ಮುಂಬೈ: ಮಹಾರಾಷ್ಟ್ರದಲ್ಲಿಯೂ ಕೋವಿಡ್‌–19 ಲಸಿಕೆಯ ಕೊರತೆ ಕಂಡು ಬಂದಿದೆ. ಹೀಗಾಗಿ, 18–44 ವರ್ಷ ವಯೋಮಾನದವರಿಗೆ ನೀಡುವ ಉದ್ದೇಶದಿಂದ ತೆಗೆದಿರಿಸಿದ್ದ ಕೋವ್ಯಾಕ್ಸಿನ್‌ ಲಸಿಕೆಯ 3 ಲಕ್ಷ ಡೋಸ್‌ಗಳನ್ನು 45 ವರ್ಷ ಮೇಲ್ಪಟ್ಟವರಿಗೆ ನೀಡಲು ಮಹಾರಾಷ್ಟ್ರ ಸರ್ಕಾರ ಮಂಗಳವಾರ ನಿರ್ಧರಿಸಿದೆ.
ಸುದ್ದಿಗಾರರೊಂದಿಗೆ ಮಾತನಾಡಿದ ಆರೋಗ್ಯ ಸಚಿವ ರಾಜೇಶ್‌ ಟೋಪೆ, ‘45 ವರ್ಷ ಮೇಲ್ಪಟ್ಟ ವಯೋಮಾನದ 5 ಲಕ್ಷಕ್ಕೂ ಹೆಚ್ಚು ಜನರಿಗೆ ಲಸಿಕೆಯ ಎರಡನೇ ಡೋಸ್‌ ನೀಡಬೇಕಿದೆ’ ಎಂದರು.
‘ನಿಗದಿತ ಅವಧಿಯೊಳಗಾಗಿ ಎರಡನೇ ಡೋಸ್‌ ನೀಡದೇ ಇದ್ದರೆ, ಲಸಿಕೆ ಪರಿಣಾಮಕಾರಿಯಾಗದು. ಇದು ಪುನಃ ಆರೋಗ್ಯ ಸಂಬಂಧಿ ಸಮಸ್ಯೆಗಳಿಗೆ ಎಡೆ ಮಾಡುತ್ತದೆ. ಇಂಥ ಸಂಕಷ್ಟ ಉದ್ಭವಿಸುವುದನ್ನು ತಡೆಯಲು 18–44 ವಯೋಮಾನದವರಿಗೆ ನೀಡಲು ತೆಗೆದಿಸಿರುವ ಕೋವ್ಯಾಕ್ಸಿನ್‌ ಲಸಿಕೆಯನ್ನು 45 ವರ್ಷ ಮೇಲ್ಪಟ್ಟವರಿಗೆ ನೀಡಲು ನಿರ್ಧರಿಸಲಾಗಿದೆ’ ಎಂದರು.
