ನವದೆಹಲಿ: 2 ರಿಂದ 17 ವರ್ಷ ವಯೋಮಾನದವರ ಮೇಲೆ ಕೋವಿಡ್ ಲಸಿಕೆ ‘ಕೋವೊವ್ಯಾಕ್ಸ್’ನ 2 ಮತ್ತು 3ನೇ ಹಂತದ ಟ್ರಯಲ್ಗಳನ್ನು ನಡೆಸಲು ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾಗೆ (ಎಸ್ಐಐ) ಅನುಮತಿ ನೀಡುವಂತೆ ಕೇಂದ್ರೀಯ ಔಷಧ ಪ್ರಾಧಿಕಾರ ಮಂಗಳವಾರ ಶಿಫಾರಸು ಮಾಡಿದೆ.
ಅಮೆರಿಕ ಮೂಲದ ನೋವಾವ್ಯಾಕ್ಸ್ ಕಂಪನಿ ‘ಕೋವೊವ್ಯಾಕ್ಸ್’ ಲಸಿಕೆಯನ್ನು ಅಭಿವೃದ್ಧಿಪಡಿಸಿದೆ. ಭಾರತದಲ್ಲಿ ಈ ಲಸಿಕೆಯ ಉತ್ಪಾದನೆಗೆ ಎಸ್ಐಐಗೆ ಕಳೆದ ವರ್ಷ ಆಗಸ್ಟ್ನಲ್ಲಿ ಕಂಪನಿ ಪರವಾನಗಿ ನೀಡಿದೆ.
‘ಕೆಲವು ಷರತ್ತುಗಳೊಂದಿಗೆ ಟ್ರಯಲ್ ನಡೆಸಲು ಅನುಮತಿ ನೀಡುವಂತೆ ಪ್ರಾಧಿಕಾರ ಶಿಫಾರಸು ಮಾಡಿದೆ. ಒಟ್ಟು 920 ಮಕ್ಕಳು ಈ ಟ್ರಯಲ್ನ ಭಾಗವಾಗಲಿದ್ದಾರೆ. 2–11 ವರ್ಷ ಹಾಗೂ 12 ರಿಂದ 17 ವರ್ಷ ವಯೋಮಾನದ ಗುಂಪುಗಳಿರಲಿದ್ದು, ತಲಾ 460 ಮಕ್ಕಳಿರಲಿದ್ದಾರೆ’ ಎಂದು ಮೂಲಗಳು ಹೇಳಿವೆ.
ಲಸಿಕೆಯ 2 ಮತ್ತು 3ನೇ ಹಂತದ ಟ್ರಯಲ್ ಆರಂಭಕ್ಕೆ ಅನುಮತಿ ನೀಡುವಂತೆ ಕೋರಿ ಎಸ್ಐಐ ಕಳೆದ ವಾರ ಪರಿಷ್ಕೃತ ಅರ್ಜಿಯನ್ನು ಸಲ್ಲಿಸಿತ್ತು.