ಬುಧವಾರ, ಏಪ್ರಿಲ್ 1, 2020
19 °C

ಶತಮಾನದ ಅಜ್ಜಿಗೆ ‘ಜಾನಪದ’ ಗೌರವ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಶಿರಸಿ/ಮುಂಡಗೋಡ: ಶತಮಾನದ ಹೊಸಿಲನ್ನು ದಾಟಿರುವ ಅಜ್ಜಿ, ಹಳಿಯಾಳ ತಾಲ್ಲೂಕು ಸಾಂಬ್ರಾಣಿಯ ಹುಸೇನಬಿ ಬುಡನ್‌ಸಾಬ್ ಮುಜಾವರ ಸಿದ್ದಿ ಅವರು 2019ನೇ ಸಾಲಿನ ಜಾನಪದ ಅಕಾಡೆಮಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ವಯಸ್ಸು 103 ದಾಟಿದರೂ ಅಗಾಧ ಸ್ಮರಣಶಕ್ತಿ ಹೊಂದಿರುವ ಅಜ್ಜಿ, ಪ್ರಶಸ್ತಿ ಘೋಷಣೆಯಾದ ಖುಷಿಯಲ್ಲಿ ಮನೆಗೆ ಬಂದ ಗಣ್ಯರೆದುರು ಹಾಡು ಹೇಳಿ ಸಂಭ್ರಮಿಸಿದರು.

ಮೂರ್ನಾಲ್ಕು ವರ್ಷದ ಬಾಲೆಯಾಗಿರುವಾಗಲೇ ಡಮಾಮಿ ನೃತ್ಯಕ್ಕೆ ಹೆಜ್ಜೆ ಹಾಕುತ್ತಿದ್ದ ಹುಸೇನಬಿ ಮುಂದೊಮ್ಮೆ ದೊಡ್ಡ ಕಲಾವಿದೆಯಾಗಬಹುದೆಂದು ಆಕೆಯ ಪಾಲಕರೂ ಊಹಿಸಿರಲಿಲ್ಲ. ಅಜ್ಜಿ–ತಾತ, ಅಮ್ಮ ಆಶಾಬಿ– ಅಪ್ಪ ಖಾಸಿಂ ಸಾಬ್ ಎಲ್ಲರೂ ಡಮಾಮಿ ಕಲಾವಿದರಾಗಿದ್ದರು. ಅವರ ನೃತ್ಯವನ್ನು ನೋಡುತ್ತಲೇ ಬೆಳೆದ ಬಾಲಕಿ ಹುಸೇನಬಿ, ಬಾಲ ಹೆಜ್ಜೆಯಲ್ಲೇ ನೃತ್ಯ ಮಾಡುತ್ತ ಬೆಳೆದವಳು. ಆ ಕಾಲದ ಬಡತನ, ಬಾಲಕಿಯ ಶೈಕ್ಷಣಿಕ ಜೀವನವನ್ನು ಹೊಸಕಿ ಹಾಕಿತು. ಶಾಲೆಯ ಮೆಟ್ಟಿಲು ಕಾಣದ, ಅಕ್ಷರವನ್ನೇ ಕಲಿಯದ ಬಾಲಕಿ ನೃತ್ಯಕ್ಕೆ ಜೀವನವನ್ನು ಮುಡಿಪಾಗಿಟ್ಟರು.

‘ಅಮ್ಮ ನನ್ನಂತಹ ನೂರಾರು ಜನರಿಗೆ ಡಮಾಮಿ ಹಾಡು, ಡೋಲ್ಕಿ ಪದ ಕಲಿಸಿದವರು. ಜನಪದೀಯರ ಬಾಯಲ್ಲಿ ಹರಿದು ಬಂದ ಹಾಡುಗಳನ್ನು ಕಲಿತಿರುವ ಅವರಿಗೆ 100ಕ್ಕೂ ಹೆಚ್ಚು ಪದಗಳು ನಾಲಿಗೆಯಲ್ಲಿವೆ. 90 ವರ್ಷದವರೆಗೂ ನೃತ್ಯಕ್ಕೆ ಹೆಜ್ಜೆ ಹಾಕುತ್ತಿದ್ದರು. ಈಗಲೂ ಉತ್ಸಾಹ ಬಂದರೆ, ಹಾಡು ಹೇಳಿ ಉಳಿದವರನ್ನು ಕುಣಿಸುತ್ತಾರೆ’ ಎನ್ನುತ್ತಾರೆ ಹುಸೇನಬಿ ಪುತ್ರಿ ಮಮತಾಜ್ ಸಿದ್ದಿ.

‘ಈಗ ದೃಷ್ಟಿ ಕೊಂಚ ಮಂದವಾಗಿದೆ. ಕಿವಿ ಸರಿಯಾಗಿ ಕೇಳಿಸುತ್ತಿಲ್ಲ. ಆದರೆ, ಅವರ ಸ್ಮರಣಶಕ್ತಿ ಸ್ಫುಟವಾಗಿದೆ. ನೃತ್ಯ ಮಾಡುತ್ತಲೇ ಅಮ್ಮ ಮುದುಕಾದರು’ ಎಂದು ಅವರು ಮಾರ್ಮಿಕವಾಗಿ ಹೇಳಿದರು.

ಹುಸೇನಬಿ ಅವರಿಗೆ 11 ಮಕ್ಕಳು ಅವರಲ್ಲಿ ಐವರು ಈಗ ಬದುಕಿದ್ದಾರೆ. ಎಲ್ಲರೂ ಕೂಲಿ ಮಾಡಿ ಜೀವನ ನಡೆಸುತ್ತಿದ್ದಾರೆ. ಸರ್ಕಾರ ಈ ಹಿಂದೆ ನಡೆಸಿದ್ದ ಗುರು–ಶಿಷ್ಯ ಪರಂಪರೆ ಕಾರ್ಯಕ್ರಮದಲ್ಲಿ ಅವರು ಅನೇಕ ಕಾರ್ಯಕ್ರಮ‌‌ಗಳಿಗೆ ನಿರ್ದೇಶನ ನೀಡಿ ಬುಡುಕಟ್ಟು ಜನರಿಗೆ ತರಬೇತಿ ನೀಡಿದ್ದಾರೆ. ಅವರಿಂದ ತರಬೇತಿ ಪಡೆದ ಜ್ಯೂಲಿಯಾನಾ ಫರ್ನಾಂಡಿಸ್‌, ಮೇರಿ ಗರಿಬಾಚೆ ಅವರು ಡಮಾಮಿ ಹಾಗೂ ಡೋಲ್ಕಿ ನೃತ್ಯ ಕಲಾವಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)