ಪುಟ್ಟ ವಿಮಾನ ನಿಲ್ದಾಣದ ವಿಸ್ತರಣೆ ಯಾವಾಗ?

ಲಕ್ಷದ್ವೀಪದಲ್ಲಿ ಪ್ರವಾಸೋದ್ಯಮವು ಬೆಳೆಯದೇ ಇರಲು ಬಹುದೊಡ್ಡ ತೊಡಕು ಸಾರಿಗೆ ಸಂಪರ್ಕ. ದಿನಸಿ ವಸ್ತುಗಳಿಗೂ ಕೇರಳವನ್ನು ಅವಲಂಬಿಸಿರುವ ದ್ವೀಪ ಸಮೂಹವಿದು. ಕೇರಳದ ಕಡಲ ತೀರದಿಂದ 250–300 ಕಿ.ಮೀ. ದೂರದವರೆಗೆ ಈ ದ್ವೀಪಗಳು ಹರಡಿಕೊಂಡಿವೆ. ಕೆಲವು ದ್ವೀಪಗಳ ನಡುವಣ ಅಂತರವೇ 50 ಕಿ.ಮೀ. ದಾಟುತ್ತದೆ. ಹಡಗು ಮತ್ತು ದೋಣಿಗಳ ಮೂಲಕ ಸಂಪರ್ಕ ಸಾಧ್ಯವಿದೆಯಾದರೂ, ಪ್ರವಾಸಿಗರನ್ನು ದೊಡ್ಡಮಟ್ಟದಲ್ಲಿ ಸೆಳೆಯಲು ಅದು ಸಾಕಾಗದು. ಕೊಚ್ಚಿಯಿಂದ ಲಕ್ಷದ್ವೀಪಕ್ಕೆ ವಿಮಾನಯಾನ ಸೇವೆ ಚಾಲ್ತಿಯಲ್ಲಿದೆ. ಅದು ಯಾವುದಕ್ಕೂ ಸಾಲದು ಎನ್ನುತ್ತದೆ ಪ್ರವಾಸೋದ್ಯಮ ಸಚಿವಾಲಯದ ತಜ್ಞರ ಸಮಿತಿಯ ವರದಿ. ದೊಡ್ಡ ವಿಮಾನ ನಿಲ್ದಾಣ ಅಭಿವೃದ್ಧಿಗೆ ಲಕ್ಷದ್ವೀಪದ ಆಡಳಿತವು ಕೇಂದ್ರ ಸರ್ಕಾರಕ್ಕೆ ಪ್ರಸ್ತಾವ ಸಲ್ಲಿಸುತ್ತಲೇ ಬಂದಿದೆ. ಆದರೆ ಕೇಂದ್ರ ಸರ್ಕಾರವು ಅದಕ್ಕೆ ಸಕಾರಾತ್ಮಕವಾಗಿ ಸ್ಪಂದಿಸಿಲ್ಲ.

ಲಕ್ಷದ್ವೀಪ ಸಮೂಹದ ಅಗತ್ತಿ ದ್ವೀಪದಲ್ಲಿ ಸಣ್ಣ ವಿಮಾನ ನಿಲ್ದಾಣವಿದೆ. 1,100 ಮೀಟರ್ ಉದ್ದ ಮತ್ತು ಕೇವಲ 30 ಮೀಟರ್‌ ಅಗಲವಿರುವ ರನ್‌ವೇಯಲ್ಲಿ ದೊಡ್ಡ ವಿಮಾನಗಳನ್ನು ಇಳಿಸಲು ಸಾಧ್ಯವಿಲ್ಲ. ಈ ವಿಮಾನ ನಿಲ್ದಾಣದಲ್ಲಿ ರಾತ್ರಿ ವೇಳೆ ಲ್ಯಾಂಡಿಂಗ್‌ಗೆ ಅವಕಾಶವಿಲ್ಲ.

