WPL: 2ನೇ ಬಾರಿ ಚಾಂಪಿಯನ್ ಪಟ್ಟಕ್ಕೇರಿದ RCB; 4ನೇ ಸಲವೂ ಮುಗ್ಗರಿಸಿದ ಡೆಲ್ಲಿ

ವಡೋದರ : ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವನಿತೆಯರ ಬಳಗವು ಮಹಿಳೆಯರ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯಲ್ಲಿ ಎರಡನೇ ಬಾರಿ ಚಾಂಪಿಯನ್ ಪಟ್ಟಕ್ಕೇರಿತು. ಆದರೆ, ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಸತತ ನಾಲ್ಕನೇ ಬಾರಿಯೂ ಪ್ರಶಸ್ತಿ ಸುತ್ತಿನಲ್ಲಿ ನಿರಾಸೆ ಅನುಭವಿಸಿತು.

ಕೋತಂಬಿ ಕ್ರೀಡಾಂಗಣದಲ್ಲಿ ಗುರುವಾರ ನಡೆದ ಫೈನಲ್ ಪಂದ್ಯದಲ್ಲಿ ಸ್ಮೃತಿ ಮಂದಾನ (87; 41ಎ) ಮತ್ತು ಜಾರ್ಜಿಯಾ ವೋಲ್ (79; 54ಎ) ಅವರ ಆರ್ಭಟದಿಂದ ಆರ್ಸಿಬಿ 6 ವಿಕೆಟ್ಗಳ ರೋಚಕ ಜಯ ಸಾಧಿಸಿತು.

ನಾಲ್ಕು ವರ್ಷಗಳಿಂದ ನಡೆಯುತ್ತಿರುವ ಈ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್ ಎರಡು ಬಾರಿ ಚಾಂಪಿಯನ್ ಆಗಿದೆ. ಆರ್ಸಿಬಿ ಆ ದಾಖಲೆಯನ್ನು ಸರಿಗಟ್ಟಿದೆ. ಆದರೆ ಡೆಲ್ಲಿ ತಂಡಕ್ಕೆ ಈ ಬಾರಿಯೂ ಅದೃಷ್ಟ ಒಲಿಯಲಿಲ್ಲ!

ಒಟ್ಟಾರೆ ಆರ್ಸಿಬಿ ಫ್ರ್ಯಾಂಚೈಸಿಯು ಸತತ ಮೂರು ವರ್ಷಗಳಿಂದ ಪ್ರಶಸ್ತಿ ಜಯಿಸಿ ದಂತಾಗಿದೆ. 2024ರಲ್ಲಿ ಆರ್ಸಿಬಿ ಮಹಿಳೆಯರು ಮತ್ತು 2025ರಲ್ಲಿ ಪುರುಷರ ತಂಡವು ಐಪಿಎಲ್ನಲ್ಲಿ ಪ್ರಶಸ್ತಿ ಗೆದ್ದಿತ್ತು. ಈ ಬಾರಿ ಮತ್ತೆ ವನಿತೆಯರು ದಾಖಲೆ ಬರೆದರು. ಹೋದ ವರ್ಷ ಭಾರತ ತಂಡವು ಏಕದಿನ ವಿಶ್ವಕಪ್ ಜಯಿಸಿದ್ದ ಸಂದರ್ಭದಲ್ಲಿ ಸ್ಮೃತಿ ಮಂದಾನ ಉಪನಾಯಕಿಯಾಗಿದ್ದರು.

ಡೆಲ್ಲಿ ತಂಡವು ಈ ಸಲ ತನ್ನ ಸಾಮರ್ಥ್ಯವನ್ನು ಪೂರ್ಣ ಪಣಕ್ಕಿಟ್ಟು ಹೋರಾಡಿತು. ಅದರಲ್ಲೂ ತಂಡದ ನಾಯಕಿ ಜೆಮಿಮಾ (57; 37ಎಸೆತ), ಶಿನೆಲ್ ಹೆನ್ರಿ (35; 15ಎಸೆತ), ಲಿಝೆಲ್ ಲೀ (37; 30ಎ) ಮತ್ತು ಲಾರಾ ವೋಲ್ವಾರ್ಟ್ (ಔಟಾಗದೇ 44; 25ಎ) ಅವರ ಬ್ಯಾಟಿಂಗ್ ಅಮೋಘವಾಗಿತ್ತು. ಅದರಿಂದಾಗಿ ಡೆಲ್ಲಿ ತಂಡವು 20 ಓವರ್ಗಳಲ್ಲಿ 4 ವಿಕೆಟ್ಗಳಿಗೆ 203 ರನ್ ಗಳಿಸಿತು.

ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿ ಕೊಂಡಿದ್ದ ಆರ್ಸಿಬಿ ತಂಡದ ಬೌಲರ್ಗಳು ಆರಂಭದ ಮೂರು ಓವರ್ಗಳಲ್ಲಿ ಬಿಗಿಹಿಡಿತ ಸಾಧಿಸಿದ್ದರು. ಆದರೆ ನಂತರ ಡೆಲ್ಲಿ ಬ್ಯಾಟರ್ಗಳು ವಿಜೃಂಭಿಸಿದರು.

ಆದರೆ ಆರ್ಸಿಬಿಯು ದೊಡ್ಡ ಗುರಿಗೆ ಎದೆಗುಂದಲಿಲ್ಲ. ಇನಿಂಗ್ಸ್ನ ಎರಡನೇ ಓವರ್ನಲ್ಲಿ ಗ್ರೇಸ್ ಹ್ಯಾರಿಸ್ ಅವರನ್ನು ಶಿನೆಲ್ ಹೆನ್ರಿ ಅವರು ಕ್ಲೀನ್ಬೌಲ್ಡ್ ಮಾಡಿದರು. ಈ ಹಂತದಲ್ಲಿ ಜೆಮಿಮಾ ಬಳಗಕ್ಕೆ ಇನಿಂಗ್ಸ್ ಮೇಲೆ ಹಿಡಿತ ಸಾಧಿಸುವ ಅವಕಾಶ ಇತ್ತು. ಆದರೆ ಕ್ರೀಸ್ಗೆ ಬಂದ ಜಾರ್ಜಿಯಾ ವೋಲ್ ಅವರು ಸ್ಮೃತಿ ಜೊತೆಗೂಡಿ ಡೆಲ್ಲಿ ತಂಡದ ಯೋಜನೆಗಳನ್ನು ನುಚ್ಚುನೂರು ಮಾಡಿದರು. ಸ್ಮೃತಿ ಅವರಂತೂ 3 ಸಿಕ್ಸರ್ ಹಾಗೂ ಒಂದು ಡಜನ್ ಬೌಂಡರಿ ಗಳಿಸಿದರು. ಜಾರ್ಜಿಯಾ 14 ಬಾರಿ ಚೆಂಡನ್ನು ಬೌಂಡರಿಗೆರೆ ದಾಟಿಸಿದರು.

ಡೆಲ್ಲಿ ಫೀಲ್ಡರ್ಗಳ ಲೋಪಗಳು, ಕ್ಯಾಚ್ಗಳನ್ನು ಪಡೆಯುವ ಅವಕಾಶಗಳನ್ನು ವ್ಯರ್ಥಗೊಳಿಸಿದ್ದು ದುಬಾರಿ ಯಾದವು. ಒತ್ತಡ ನಿಭಾಯಿಸುವಲ್ಲಿ ನಾಯಕಿ ಜೆಮಿಮಾ ಎಡವಿದರು. ಫೀಲ್ಡಿಂಗ್ ನಿಯೋಜನೆಯಲ್ಲಿಯೂ ನಿಖರತೆ ಇರಲಿಲ್ಲ. ಇದರಿಂದಾಗಿ ಬೌಲರ್ ಗಳು ದಂಡನೆಗೊಳಗಾಗುವುದು ತಪ್ಪಲಿಲ್ಲ.

. 87 ರನ್ ಸ್ಮೃತಿ ಮಂದಾನ ಅವರು ಈ ಪಂದ್ಯದಲ್ಲಿ 87 ರನ್ ಬಾರಿಸಿದರು. ಇದು, ಡಬ್ಲ್ಯುಪಿಎಲ್ ಫೈನಲ್ನಲ್ಲಿ ಬ್ಯಾಟರ್ವೊಬ್ಬರು ಗಳಿಸಿದ ಗರಿಷ್ಠ ಮೊತ್ತವೆನಿಸಿತು. ಇದೇ ಪಂದ್ಯದಲ್ಲಿ 79 ರನ್ ಗಳಿಸಿದ ಜಾರ್ಜಿಯಾ ವೋಲ್ ಎರಡನೇ ಸ್ಥಾನದಲ್ಲಿದ್ದಾರೆ . ₹6 ಕೋಟಿ: ಚಾಂಪಿಯನ್ ಆರ್ಸಿಬಿ ತಂಡಕ್ಕೆ ಲಭಿಸಿದ ಬಹುಮಾನ ಮೊತ್ತ

₹3 ಕೋಟಿ: ರನ್ನರ್ಸ್ ಅಪ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ದೊರೆತ ನಗದು ಬಹುಮಾನ

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

WPL: 2ನೇ ಬಾರಿ ಚಾಂಪಿಯನ್ ಪಟ್ಟಕ್ಕೇರಿದ RCB; 4ನೇ ಸಲವೂ ಮುಗ್ಗರಿಸಿದ ಡೆಲ್ಲಿ

ಚಿನಕುರುಳಿ: 2026ರ ಫೆಬ್ರುವರಿ 5, ಗುರುವಾರ