ಕಾರವಾರ | ಬತ್ತಿದ ಜಲಮೂಲ: ಬಾಯಾರಲಿವೆ ಗ್ರಾಮ

ಗೋಕರ್ಣದಲ್ಲಿ ಫೆಬ್ರುವರಿ ಪ್ರಾರಂಭದಿಂದಲೇ ನೀರಿನ ಕೊರತೆ ಕಾಣಿಸುತ್ತಿದೆ. ಜನರ ಜೀವನಾಡಿಯಾದ ಸಮುದ್ರದ ತಪ್ಪಲಿನಲ್ಲಿರುವ ರಾಮತೀರ್ಥ (ರಾಮಾ ವಾಟರ್) ಬರಿದಾಗಿದೆ. ಮಳೆಯ ಅಭಾವದಿಂದಾಗಿ ಈ ಭಾಗದ ಬಹುತೇಕ ಕಡೆ ಈಗಿನಿಂದಲೇ ನೀರಿನ ಸಮಸ್ಯೆ ತಲೆದೋರಿದೆ. ಜೆಜೆಎಂ ಯೋಜನೆ ಅನಷ್ಠಾನಗೊಂಡಿದ್ದರೂ ನೀರು ಸರಬರಾಜು ಆಗುತ್ತಿಲ್ಲ ಎಂಬ ದೂರುಗಳಿವೆ. ಮುಖ್ಯ ಸಮುದ್ರ ದಂಡೆಯಲ್ಲಿರುವ ರಾಮತೀರ್ಥದ ನೀರು ಕುಡಿಯಲು ಉಪಯುಕ್ತವಾಗಿದ್ದು ಸಾವಿರಾರು ಜನರಿಗೆ ಆಸರೆಯಾಗಿತ್ತು. ಆದರೆ ರಾಮತೀರ್ಥದ ಸುತ್ತಮುತ್ತ ಕೊಳವೆಬಾವಿ ಕೊರೆಯಿಸುವವರ ಸಂಖ್ಯೆ ಹೆಚ್ಚಿರುವ ಕಾರಣ ನೀರಿನ ಮಟ್ಟ ಇಳಿಕೆಯಾಗಿದೆ. ‘ಪ್ರಕೃತಿದತ್ತ ರಾಮತೀರ್ಥದಲ್ಲಿ ನೈಸರ್ಗಿಕವಾಗಿ ಸಿಗುವ ಶುದ್ಧ ನೀರಾಗಿತ್ತು. ಹಲವು ಬಾರಿ ಇಲ್ಲಿಗೆ ಭೇಟಿ ನೀಡಿದ್ದೇನೆ. ಆದರೆ ಇದೇ ಮೊದಲ ಬಾರಿಗೆ ರಾಮತೀರ್ಥದಂತಹ ತಾಣವೂ ನೀರಿಲ್ಲದೆ ಒಣಗುತ್ತಿರುವುದನ್ನು ಕಂಡು ಬೇಸರವಾಗಿದೆ’ ಎಂದು ಜರ್ಮನ್ ಮಹಿಳೆ ಶೋಲಾ ಥ್ರಿಸ್ಕೋಲ್ ಹೇಳುತ್ತಾರೆ.