ಅರಸೀಕೆರೆ: ಕಾರಹುಣ್ಣಿಮೆ ಅಂಗವಾಗಿ ಉಚ್ಚಂಗಿದುರ್ಗ ಗ್ರಾಮದ ಉತ್ಸವಾಂಬ ದೇವಿ ದರ್ಶನಕ್ಕೆ ಮಂಗಳವಾರ ಸಾವಿರಾರು ಭಕ್ತರು ಬಂದಿದ್ದರಿಂದ ಜನಜಾತ್ರೆ ಇತ್ತು.
ದಾವಣಗೆರೆ, ವಿಜಯನಗರ, ಬಳ್ಳಾರಿ, ಹಾವೇರಿ, ಚಿತ್ರದುರ್ಗ ಜಿಲ್ಲೆಗಳಿಂದ ಭಕ್ತರು ಆಗಮಿಸಿದ್ದರು. ಮಂಗಳವಾರ ಬೆಳಿಗ್ಗೆಯಿಂದಲೇ ಬೆಟ್ಟದ ಹರಿಹರ ಬಾಗಿಲು, ಪಾದಗಟ್ಟೆ ದ್ವಾರಗಳಿಂದ ಸಾಲುಗಟ್ಟಿ ದೇವಿ ದರ್ಶನಕ್ಕೆ ತೆರಳಿದರು.
ಮಧ್ಯಾಹ್ನ 12 ರ ವೇಳೆಗೆ ಅಸಂಖ್ಯ ಭಕ್ತ ಸಮೂಹ ಹರಿದು ಬಂತು. ದೇವಸ್ಥಾನ ಬೀದಿಯಲ್ಲಿ ಜನಜಂಗುಳಿ ನೆರೆದಿತ್ತು. ಭಕ್ತರ ನಿಯಂತ್ರಿಸಲು ಪೊಲೀಸರು, ಗೃಹ ರಕ್ಷಕರು, ದೇವಸ್ಥಾನ ಸಿಬ್ಬಂದಿ ಹರ ಸಾಹಸಪಟ್ಟರು.
ದಾವಣಗೆರೆ-ಹರಪನಹಳ್ಳಿ ಮುಖ್ಯರಸ್ತೆಯು ವಾಹನಗಳಿಂದ ತುಂಬಿತ್ತು. ಕೆಲ ಕಾಲ ಟ್ರಾಫಿಕ್ ಸಮಸ್ಯೆ ಉಂಟಾಯಿತು. ಕೋಟೆ ಬಾಗಿಲು ಮೂಲಕ ತೆರಳುವ ದಾರಿಯಲ್ಲಿ ಬೈಕ್, ಆಟೋ, ಕಾರುಗಳು ಅಡ್ಡಾದಿಡ್ಡಿಯಾಗಿ ನಿಂತು ಪಾದಚಾರಿಗಳೂ ಸಂಚರಿಸದಂತಾಯಿತು.
ಕಾರ ಹುಣ್ಣಿಮೆ ಅಂಗವಾಗಿ ಉತ್ಸವಾಂಬ ದೇವಿಗೆ ವಿವಿಧ ವಾದ್ಯಗಳ ಮೂಲಕ ಗಂಗೆ ಪೂಜೆ ನೆರವೇರಿಸಲಾಯಿತು. ಫಲ, ಪುಷ್ಪಗಳಿಂದ ಅಲಂಕರಿಸಿ, ದೇವಿಗೆ ಕುಂಕುಮಾರ್ಚನೆ, ಎಲೆಪೂಜೆ, ಹೊಳೆಪೂಜೆ, ಕ್ಷೀರಾಭಿಷೇಕ ಸೇರಿದಂತೆ ವಿವಿಧ ಧಾರ್ಮಿಕ ಕೈಂಕರ್ಯಗಳು ಜರುಗಿದವು.
