ಮುಂಬೈ: ಮಹಾರಾಷ್ಟ್ರದಲ್ಲಿ ಕೋವಿಡ್‌ನಿಂದಾದ ಸಾವಿನ ಸಂಖ್ಯೆಯ ಮರುಪರಿಶೀಲನೆ(ಹೊಂದಾಣಿಕೆ) ಮಾಡಿ, ಕೋವಿಡ್ ಪೋರ್ಟೆಲ್‌ಗೆ ಅಪ್‌ಡೇಟ್‌ ಮಾಡಲಾಗುತ್ತಿದ್ದು, ಮಂಗಳವಾರ ಕೋವಿಡ್ ಸಾವಿನ ಸಂಖ್ಯೆಯಲ್ಲಿ ದಿಢೀರನೆ ಏರಿಕೆ ಕಂಡಿದೆ.
ಈ ಮರುಶೀಲನೆ ಪ್ರಕ್ರಿಯೆಯಿಂದಾಗಿ ಕೋವಿಡ್ ಪೋರ್ಟೆಲ್‌ನಲ್ಲಿ ದೇಶದ ಕೋವಿಡ್ ಸಾವಿನ ಸಂಖ್ಯೆಯೂ ದಿಢೀರನೆ ಹೆಚ್ಚಳವಾಗಿರುವುದು ಕಂಡುಬಂದಿದೆ.
ಮಹಾರಾಷ್ಟ್ರದಲ್ಲಿ ಈ ಹಿಂದೆ ಕೋವಿಡ್‌ನಿಂದ ಸತ್ತವರ ಸಂಖ್ಯೆ 3509 ಇತ್ತು. ಮಂಗಳವಾರ 147 ಮಂದಿ ಸಾವನ್ನಪ್ಪಿದ್ದಾರೆ. ಈಗ ಮಹಾರಾಷ್ಟ್ರದಲ್ಲಿ ಒಟ್ಟು ಕೋವಿಡ್ ಸಾವಿನ ಸಂಖ್ಯೆ 3656ಕ್ಕೆ ಏರಿದೆ.
ಸಾವಿನ ಸಂಖ್ಯೆ ಮರುಪರಿಶೀಲಿಸಿದ ನಂತರ, ಹಳೆಯ ಸಾವಿನ ಸಂಖ್ಯೆಗೆ ಪರಿಷ್ಕೃತ ಸಂಖ್ಯೆಗಳು ಸೇರ್ಪಡೆಯಾಗಿ, ದೇಶದಾದ್ಯಂತ ಮಂಗಳವಾರ ಒಂದೇ ದಿನ ಕೋವಿಡ್‌ನಿಂದ ಸತ್ತವರ ಸಂಖ್ಯೆ 3998ಕ್ಕೆ ಏರಿತು. ದೇಶದಾದ್ಯಂತ ಇಲ್ಲಿವರೆಗೆ ಕೋವಿಡ್‌ನಿಂದ ಸತ್ತವರ ಸಂಖ್ಯೆ 1,30,753ಕ್ಕೆ ಏರಿದೆ.
ಮಹಾರಾಷ್ಟ್ರದಲ್ಲಿ ಪ್ರತಿ ದಿನ 6,910 ಹೊಸ ಪ್ರಕರಣಗಳು ವರದಿಯಾಗುತ್ತಿವೆ. ಒಟ್ಟು ರಾಜ್ಯದಲ್ಲಿ ಕೋವಿಡ್ ಸೋಂಕಿನ ಪ್ರಕರಣಗಳ ಸಂಖ್ಯೆ 62,29,596. ಸಕ್ರಿಯ ಪ್ರಕರಣಗಳ ಸಂಖ್ಯೆ 94593.
ಸಾರ್ವಜನಿಕ ಆರೋಗ್ಯ ಇಲಾಖೆ ಮಾಹಿತಿ ಪ್ರಕಾರ, ಕೋವಿಡ್ ಸೋಂಕು ದೃಢಪಟ್ಟ ಪ್ರಕರಣಗಳನ್ನು ಜುಲೈ 10ರವರೆಗೆ ಮತ್ತು ಸಾವಿನ ಸಂಖ್ಯೆಯನ್ನು ಜು. 12ರವರೆಗೆ ಮರುಪರಿಶೀಲಿಸಲಾಗಿದೆ.
