೊಗಟಾ ಗ್ರಾಮದ ವಿವಿಧೆಡೆ ಸಮಸ್ಯೆ: ಮೊಬೈಲ್ ಟವರ್‌ ನಿರ್ಮಾಣಕ್ಕೆ ಬೇಡಿಕೆ

ಪದೇಪದೇ ‘ಮೌನ’ವಾಗುವ ಸ್ಥಿರ ದೂರವಾಣಿ

Published:
Updated:
Prajavani

ಕಾರವಾರ: ಅಂಕೋಲಾ ತಾಲ್ಲೂಕಿನ ಮೊಗಟಾ ಗ್ರಾಮದ ಬ್ರಹ್ಮೂರು ಸುತ್ತಮುತ್ತ ಸುಮಾರು ಎರಡು ತಿಂಗಳಿನಿಂದ ಬಿ.ಎಸ್‌.ಎನ್.ಎಲ್ ಸ್ಥಿರ ದೂರವಾಣಿ ಪದೇಪದೇ ಕಾರ್ಯ ಸ್ಥಗಿತವಾಗುತ್ತಿದೆ. ಇದರಿಂದ ಭಾರಿ ತೊಂದರೆಯಾಗುತ್ತಿದೆ ಎಂದು ಗ್ರಾಹಕರು ದೂರಿದ್ದಾರೆ.

ಬ್ರಹ್ಮೂರು, ಕಬಗಾಲ, ಕಡಕೋಡ ಭಾಗದಲ್ಲಿ ಸುಮಾರು 150 ಸಂಪರ್ಕಗಳಿವೆ. ಇಲ್ಲಿ ಒಮ್ಮೆ ದೂರವಾಣಿ ನಿಷ್ಕ್ರಿಯಗೊಂಡರೆ ಎರಡು ದಿನ ಪೂರ್ತಿ ದುರಸ್ತಿಯಾಗುತ್ತಿಲ್ಲ. ಈ ಭಾಗಗಳಲ್ಲಿ ಬಿಎಸ್‌ಎನ್‌ಎಲ್‌ ಸೇರಿದಂತೆ ಯಾವುದೇ ಮೊಬೈಲ್ ಆಪರೇಟರ್‌ಗಳ ಟವರ್ ಕೂಡ ಇಲ್ಲ. ಹಾಗಾಗಿ ಹೊರಜಗತ್ತನ್ನು ಸಂಪರ್ಕಿಸಲು ಸ್ಥಿರ ದೂರವಾಣಿಯನ್ನೇ ಅವಲಂಬಿಸಬೇಕು. ಯಾವುದೇ ಕೆಲಸ ಕಾರ್ಯಗಳು ಆಗಬೇಕಾದರೂ ದೂರವಾಣಿ ಮುಖಾಂತರವೇ ಆಗಬೇಕು. ದಿನಗಟ್ಟಲೆ ಸಂಪರ್ಕ ಕಡಿತಗೊಂಡರೆ ಸಮಸ್ಯೆಗಳು ತಪ್ಪಿದ್ದಲ್ಲ ಎನ್ನುತ್ತಾರೆ ಗ್ರಾಮಸ್ಥ ಸುಬ್ರಾಯ ಹೆಗಡೆ, ಸೋಮಶೇಖರ ನಾಯ್ಕ, ಕಮಲಾಕರ ಮರಾಠಿ.

‘ಗುಡುಗು, ಮಿಂಚು ಕಾಣಿಸಿಕೊಂಡ ಸಂದರ್ಭದಲ್ಲಿ ದೂರವಾಣಿ ಸೇವೆಯನ್ನು ನಿಷ್ಕ್ರಿಯಗೊಳಿಸುವುದು ಸಹಜ. ಆದರೆ, ಅದನ್ನು ಪುನಃ ಆರಂಭಿಸಲು ದಿನಗಟ್ಟಲೆ ಬೇಕೇ ಎನ್ನುವುದು ಅವರ ಪ್ರಶ್ನೆಯಾಗಿದೆ. ದೂರವಾಣಿ ವಿನಿಮಯ ಕೇಂದ್ರಕ್ಕೆ ಕಾಯಂ ಸಿಬ್ಬಂದಿಯ ನಿಯೋಜನೆಯಾಗಿದೆ. ಆದರೂ ಕೆಲಸ ಕಾರ್ಯಗಳು ಸೂಕ್ತ ರೀತಿಯಲ್ಲಿ ಆಗುತ್ತಿಲ್ಲ ಎಂದೂ ಬೇಸರಿಸುತ್ತಾರೆ.

