ಹೊರ್ತಿ ಜಾನುವಾರ ಜಾತ್ರೆ: ಮಾರುವವರೇ ಎಲ್ಲ, ಕೊಳ್ಳುವವರು ಕಡಿಮೆ

₹ 5 ಸಾವಿರದಿಂದ ₹ 5 ಲಕ್ಷ ಮೊತ್ತ ಬೆಲೆ ಬಾಳುವ ಜೋಡಿ ಎತ್ತು ಮತ್ತು ಹೋರಿಗಳನ್ನು ರೈತರು ಮಾರಾಟಕ್ಕೆ ತಂದಿದ್ದಾರೆ. ಜಾತ್ರೆಗೆ ಬಂದವರು ಜಾನುವಾರುಗಳ ಬೆಲೆ ವಿಚಾರಿಸುತ್ತಾರೆಯೇ ಹೊರತು, ಖರೀದಿಗೆ ಮನಸ್ಸು ಮಾಡುತ್ತಿಲ್ಲ. ಖರೀದಿಗೆ ಬಂದವರು ಅತ್ಯಂತ ಕಡಿಮೆ ಬೆಲೆಗೆ ಹಸುಗಳನ್ನು ಕೇಳುವಂತಾಗಿದೆ.

ಬರದಿಂದ ತತ್ತರಿಸಿರುವ ರೈತರು ರಾಸುಗಳಿಗೆ ನೀರು, ಮೇವು ಒದಗಿಸಲಾಗದೇ ಮಾರಾಟಕ್ಕೆ ತಂದಿದ್ದಾರೆ. ಜಾತ್ರೆ ಡಿ.26ಕ್ಕೆ ಮುಕ್ತಾಯಗೊಳ್ಳಲಿದೆ. ಅಷ್ಟರಲ್ಲಿಯೇ ಬಂದಷ್ಟು ಹಣಕ್ಕೆ ಮಾರಾಟವಾದರೆ ಸಾಕು ಎನ್ನುತ್ತಿದ್ದಾರೆ ರೈತರು. ಊರಿಗೆ ಜಾನುವಾರುಗಳನ್ನು ಮರಳಿ ಒಯ್ದರೇ ಅವುಗಳಿಗೆ ಮೇವು ಎಲ್ಲಿಂದ ತರುವುದು ಎಂಬುದು ರೈತರ ಚಿಂತೆ.

ವಿಜಯಪುರ, ಚಡಚಣ, ಆಲಮೇಲ, ಸಿಂದಗಿ ತಿಕೋಟಾ ಇಂಡಿ, ಝಳಕಿದಿಂದ ವಿವಿಧ ತಳಿಯ ಜಾನುವಾರು ಮಾರಾಟಕ್ಕೆ ಬಂದಿವೆ. ಮಹಾರಾಷ್ಟ್ರದ ಸೋಲಾಪೂರ, ಜತ್ತ, ಸಾಂಗ್ಲಿ, ಸಾಂಗೋಲಾ, ಮಂಗಳವೇಡೆ, ಸಾಂಗ್ಲಿ, ಕೋಲ್ಹಾಪೂರ, ಲಾತೂರು, ಅಕ್ಕಲಕೋಟದಿಂದಲೂ ಬಂದಿರುವ ರೈತರು ಹಾಗೂ ಮಧ್ಯವರ್ತಿಗಳು ಜಾತ್ರೆಯಲ್ಲಿಯೇ ಬೀಡು ಬಿಟ್ಟಿದ್ದಾರೆ.

ಬರಗಾಲ ಇರುವುದರಿಂದ ರೈತರು ಕಡಿಮೆ ಬೆಲೆಗೆ ತಮ್ಮ ಜಾನುವಾರು ಮಾರುತ್ತಾರೆ. ಮರಳಿ ಊರಿಗೆ ಒಯ್ಯಲಾರರು ಎಂಬ ಲೆಕ್ಕಾಚಾರದಲ್ಲಿ ಮಧ್ಯವರ್ತಿಗಳು ಇದ್ದಾರೆ.

‘ಇವು ನಮ್ಮ ಕೈ ಬಿಟ್ಟು ಹೋದರೆ ಸಾಕ್ರಿ. ಜೋಪಾನ ಮಾಡಲೂ ಮೇವು ಮತ್ತು ನೀರು ಎಲ್ಲಿಂದ ತರುವುದು. ಹಿಂಡಿ, ಜೋಳದ ಕಣಕಿ, ಗೋವಿನ ಜೋಳದ ಸೊಪ್ಪು ಕೊಳ್ಳಲು ಹಣವಿಲ್ಲ‘ ಎಂದು ಹೊರ್ತಿಯ ರೈತ ಶರಣಬಸು ಡೋಣಗಿ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಮುಂಗಾರು ಹಾಗೂ ಹಿಂಗಾರು ಮಳೆ ಕೈಕೊಟ್ಟ ಕಾರಣ ಬೆಳೆಗಳು ಒಣಗಿ ರೈತರು ಸಾಲದ ಸುಳಿಗೆ ಸಿಲುಕಿ ಮೇವು, ನೀರಿನ ಕೊರತೆ ಅನುಭವಿಸುತ್ತಿದ್ದಾರೆ. ಹೊಲದಲ್ಲಿನ ಭಾವಿ, ಬೋರ್‌ವೆಲ್‌ಗಳು ನೀರಿಲ್ಲದೇ ಒಣಗಿ ಬರಿದಾಗಿವೆ’ ಎನ್ನುತ್ತಾರೆ ಹೊರ್ತಿಯ ಮಲ್ಲಪ್ಪ ಮ.ದೇಗಿನಾಳ.