ಸರ್ಕಾರಿ ಶಾಲೆಗಳ ಬಲವರ್ಧನೆಗೆ ‘ಬ್ರಿಕ್‌ವರ್ಕ್‌’

ಉತ್ತರಕನ್ನಡ: ಮೂಲಸೌಕರ್ಯಗಳು ಇಲ್ಲದೆ ದುಸ್ಥಿತಿಯಲ್ಲಿರುವ ಸರ್ಕಾರಿ ಶಾಲೆಗಳ ಬಲವರ್ಧನೆಗೆ ಬ್ರಿಕ್‌ವರ್ಕ್ ಫೌಂಡೇಷನ್ ಶ್ರಮಿಸುತ್ತಿದೆ.

ಶಿಕ್ಷಣ ಕ್ಷೇತ್ರದ ಸುಧಾರಣೆಗೆ ಶ್ರಮಿಸುತ್ತಿರುವ ಈ ಪ್ರತಿಷ್ಠಾನ, ಉತ್ತರಕನ್ನಡ ಜಿಲ್ಲೆಯ ಭಟ್ಕಳ ತಾಲ್ಲೂಕಿನ ಕೆಲವು ಸರ್ಕಾರಿ ಶಾಲೆಗಳನ್ನು ದತ್ತು ಪಡೆದು ಅಭಿವೃದ್ಧಿಪಡಿಸುತ್ತಿದೆ. ಇಷ್ಟಕ್ಕೆ ಸೀಮಿತವಾಗದೆ, ಶೈಕ್ಷಣಿಕ ಗುಣಮಟ್ಟ ಸುಧಾರಣೆಯತ್ತ ಚಿತ್ತ ಹರಿಸಿದೆ. ಅಧ್ಯಯನಕ್ಕೆ ನೆರವಾಗುವ ಹಲವು ಪಾಠೋಪಕರಣ ಒದಗಿಸುತ್ತಿದೆ. ಈ ಶಾಲೆಗಳನ್ನು ಪ್ರತಿಷ್ಠಾನ  ಮೂರು ವರ್ಷಗಳವರೆಗೆ 
ಅಭಿವೃದ್ಧಿಪಡಿಸಲಿದೆ. 

‘ಸರ್ಕಾರಿ ಶಾಲೆಗಳ ಅಭಿವೃದ್ಧಿಗೆ ಖಾಸಗಿ ಸಂಸ್ಥೆಗಳು ಕೈಜೋಡಿಸಬೇಕಾದ ಅನಿವಾರ್ಯತೆ ಇದೆ. ಖಾಸಗಿ ಶಾಲೆಗಳಮಾದರಿಯಲ್ಲಿಯೇ ಅಭಿವೃದ್ಧಿಪಡಿಸಿ ಪೋಷಕರಲ್ಲಿ ಸರ್ಕಾರಿ ಶಾಲೆಯ ಬಗ್ಗೆ ಒಳ್ಳೆಯ ಅಭಿಪ್ರಾಯ ಮೂಡಿಸಬೇಕು’ ಎಂಬುದು ಬ್ರಿಕ್ ವರ್ಕ್ ಫೌಂಢೇಷನ್‌ನ ಅಧ್ಯಕ್ಷೆ ಸಂಗೀತ ಕುಲಕರ್ಣಿ ಅವರ ಯೋಚನೆ. 

ಈ ಪ್ರತಿಷ್ಠಾನವು ‘ಸ್ವಚ್ಛ ಶಾಲೆ’ ಅಭಿಯಾನ  ಆರಂಭಿಸಿ ಈ ಮೂಲಕ, ಮುರಿದ ಪೀಠೋಪಕರಣ, ಬಿರುಕುಬಿಟ್ಟ ಗೋಡೆಗಳು, ತಾರಸಿಯನ್ನು ದುರಸ್ತಿಗೊಳಿಸಿ ಸುಂದರ ರೂಪ ನೀಡುತ್ತಿದೆ.

ಶೌಚಾಲಯ ನಿರ್ಮಾಣ ಅಥವಾ ನವೀಕರಣ, ಆವರಣವನ್ನು ಸುಂದರಗೊಳಿಸುವುದು, ಸುಸಜ್ಜಿತ ಕಾಂಪೌಂಡ್ ನಿರ್ಮಿಸುವುದು ಕೂಡ ಈ ಅಭಿಯಾನದ ಭಾಗವಾಗಿವೆ.

ದತ್ತು ಪಡೆದ ಶಾಲೆಗಳಲ್ಲಿ  ವಿಜ್ಞಾನ ಮತ್ತು ಗಣಿತ ಪ್ರಯೋಗಾಲಯಗಳನ್ನು ಸುಸಜ್ಜಿತವಾಗಿ ನಿರ್ಮಿಸಲಾಗುತ್ತಿದೆ.  ಮಕ್ಕಳ ಓದಿಗೆ ಅನುಕೂಲವಾಗಲೆಂದು ಕನ್ನಡ ಮತ್ತು ಇಂಗ್ಲಿಷ್‌ ಪುಸ್ತಕಗಳನ್ನೊಳಗೊಂಡ ಗ್ರಂಥಾಲಯವು ರೂಪುಗೊಳ್ಳುತ್ತಿದೆ. ಈ ಶಾಲೆಗಳನ್ನಷ್ಟೆ ಅಲ್ಲದೇ,  ಭಟ್ಕಳ ತಾಲ್ಲೂಕಿನ ಸರ್ಕಾರಿ ಅನುದಾನಿತ ಜನತಾ ವಿದ್ಯಾಲಯದ ಪ್ರೌಢಶಾಲೆಯನ್ನೂ ದತ್ತು ಪಡೆಯಲಾಗಿದ್ದು,  ಮುಂದಿನ ದಿನಗಳಲ್ಲಿ ಇನ್ನಷ್ಟು ಶಾಲೆಗಳನ್ನು ದತ್ತು ಪಡೆಯುವ ಇರಾದೆ ಇದೆ. 

* ಯೋಗ, ವ್ಯಕ್ತಿತ್ವ ಅಭಿವೃದ್ಧಿ, ಕ್ರೀಡಾ ಚಟುವಟಿಕೆಗಳಿಗೂ ಒತ್ತು ನೀಡುತ್ತಿರುವುದರಿಂದ ಈ ಶಾಲೆಗಳಲ್ಲಿ ದಾಖಲಾತಿಗೆ ಪೈಪೋಟಿ ಹೆಚ್ಚಾಗುತ್ತಿದೆ.

ಅಜಯನ್