ಶಹಾಪುರ: ಮಾದರಿ ಪದವಿ ಕಾಲೇಜು ಕಟ್ಟಡಕ್ಕೆ ಗ್ರಹಣ

‘ಹೌಸಿಂಗ್ ಬೋರ್ಡ್ ಮಂಡಳಿಯು ಟೆಂಡರ್ ಮೂಲಕ ಕಟ್ಟಡ ನಿರ್ಮಾಣ ಕಾಮಗಾರಿಯನ್ನು ಗುತ್ತಿಗೆದಾರರೊಬ್ಬರಿಗೆ ನೀಡಿತ್ತು. ಕಟ್ಟಡದ ಅಡಿಪಾಯ ಹಾಕುವಾಗ ಹೆಚ್ಚಿನ ವೆಚ್ಚವಾಯಿತು. ಆಗ ಗುತ್ತಿಗೆದಾರರು ₹1.50 ಕೋಟಿ ಹೆಚ್ಚುವರಿ ಅನುದಾನ ನೀಡುವಂತೆ ರೂಸಾಕ್ಕೆ ಪ್ರಸ್ತಾವ ಸಲ್ಲಿಸಿದರು. ಆದರೆ ಆ ಪ್ರಸ್ತಾವಕ್ಕೆ ಅನುಮೋದನೆ ಸಿಕ್ಕಿಲ್ಲ. ಈಗ ಸುಮಾರು ₹9 ಕೋಟಿ ವೆಚ್ಚದ ಕೆಲಸ ಮುಗಿದಿದೆ’ ಎನ್ನುತ್ತಾರೆ ಮಾದರಿ ಪದವಿ ಕಾಲೇಜಿನ ನೋಡಲ್‌ ಅಧಿಕಾರಿ ಎಸ್‌.ಎಸ್‌.ದೇಸಾಯಿ. ‘ನಿಗದಿಯಂತೆ ಎರಡು ವರ್ಷಗಳ ಹಿಂದೆಯೇ ಕಾಲೇಜು ಕಟ್ಟಡ ನಮಗೆ ಹಸ್ತಾಂತರಿಸಬೇಕಾಗಿತ್ತು. ಆದರ ಇನ್ನೂ ಹಸ್ತಾಂತರ ಆಗಿಲ್ಲ. ಇದರಿಂದ ಪ್ರತಿ ತಿಂಗಳು ₹500 ದಂಡ ವಿಧಿಸಲಾಗುತ್ತಿದೆ. ಇದರೊಂದಿಗೆ ಶುರುವಾಗಿದ್ದ ರಾಯಚೂರು ಜಿಲ್ಲೆಯಲ್ಲಿನ ಕಟ್ಟಡವು ವರ್ಷದ ಹಿಂದೆಯೇ ಅಲ್ಲಿ ಹಸ್ತಾಂತರವಾಗಿದೆ’ ಎಂದು ಅವರು ಹೇಳಿದರು. 28 ವಿದ್ಯಾರ್ಥಿಗಳ ಪ್ರವೇಶ: ‘2022-23ನೇ ಶೈಕ್ಷಣಿಕ ವರ್ಷದಲ್ಲಿ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿಗೆ ಹೊಂದಿಕೊಂಡಿರುವ ಪಿ.ಜಿ ಕೇಂದ್ರದಲ್ಲಿ ತಾತ್ಕಾಲಿಕವಾಗಿ ವ್ಯವಸ್ಥೆ ಮಾಡಲಾಗಿದೆ. ಬಿ.ಎ ಕೋರ್ಸ್‌ಗೆ 16 ಹಾಗೂ ಬಿ.ಸಿ.ಎ ಕೋರ್ಸ್‌ಗೆ 12 ವಿದ್ಯಾರ್ಥಿಗಳು ಸೇರಿದಂತೆ ಒಟ್ಟು 28 ವಿದ್ಯಾರ್ಥಿಗಳು ಪ್ರವೇಶ ಪಡೆದಿದ್ದಾರೆ. ಆರು ಅತಿಥಿ ಉಪನ್ಯಾಸಕರು ಬೋಧನೆಯನ್ನು ನಿರ್ವಹಿಸುತ್ತಿದ್ದಾರೆ ಎಂದು ಎಸ್.ಎಸ್.ದೇಸಾಯಿ ವಿವರಿಸಿದರು.