ಗುರುವಾರ , ಏಪ್ರಿಲ್ 22, 2021
24 °C
‘ಬೆಟರ್ ಕಾರವಾರ’ ತಂಡದ ಸದಸ್ಯರಿಂದ ಚಿತ್ರಗಳ ರಚನೆ

ಗೋಡೆಗೆ ಚಿತ್ತಾಕರ್ಷಕ ಚಿತ್ರಗಳ ಅಲಂಕಾರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಾರವಾರ: ನಗರದ ಜಿಲ್ಲಾಧಿಕಾರಿ ಕಚೇರಿಯ ಆವರಣ ಗೋಡೆಗಳೀಗ ಕಲೆಯ ಪ್ರತಿಫಲನದಂತಾಗಿದೆ. ‘ಬೆಟರ್ ಕಾರವಾರ’ ಎಂಬ ಸಂಘಟನೆಯ 30ಕ್ಕೂ ಅಧಿಕ ಯುವಕರು ಬರೆದಿರುವ ಆಕರ್ಷಕ ಚಿತ್ರಗಳು ಇದಕ್ಕೆ ಕಾರಣ.

ಮಳೆಗಾಲದಲ್ಲಿ ಪಾಚಿ ಹಿಡಿದು ಬಣ್ಣ ಕಳೆದುಕೊಂಡಿ ಗೋಡೆಗಳೀಗ ಸುಂದರವಾಗಿ ಕಂಗೊಳಿಸುತ್ತಿವೆ. ಯಕ್ಷಗಾನ, ಪರಿಸರ ಸಂರಕ್ಷಣೆ ಸೇರಿದಂತೆ ಸುಮಾರು 40 ಕಲಾಕೃತಿಗಳು ಇಲ್ಲಿ ರಚನೆಯಾಗಿವೆ. ತಂಡದ ಕೆಲವು ಸದಸ್ಯರು ಕೊರೊನಾ ಕಾರಣದಿಂದ ಜಾರಿಯಾಗಿರುವ ‘ವರ್ಕ್ ಫ್ರಂ ಹೋಂ’ನಲ್ಲಿ ತೊಡಗಿಕೊಂಡಿದ್ದಾರೆ. ವಿದ್ಯಾರ್ಥಿಗಳು, ವಿವಿಧ ವೃತ್ತಿಪರರೂ ಕೈಜೋಡಿಸಿದ್ದಾರೆ.

ಫೇಸ್‌ಬುಕ್‌ನಲ್ಲಿ ಆರಂಭವಾದ ‘ಬೆಟರ್ ಕಾರವಾರ’ ಸಂಘಟನೆಯು, ಈಗ ನೂರಾರು ಜನರನ್ನು ಆಕರ್ಷಿಸುತ್ತಿದೆ. ಸ್ಥಳೀಯರಾದ, ಬೇರೆ ಬೇರೆ ನಗರಗಳಲ್ಲಿ ವೃತ್ತಿ ನಿರತರಾಗಿರುವ ಪ್ರೀತೇಶ ರಾಣೆ, ಸತೀಶ ಮಾಳ್ಸೇಕರ್, ನಿತೇಶ ನಾಯ್ಕ, ಸೂರಜ್ ಗೋವೇಕರ್, ಅಮನ್ ಶೇಖ್, ಪ್ರಸಾದ ಸಾದಿಯೆ, ಉಮಾ ಶಂಕರ ಈ ತಂಡವನ್ನು ಆರಂಭಿಸಿದ್ದರು. ಸದ್ಯ ಸದಸ್ಯರ ಸಂಖ್ಯೆ 40ಕ್ಕೇರಿದೆ.

‘ಸುಂದರವಾದ ಕಾರವಾರವನ್ನು ಮತ್ತಷ್ಟು ಜನರಿಗೆ ಪರಿಚಯಿಸಬೇಕು. ವಿವಿಧ ಕಡೆ, ವಿವಿಧ ಕೆಲಸಗಳಲ್ಲಿ ತೊಡಗಿರುವ ಸಮಾನ ಮನಸ್ಕರು ಈ ಬಗ್ಗೆ ಕಾರ್ಯ ಪ್ರವೃತ್ತರಾಗಿದ್ದೇವೆ. ಮುಂದಿನ ದಿನಗಳಲ್ಲಿ ಬೀದಿ ನಾಟಕಗಳ ಮೂಲಕವೂ ಜಾಗೃತಿ ಮೂಡಿಸಲು ಚಿಂತಿಸಲಾಗಿದೆ’ ಎನ್ನುತ್ತಾರೆ ತಂಡದ ಸದಸ್ಯ ನಿತೇಶ ನಾಯ್ಕ.

ಕಾರವಾರದ ಬಗ್ಗೆ ಉತ್ತಮ ಅಭಿಪ್ರಾಯ, ಜನರ ಪ್ರೀತಿ ಮೂಡುವ ರೀತಿಯಲ್ಲಿ ಕೆಲಸ ಮಾಡುತ್ತಿರುವ ತಂಡವು, ಈ ಹಿಂದೆ  ಅ.2ರಿಂದ ಪ್ರತಿ ಭಾನುವಾರ ವಿವಿಧೆಡೆ ಶ್ರಮದಾನದ ಮೂಲಕ ಸ್ವಚ್ಛತೆ ಮಾಡಿದ್ದರು. 15 ವಾರ ಈ ಕಾರ್ಯದಲ್ಲಿ ತೊಡಗಿದ್ದರು. ಟ್ಯಾಗೋರ್ ಕಡಲತೀರದ ಮಯೂರವರ್ಮ ವೇದಿಕೆಯ ಗೋಡೆಯ ಮೇಲೆ ರೆಕ್ಕೆಗಳ ಚಿತ್ರವನ್ನೂ ತಂಡದ ಸದಸ್ಯರು ಬರೆದಿದ್ದರು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು