ನಟ ಅಂಬರೀಶ್‌ ಜನ್ಮದಿನ; ಸಮಾಧಿಗೆ ಪೂಜೆ

ಅಂಬರೀಶ್‌ ಅವರ 72ನೇ ಜನ್ಮದಿನದ ಅಂಗವಾಗಿ ಸಮಾಧಿ ಮುಂದೆ ಅಂಬರೀಶ್‌ ಅವರಿಗೆ ಪ್ರಿಯವಾಗಿದ್ದ ಖಾದ್ಯಗಳನ್ನು ಇಟ್ಟು ಕುಟುಂಬದ ಸದಸ್ಯರು ಪುಷ್ಪನಮನ ಸಲ್ಲಿಸಿದರು. ಸಾವಿರಾರು ಅಭಿಮಾನಿಗಳು ಸಮಾಧಿಗೆ ಭೇಟಿ ನೀಡಿ ನಮನ ಸಲ್ಲಿಸಿದರು. ಸ್ಥಳದಲ್ಲಿ ಅಭಿಮಾನಿಗಳಿಗೆ ಅನ್ನದಾನವನ್ನೂ ಏರ್ಪಡಿಸಲಾಗಿತ್ತು.    

ಈ ವೇಳೆ ಮಾತನಾಡಿದ ಸುಮಲತಾ ಅಂಬರೀಶ್‌, ‘ಅಂಬರೀಶ್‌ ನಮ್ಮನ್ನು ಅಗಲಿ ಆರು ವರ್ಷ ಉರುಳಿದೆ. ಆದರೂ ನಮ್ಮ ಮನಸ್ಸಿನಲ್ಲಿ, ಪ್ರೀತಿಸುವ ಅಭಿಮಾನಿಗಳ ಮನದಲ್ಲಿ ಶಾಶ್ವತವಾಗಿ ಇನ್ನೂ ಇದ್ದಾರೆ. ಆ ಪ್ರೀತಿಯಲ್ಲೇ ಅಂಬರೀಶ್‌ ಅವರನ್ನು ಕಾಣುತ್ತೇನೆ. ಅಂಬರೀಶ್‌ ಅವರು ಆಹಾರ ಪ್ರಿಯ. ಅವರಿಗೆ ಇಷ್ಟವಾದ ತಿಂಡಿ–ತಿನಿಸುಗಳನ್ನು ಜನ್ಮದಿನದಂದು ಮಾಡುತ್ತಿದ್ದೆವು. ಇದೀಗ ಅವುಗಳನ್ನು ಸಮಾಧಿ ಮುಂದೆ ಎಡೆ ಇಟ್ಟಿದ್ದೇವೆ’ ಎಂದರು.