ಗೋವಾ, ಮುಂಬೈನಂತಹ ದೂರದ ನಗರಗಳಿಂದ ಅಗತ್ತಿ ವಿಮಾನ ನಿಲ್ದಾಣಕ್ಕೆ ಸಣ್ಣ ವಿಮಾನಗಳನ್ನು ಹಾರಾಟ ನಡೆಸಲು ಸಾಧ್ಯವಿಲ್ಲ. ಅವುಗಳ ಹಾರಾಟದ ವ್ಯಾಪ್ತಿ ಕಡಿಮೆ ಇರುವುದೇ ಇದಕ್ಕೆ ಕಾರಣ. ಹಾಗೆಂದು ದೊಡ್ಡ ವಿಮಾನಗಳನ್ನು ಇಳಿಸುವಷ್ಟು ದೊಡ್ಡ ರನ್‌ವೇ ಅಗತ್ತಿಯಲ್ಲಿ ಇಲ್ಲ. ಅಗತ್ಯವಿದ್ದರೂ, ಈ ದ್ವೀಪದ ಹೆಚ್ಚು ವಿಸ್ತಾರವಾಗಿರುವ ಪ್ರದೇಶದಲ್ಲಿ ದೊಡ್ಡ ರನ್‌ವೇ ನಿರ್ಮಿಸುವ ಪ್ರಸ್ತಾವಕ್ಕೆ ಕೇಂದ್ರ ಸರ್ಕಾರವು ಆಸಕ್ತಿ ತೋರಿಸಿಯೇ ಇಲ್ಲ.

2019ರ ಡಿಸೆಂಬರ್‌ನಲ್ಲಿ ಲಕ್ಷದ್ವೀಪ ಸಂಸದ ಮೊಹಮ್ಮದ್ ಫೈಜಲ್‌ ಈ ಬಗ್ಗೆ ಲೋಕಸಭೆಯಲ್ಲಿ ಮಾಹಿತಿ ಕೇಳಿದ್ದರು. ಅವರ ಪ್ರಶ್ನೆಗೆ ಉತ್ತರಿಸಿದ್ದ ನಾಗರಿಕ ವಿಮಾನಯಾನ ಸಚಿವಾಲಯವು, ‘ಅಗತ್ತಿ ವಿಮಾನ ನಿಲ್ದಾಣವನ್ನು ಅಭಿವೃದ್ಧಿಪಡಿಸುವ ಯಾವುದೇ ಪ್ರಸ್ತಾವ ಸರ್ಕಾರದ ಮುಂದೆ ಇಲ್ಲ. ರನ್‌ವೇ ಅಕ್ಕಪಕ್ಕ ಅಗತ್ಯವಿರುವಷ್ಟು ಜಾಗ ಇಲ್ಲದೇ ಇರುವುದರಿಂದ ರಾತ್ರಿ ಲ್ಯಾಂಡಿಂಗ್‌ಗೆ ಅನುಕೂಲವಾಗುವಂತೆ ರನ್‌ವೇಯನ್ನು ಮೇಲ್ದರ್ಜೆಗೆ ಏರಿಸಲು ಸಾಧ್ಯವಿಲ್ಲ’ ಎಂದು ವಿವರಿಸಿತ್ತು.

ಲಕ್ಷದ್ವೀಪದಲ್ಲಿ ಪ್ರವಾಸೋದ್ಯಮ ಅಭಿವೃದ್ಧಿಗೆ ಸಂಬಂಧಿಸಿದ ಸವಾಲುಗಳು ಮತ್ತು ಸಾಧ್ಯತೆಗಳ ಕುರಿತು ಪ್ರವಾಸೋದ್ಯಮ ಸಚಿವಾಲಯವು ವರದಿಯೊಂದನ್ನು ಸಿದ್ಧಪಡಿಸಿತ್ತು. 2023ರ ಮಾರ್ಚ್‌ನಲ್ಲಿ ಲೋಕಸಭೆಗೆ ಆ ವರದಿಯನ್ನು ಸಲ್ಲಿಸಲಾಗಿತ್ತು. ‘ಅಗತ್ತಿ ವಿಮಾನ ನಿಲ್ದಾಣವನ್ನು ಮೇಲ್ದರ್ಜೆಗೆ ಏರಿಸುವುದು ಕಷ್ಟಸಾಧ್ಯ. ಅಂತಹ ಕಾಮಗಾರಿಯನ್ನು ಕೈಗೊಂಡರೂ ಕಾಮಗಾರಿಯ ವೆಚ್ಚಕ್ಕೆ ಹೋಲಿಸಿದರೆ, ಅಲ್ಲಿಂದ ಬರುವ ಆದಾಯ ತೀರಾ ಕಡಿಮೆ. ಹೀಗಾಗಿ ವಿಮಾನ ನಿಲ್ದಾಣವನ್ನು ಮೇಲ್ದರ್ಜೆಗೆ ಏರಿಸುವುದು ಕಾರ್ಯಸಾಧುವಲ್ಲ’ ಎಂದು ಹೇಳಿತ್ತು. ಇದು ವಿಮಾನ ನಿಲ್ದಾಣವನ್ನು ಮೇಲ್ದರ್ಜೆಗೆ ಏರಿಸುವ ಪ್ರಸ್ತಾವ ನನೆಗುದಿಗೆ ಬೀಳಲು ಪ್ರಮುಖ ಕಾರಣ.