ಸಿಬ್ಬಂದಿ ಕೊರತೆ: ಈ ಬಗ್ಗೆ ಪ್ರತಿಕ್ರಿಯಿಸಿದ ಬಿ.ಎಸ್.ಎನ್.ಎಲ್‌ ತಾಂತ್ರಿಕ ಅಧಿಕಾರಿ ಸಂದೀಪ, ‘ಚತುಷ್ಪಥ ಹೆದ್ದಾರಿ ಕಾಮಗಾರಿ ನಡೆಯುತ್ತಿದ್ದು, ಆಪ್ಟಿಕಲ್ ಫೈಬರ್ ಕೇಬಲ್‌ ತುಂಡಾಗುತ್ತಿದೆ. ಹಾನಿಯಾದ ಜಾಗವನ್ನು ಹುಡುಕುವುದಕ್ಕೆ ಕೆಲವೊಮ್ಮೆ ಒಂದೆರಡು ದಿನಳೂ ಬೇಕಾಗುತ್ತವೆ. ಸಿಬ್ಬಂದಿ ಕೊರತೆಯಿಂದ ಕೆಲವೊಮ್ಮೆ ಸಮಸ್ಯೆ ಬಿಗಡಾಯಿಸುತ್ತದೆ ಎಂದರು.

ಮಿನಿ ಟವರ್‌ ನಿರ್ಮಿಸಲು ಒತ್ತಾಯ:

ಬ್ರಹ್ಮೂರು, ಕಬಗಾಲ, ಕಡಕೋಡ, ಗಡಗಾರ, ಬೇಣದಳ್ಳಿ, ಹೀಗೆ ಹಲವು ಮಜರೆಗಳನ್ನು ಸೇರಿಸಿದರೆ 1,000ಕ್ಕೂ ಹೆಚ್ಚು ಜನಸಂಖ್ಯೆಯಿದೆ. ಮೊಗಟಾ ಗ್ರಾಮದ ವ್ಯಾಪ್ತಿಯಲ್ಲಿ ಒಂದೂ ಮೊಬೈಲ್ ಟವರ್ ಇಲ್ಲ. ಮೊಬೈಲ್‌ನಿಂದ ಕರೆ ಮಾಡಲು 11 ಕಿ.ಮೀ. ದೂರದ ಮಿರ್ಜಾನ್‌ ತನಕ ಬರಬೇಕು.

ದಟ್ಟಾರಣ್ಯದಿಂದ ಕೂಡಿದ ಯಾಣದಲ್ಲಿ ಕೆಲವು ವರ್ಷಗಳ ಹಿಂದೆ 15 ಮೀಟರ್ ಎತ್ತರದ ಮಿನಿ ಟವರ್ ನಿರ್ಮಿಸಲಾಗಿತ್ತು. ಈ ಭಾಗಕ್ಕೂ ಅಂಥದ್ದೇ ಮಿನಿ ಟವರ್ ಮಾಡಿದರೆ ಅನುಕೂಲವಾಗುತ್ತದೆ ಎಂಬುದು ಹಲವರ ಅಭಿಪ್ರಾಯ. 

‘ಮೊಬೈಲ್ ಟವರ್ ನಿರ್ಮಿಸಿದರೆ ಪ್ರತಿ ತಿಂಗಳು ನಿರ್ವಹಣೆಗೆ ಸಾಕಷ್ಟು ವ್ಯಯಿಸಬೇಕಾಗುತ್ತದೆ. ಜನಸಂಖ್ಯೆ ಹಾಗೂ ಲಾಭ–ನಷ್ಟಗಳನ್ನು ಪರಿಗಣಿಸಿ ಟವರ್ ನಿರ್ಮಾಣದ ಬಗ್ಗೆ ಯೋಚಿಸಬಹುದು’ ಎನ್ನುವುದು ಸಂಸ್ಥೆಯ ತಾಂತ್ರಿಕ ಅಧಿಕಾರಿ ಸಂದೀಪ್ ಅವರ ಅನಿಸಿಕೆ.

Post Comments (+)