ಶಹಾಪುರ: ₹4.84 ಕೋಟಿ ವೆಚ್ಚ ಕೆರೆಗೆ ನೀರು ತುಂಬಿಸುವ ಯೋಜನೆ

ಕಂದಾಯ ದಾಖಲೆಗಳ ಪ್ರಕಾರ ನಾಗರ ಕೆರೆ 12.5 ಎಕರೆಯಷ್ಟು ಇದ್ದರೆ, ಮಾವಿನ ಕೆರೆ ಸುಮಾರು 6 ಎಕರೆಯಷ್ಟು ಪ್ರದೇಶವಿದೆ. ಈ ಕೆರೆಗಳನ್ನು ನಿಜಾಮರ ಆಳ್ವಿಕೆಯಲ್ಲಿ ನಿರ್ಮಿಸಲಾಗಿತ್ತು. ಬೆಟ್ಟದ ಇಳಿಜಾರು ಪ್ರದೇಶದಲ್ಲಿ ಬೀಳುವ ಮಳೆಯ ನೀರು ನೇರವಾಗಿ ಕೆರೆಗೆ ಸಂಗ್ರಹಿಸುವ ಉದ್ದೇಶದಿಂದ ಪ್ರತ್ಯೇಕವಗಿ ಎರಡು ಕೆರೆಗಳನ್ನು ನಿರ್ಮಿಸಿದ್ದರು. ಇದೇ ನೀರನ್ನು ಅಂದು ಕೃಷಿ ಚಟುವಟಿಕೆಗೆ ಬಳಿಸಲಾಗುತ್ತಿತ್ತು.

ಆದರೆ ಸದ್ಯ ಒತ್ತುವರಿಯಿಂದಾಗಿ ಕೆರೆಗಳು ತಮ್ಮ ಮೂಲ ಸ್ವರೂಪವನ್ನು ಕಳೆದುಕೊಂಡಿವೆ. ಕೆರೆಗಳ ಅಂಗಳದಲ್ಲಿ ವಸತಿ ಕಟ್ಟಡಗಳು, ಮನೆಗಳು ನಿರ್ಮಾಣವಾಗುವ ಮೂಲಕ ಕೆರೆ ಒತ್ತುವರಿಯಾಗಿದೆ. ನಾಗರ ಕೆರೆಯಲ್ಲಿ ಬಯಲು ರಂಗ ಮಂದಿರ ನಿರ್ಮಿಸಲಾಗಿದೆ. ಅಲ್ಲದೆ ಮಾವಿನ ಕೆರೆಯ ಸುತ್ತಮುತ್ತಲಿನ ಪ್ರದೇಶದಲ್ಲಿ ಒತ್ತುವರಿ ಮಾಡಿಕೊಂಡು ಕೆಲ ವ್ಯಕ್ತಿಗಳು ಸ್ವಂತಕ್ಕೆ ಉಪಯೋಗಿಸುತ್ತಿದ್ದಾರೆ ಎಂಬ ದೂರು ಇದೆ.

ಹೀಗಾಗಿ ಕೆರೆಗೆ ನೀರು ತುಂಬಿಸುವ ಯೋಜನೆ ಈ ಭಾಗದ ಜನರಲ್ಲಿ ಸಂತಸವನ್ನುಂಟು ಮಾಡಿದ್ದರೆ, ಕೆರೆ ಒತ್ತುವರಿಯಾಗಿರುವುದು ಚಿಂತೆಯನ್ನು ಹೆಚ್ಚಿಸಿದೆ. ಹೀಗಾಗಿ ಕೆರೆ ತುಂಬಿಸುವ ಮೊದಲು ಒತ್ತುವರಿ ಪ್ರದೇಶವನ್ನು ತೆರವುಗೊಳಿಸಿ, ನೀರು ಸಂಗ್ರಹಿಸಬೇಕು ಎಂದು ನಗರದ ನಿವಾಸಿಗಳು ಒತ್ತಾಯಿಸಿದ್ದಾರೆ.