ಲಕ್ಷದ್ವೀಪ ಸಮೂಹದಲ್ಲೇ ದೊಡ್ಡ ದ್ವೀಪಗಳಲ್ಲಿ ಒಂದಾದ ಮಿನಿಕೊಯ್‌ ದ್ವೀಪದಲ್ಲಿ ದೊಡ್ಡ ವಿಮಾನ ನಿಲ್ದಾಣ ಅಭಿವೃದ್ಧಿಪಡಿಸುವ ಪ್ರಸ್ತಾವ ಸರ್ಕಾರದ ಮುಂದೆ ಇದೆ ಎಂದು ವರದಿಯಲ್ಲಿ ಹೇಳಲಾಗಿತ್ತು. ರಕ್ಷಣಾ ಸಚಿವಾಲಯವು ವಿಮಾನ ನಿಲ್ದಾಣವನ್ನು ಅಭಿವೃದ್ಧಿಪಡಿಸುವುದು ಮತ್ತು ನಾಗರಿಕ ವಿಮಾನಗಳ ಕಾರ್ಯಾಚರಣೆಗೂ ಅವಕಾಶ ಕೊಡುವುದಕ್ಕೆ 2022ರಲ್ಲೇ ತಾತ್ವಿಕ ಒಪ್ಪಿಗೆ ನೀಡಲಾಗಿದೆ ಎಂದು ವರದಿಯಲ್ಲಿ ವಿವರಿಸಲಾಗಿದೆ. ಪ್ರಸ್ತಾವ ಈಗ ಯಾವ ಹಂತದಲ್ಲಿ ಇದೆ ಎಂಬ ಮಾಹಿತಿ ಇಲ್ಲ.

ಈಗ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿರುವ ಬಾಯ್ಕಾಟ್‌ ಮಾಲ್ಡೀವ್ಸ್‌ ಅಭಿಯಾನದ ಭಾಗವಾಗಿ ದೊಡ್ಡಮಟ್ಟದಲ್ಲಿ ಪ್ರವಾಸಿಗರು ಲಕ್ಷದ್ವೀಪಕ್ಕೆ ಹೊರಟರೆ, ವಿಮಾನ ಸಂಪರ್ಕದ ಕೊರತೆ ತೀವ್ರವಾಗಿ ಕಾಡಲಿದೆ.

ರಹದಾರಿ ಇದ್ದರಷ್ಟೇ ಪ್ರವೇಶ

ಲಕ್ಷದ್ವೀಪದ ದ್ವೀಪಗಳು ಸಂರಕ್ಷಿತ ಪ್ರದೇಶಗಳಾಗಿರುವ ಕಾರಣ, ಅಲ್ಲಿನ ನಿವಾಸಿಗಳನ್ನು ಹೊರತುಪಡಿಸಿ ಬೇರೆ ಯಾರೂ ನೇರವಾಗಿ ಅಲ್ಲಿಗೆ ಕಾಲಿಡುವಂತಿಲ್ಲ. ಅತ್ಯಂತ ಸೂಕ್ಷ್ಮವಾದ ಹವಳದ ದಂಡೆಗಳು, ಅಲ್ಲಿಗೇ ಸೀಮಿತವಾದ ಜೀವವೈವಿಧ್ಯ ಮತ್ತು ಅಲ್ಲಿನ ಮೂಲನಿವಾಸಿ ಬುಡಕಟ್ಟು ಜನರ (ಆಧುನಿಕ ಜೀವನವನ್ನು ನಡೆಸುತ್ತಿದ್ದರೂ ಜನಾಂಗೀಯ, ಸಾಂಸ್ಕೃತಿಕ ಕಾರಣಕ್ಕೆ ಇವರನ್ನು ಬುಡಕಟ್ಟು ಜನರು ಎಂದು ವರ್ಗೀಕರಿಸಲಾಗಿದೆ) ಕಾರಣಕ್ಕೆ ಇಂತಹ ನಿರ್ಬಂಧ ಜಾರಿಯಲ್ಲಿದೆ. 

