ಉಸಿರಿನ ದುರ್ಗಂಧ ಪರಿಹಾರವೇನು?

ಈ ಸಮಸ್ಯೆ ಬಾಯಿಯ ಸ್ವಚ್ಛತೆಯ ಕಡೆ ಅಷ್ಟಾಗಿ ಲಕ್ಷ್ಯ ಕೊಡದವರಲ್ಲಿ ಉರಿಯೂತ, ದಂತ ಕುಳಿ, ವಸಡಿನ ಕಾಯಿಲೆಗೆ ಕೂಡ ಕಾರಣವಾಗುತ್ತಿದೆ ಎಂಬುದು ದಂತವೈದ್ಯರ ಅಂಬೋಣ.

‘ದೀರ್ಘಕಾಲ ಮುಖಗವಸು ಧರಿಸಿದಾಗ ಕೆಲವರಿಗೆ ಸರಾಗವಾಗಿ ಉಸಿರಾಡುವುದು ಕಷ್ಟವೆನಿಸುತ್ತದೆ. ಹೀಗಾಗಿ ಕೇವಲ ಮೂಗಿನಿಂದ ಉಸಿರಾಡುವ ಬದಲು ಬಾಯಿಯನ್ನೂ ತೆರೆದು ಉಸಿರಾಡುತ್ತಾರೆ. ಇದರಿಂದ ಅವರಿಗೆ ಹೆಚ್ಚು ಗಾಳಿ ಲಭ್ಯವಾಗಿ ತಾತ್ಕಾಲಿಕವಾಗಿ ನಿರಾಳ ಎನಿಸಬಹುದು. ಆದರೆ ಉಸಿರಿನ ದುರ್ಗಂಧಕ್ಕೂ ಇದು ಕೊಡುಗೆ ನೀಡುತ್ತಿದೆ’ ಎನ್ನುತ್ತಾರೆ ದಂತವೈದ್ಯ ಡಾ. ನೀರಜ್‌ ರಾಮನಾಥ್.

ಸಾಮಾನ್ಯವಾಗಿ ಬಾಯಿಯಲ್ಲಿ ಬ್ಯಾಕ್ಟೀರಿಯಾಗಳಿರುತ್ತವೆ. ಇದು ನಮ್ಮ ಎಂಜಲಿನ ಜೊತೆ ಸೇರಿ ಹಲ್ಲುಗಳನ್ನು ನಿರಂತರವಾಗಿ ಶುದ್ಧೀಕರಿಸುತ್ತಿರುತ್ತದೆ. ಆದರೆ ಬಾಯಿ ತೆರೆದು ಉಸಿರಾಡುವಾಗ ಲಾಲಾರಸ ಕಡಿಮೆಯಾಗಿ ಬ್ಯಾಕ್ಟೀರಿಯ ಹಲ್ಲಿಗೆ ಅಂಟಿಕೊಂಡು ದುರ್ವಾಸನೆ ಹೊರಡಿಸುತ್ತದೆ.

ಬಾಯಿ ಒಣಗಿದಾಗ ಹಲ್ಲು ಹಾಳಾಗುವುದು, ವಸಡಿನ ಕಾಯಿಲೆ ಕಾಣಿಸಿಕೊಳ್ಳುವುದು ಸಹಜ.

ಈ ಸಮಸ್ಯೆಗಳಿಗೆ ಪರಿಹಾರ ಇಲ್ಲವೇ? ಇದೆ. ಆಗಾಗ ನೀರು ಕುಡಿಯುತ್ತಿರಬೇಕು. ಇದರಿಂದ ದುರ್ಗಂಧಕ್ಕೆ ಕಾರಣವಾಗುವ ಬ್ಯಾಕ್ಟೀರಿಯಾವನ್ನು ತಡೆಯಬಹುದು. ಹಾಗೆಯೇ ಆದಷ್ಟು ಮೂಗಿನ ಮೂಲಕವೇ ಉಸಿರಾಡಿ. ಬಾಯಿ ತೆರೆದುಕೊಂಡಿರುವುದನ್ನು ಕಡಿಮೆ ಮಾಡಿ ಎಂದು ಸಲಹೆ ನೀಡುತ್ತಾರೆ ತಜ್ಞರು.