ಕೆರೆ ಜಾಗ ಒತ್ತುವರಿಯಾಗಿರುವುದು ಕಣ್ಣಿಗೆ ಕಾಣುತ್ತದೆ. ಭೂ ಮಾಪನ ಇಲಾಖೆಯವರು ಕೆರೆಯ ವಿಸ್ತೀರ್ಣವನ್ನು ಸರ್ವೆ ಮಾಡಿ, ಗಡಿಗಳನ್ನು ಗುರುತಿಸಿ, ಕೆರೆ ಒತ್ತುವರಿಯಾಗಿದ್ದರೆ ತೆರವುಗೊಳಿಸಬೇಕು. ಇದರಿಂದ ಕೆರೆಯಂಗಳದ ಹೆಚ್ಚಿನ ಜಾಗದಲ್ಲಿ ನೀರು ಸಂಗ್ರಹವಾಗಿಸಲು ಅನುಕೂಲವಾಗುತ್ತದೆ. ಅಲ್ಲದೆ ಸಾರ್ವಜನಿಕರ ಆಸ್ತಿ ಉಳಿಸಿದಂತೆ ಆಗುತ್ತದೆ. ಕೆರೆಯ ಪ್ರದೇಶದಲ್ಲಿ ಮಾಹಿತಿ ಮತ್ತು ವಿವರದ ನಾಮಫಲಕ ಅಳವಡಿಸಬೇಕು. ಅನುದಾನ ತಂದರೆ ಸಾಲದು, ಅದು ಸಮರ್ಪಕವಾಗಿ ಸದ್ಬಳಕೆಯಾಗಬೇಕು. ತಹಶೀಲ್ದಾರ್‌ ಅವರು ಇಚ್ಛಾಶಕ್ತಿಯನ್ನು ಪ್ರದರ್ಶಿಸಬೇಕು ಎನ್ನುತ್ತಾರೆ ಸಾಮಾಜಿಕ ಕಾರ್ಯಕರ್ತ ಮಾನಪ್ಪ ಹಡಪದ.

ಕಾಮಗಾರಿ 4 ತಿಂಗಳಲ್ಲಿ ಪೂರ್ಣ

ಕೃಷ್ಣಾ ಭಾಗ್ಯ ಜಲ ನಿಗಮ(ಕೆಬಿಜೆಎನ್‌ಎಲ್) ನಿಗಮದ ಅನುದಾನದಲ್ಲಿ ₹4.84 ಕೋಟಿ ವೆಚ್ಚದ ಕಾಮಗಾರಿ ಇದಾಗಿದೆ. ನಗರದ ಹಾಲಬಾವಿ ರಸ್ತೆಯ ಬಳಿಯ ಎಸ್‌ಬಿಸಿ ಕಾಲುವೆಗೆ ಅಡ್ಡವಾಗಿ ಪೈಪ್‌ಲೈನ್ ಹಾಕಿ ನೀರು ಸೆಳೆದುಕೊಂಡು ನಗರದ ನಾಗರ ಕೆರೆ ಹಾಗೂ ಮಾವಿನ ಕೆರೆಗೆ ನೀರು ತುಂಬಿಸಲಾಗುತ್ತದೆ. ಕಾಲುವೆಯಿಂದ ಕೆರೆಗೆ ನೀರು ತುಂಬಿಸುವ ದೂರ 5 ಕಿ.ಮೀ ಆಗಿದೆ. ಈಗಾಗಲೇ ಪೈಪ್ ಅಳವಡಿಸುವ ಕೆಲಸ ಸಾಗಿದೆ. ಮುಂದಿನ 4 ತಿಂಗಳಲ್ಲಿ ಕಾಮಗಾರಿ ಮುಗಿಯುವ ನಿರೀಕ್ಷೆ ಇದೆ. ಈಗ ಬೇಸಿಗೆಯಲ್ಲಿ ಕೆರೆಯ ನೀರು ಬತ್ತಿದಾಗ ಅಂತರ್ಜಲಮಟ್ಟ ಕುಸಿದು ಕೊಳವೆಬಾವಿ ಒಣಗುತ್ತಿದ್ದವು. ಅದರ ನಿವಾರಣೆಗೆ ಕೆರೆಗೆ ನೀರು ತುಂಬಿಸಲಾಗುತ್ತಿದೆ ಎಂದು ನಿಗಮದ ಎಂಜಿನಿಯರ್ ಶಿವಶಂಕರ ದೇವಾಪುರ ಹೇಳಿದ್ದಾರೆ.