ಭಾರತದ್ದೇ ಬೇರೆ ಭಾಗದ ನಿವಾಸಿಗಳು ಲಕ್ಷದ್ವೀಪಕ್ಕೆ ಹೋಗುವ ಮುನ್ನ ಅಲ್ಲಿನ ಆಡಳಿತಾಂಗದಿಂದ ರಹದಾರಿ ಪಡೆಯಬೇಕು. ರಹದಾರಿ ಇದ್ದವರಿಗಷ್ಟೇ ಅಲ್ಲಿಗೆ ಪ್ರವೇಶ. ರಹದಾರಿಯಲ್ಲಿ ನಮೂದಿಸಿರುವ ಅವಧಿಗಷ್ಟೇ ಅವರು ಆ ದ್ವೀಪಗಳಲ್ಲಿ ಇರಬೇಕು. ಯಾವ ದ್ವೀಪಕ್ಕೆ ರಹದಾರಿ ಪಡೆಯಲಾಗಿದೆಯೋ ಅದಕ್ಕಷ್ಟೇ ಭೇಟಿ ನೀಡಬೇಕು. ಅದನ್ನು ಉಲ್ಲಂಘಿಸುವುದು ಶಿಕ್ಷಾರ್ಹ ಅಪರಾಧ.

ಲಕ್ಷದ್ವೀಪ ಸಮೂಹದಲ್ಲಿ 36 ದ್ವೀಪಗಳಿವೆ. ಆದರೆ ಎಲ್ಲದರಲ್ಲೂ ಮನುಷ್ಯರು ವಾಸಿಸುತ್ತಿಲ್ಲ. ಮನುಷ್ಯರ ಆವಾಸವಿಲ್ಲದ ಕೆಲವು ದ್ವೀಪಗಳಿಗೆ ಬೆಳಗಿನ ಹೊತ್ತು ಮಾತ್ರ ಭೇಟಿ ನೀಡಲು ರಹದಾರಿ ನೀಡಲಾಗುತ್ತದೆ. ವಿದೇಶಿ ಪ್ರವಾಸಿಗರಿಗೂ ಈ ರಹದಾರಿ ಪದ್ಧತಿ ಅನ್ವಯವಾಗುತ್ತದೆ. ಅರ್ಜಿ ಸಲ್ಲಿಸಿದ ಎಲ್ಲರಿಗೂ ರಹದಾರಿ ಸಿಕ್ಕೇಸಿಗುತ್ತದೆ ಎಂದು ಹೇಳಲು ಬರುವುದಿಲ್ಲ. ರಾಷ್ಟ್ರೀಯ ಭದ್ರತೆ, ಬುಡಕಟ್ಟು ಸಮುದಾಯಗಳ ಸಂರಕ್ಷಣೆ, ಶಾಂತಿಪಾಲನೆಯ ಕಾರಣಕ್ಕೆ ರಹದಾರಿಯನ್ನು ನಿರಾಕರಿಸಲು ಅವಕಾಶವಿದೆ.

ಆಧಾರ: ಲೋಕಸಭೆಗೆ ಕೇಂದ್ರ ಪ್ರವಾಸೋಧ್ಯಮ ಇಲಾಖೆ ನೀಡಿದ ಉತ್ತರಗಳು, ಪ್ರವಾಸೋಧ್ಯಮ ಸಾಧ್ಯತೆಗಳ ಬಗ್ಗೆ ತಜ್ಞರು ನೀಡಿದ ವರದಿಗಳು, ಮೋದಿ ಅವರ ಎಕ್ಸ್‌ ತಾಣದ ಮಾಹಿತಿ