ವಿಜಯನಗರ ಜಿಲ್ಲೆಯ ಲಂಬಾಣಿ ತಾಂಡಾಗಳಲ್ಲಿ ‘ದವಾಳಿ’ ಹೆಸರಿನಲ್ಲಿ ದೀಪಾವಳಿಯನ್ನು ಸುಗ್ಗಿಯ ಹಬ್ಬವಾಗಿ ಆಚರಿಸಲಾಗುತ್ತದೆ. ತಾಂಡಾದ ಎಲ್ಲ ಮನೆತನದ ಯುವತಿಯರು ಅಮಾವಾಸ್ಯೆ ದಿನ ರಾತ್ರಿ ಮನೆ ಮನೆಗೆ ತೆರಳಿ ಹರಳೆಣ್ಣೆಯ ದೀಪದ ಆರತಿ ಬೆಳಗುತ್ತಾ, ‘ವರ್ಷೆದಾಡ್ ಕೋಡ್ ಧವಾಳಿ ಬಾಯ್ತೋನೊ ಮೇರಾ, ಬಿಯಾತೋನೊ ಮೇರಾ ’ (ಕತ್ತಲೆ ತೊರೆದು ಬೆಳಕು ಆವರಿಸಲಿ, ಎಲ್ಲರಿಗೂ ಒಳ್ಳೆಯದಾಗಲಿ) ಎಂದು ಶುಭ ಕೋರುತ್ತಾರೆ. ಮರು ದಿನ ಎಲ್ಲ ಮಹಿಳೆಯರು ಕಾಡಿಗೆ ತೆರಳಿ ವಲ್ಲೇಣಾರ ಫೂಲ್ (ವಲ್ಲೇಣ ಹೂವು), ಗರಿಕೆ ಆಯ್ದು ಬುಟ್ಟಿಯಲ್ಲಿ ತರುತ್ತಾರೆ. ಕೆಲವರು ಬೆಳಗಾಗುತ್ತಲೇ ಮನೆಯ ಹಿರಿಯರ ಹಬ್ಬವನ್ನು ಆಚರಿಸಲು ಸಾಮೂಹಿಕವಾಗಿ ನದಿಯ ದಂಡೆಗೆ ತೆರಳುತ್ತಾರೆ. ಅಲ್ಲಿ ವಿವಾಹ ನಿಶ್ಚಿತಾರ್ಥವಾಗಿರುವ ಎಲ್ಲ ಯುವತಿಯರು ಪರಸ್ಪರ ಅಪ್ಪಿಕೊಂಡು ಅಳುತ್ತಾರೆ. ಮುಂದಿನ ಹಬ್ಬಕ್ಕೆ ನಾವಿರುವುದಿಲ್ಲ ಎಂದು ತಮ್ಮ ಸ್ನೇಹವನ್ನು ಮೆಲುಕು ಹಾಕುತ್ತಾರೆ.

ಉಡುಪಿ ಜಿಲ್ಲೆಯ ಕಾಪು, ಪಡುಬಿದ್ರಿ ಮೊದಲಾದೆಡೆ ಮುಳ್ಳಮುಟ್ಟೆ ಎಂಬ ವಿಶಿಷ್ಟವಾದ ಆಚರಣೆ ನಡೆಯುತ್ತದೆ. ಊರಿನ ಮುಳ್ಳುಕಂಟಿ, ಕಸ ಮೊದಲಾದವುಗಳನ್ನು ಕಡಿದು ಎತ್ತರದ ಪ್ರದೇಶದಲ್ಲಿ ರಾಶಿ ಹಾಕಲಾಗುತ್ತದೆ. ದೀಪಾವಳಿಯಂದು ಮುಂಜಾನೆ ಡೋಲು, ವಾದ್ಯಗಳೊಂದಿಗೆ ಊರಿನ ಜನರು ಸಾಮೂಹಿಕವಾಗಿ ಈ ಮುಳ್ಳಮುಟ್ಟೆಗೆ ಬೆಂಕಿ ಹಚ್ಚುತ್ತಾರೆ. ಮುಳ್ಳಮುಟ್ಟೆಗೆ ಬೆಂಕಿ ನೀಡುವುದಕ್ಕೂ ಮೊದಲು ರಾತ್ರಿ ಜಾಗರಣೆ ನಡೆಸಬೇಕಾದ ಕಾರಣ ವಿವಿಧ ಮನೋರಂಜನೆ ಕಾರ್ಯಕ್ರಮಗಳನ್ನೂ ಊರಿನ ಜನರಿಗಾಗಿ ಹಮ್ಮಿಕೊಳ್ಳಲಾಗುತ್ತದೆ. ಕೆಲವೆಡೆ ಬಂಟ ದೈವದ ಕೋಲವೂ ನಡೆಯುತ್ತದೆ.