ನವದೆಹಲಿ: ‘ಎಪ್ಪತ್ತೈದು ದಿನಗಳ ಕಾಲ ನಡೆಸಿದ ‘ಕೋವಿಡ್‌ ಲಸಿಕೆ ಅಮೃತ ಮಹೋತ್ಸವ’ ಅಭಿಯಾನದಲ್ಲಿ ಸರಿಸುಮಾರು 16 ಕೋಟಿ ಮುನ್ನೆಚರಿಕೆ ಡೋಸ್‌ಗಳನ್ನು ನೀಡಲಾಗಿದೆ. ಈ ಅಭಿಯಾನ ಪ್ರಾರಂಭಿಸುವ ಮೊದಲು ಶೇ 8ರಷ್ಟಿದ್ದ ಮುನ್ನೆಚರಿಕೆ ಡೋಸ್‌ಅನ್ನು ಪಡೆದುಕೊಂಡವರ ಸಂಖ್ಯೆ, ಈಗ ಶೇ 27ಕ್ಕೆ ಏರಿಕೆಯಾಗಿದೆ’ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಹೇಳಿದೆ.
ಜುಲೈ 15ರಂದು ಈ ಅಭಿಯಾನವನ್ನು ಆರಂಭಿಸಲಾಗಿತ್ತು. ಚಾರ್‌ ಧಾಮ್‌ ಯಾತ್ರೆ, ಅಮರನಾಥ ಯಾತ್ರೆ ಸೇರಿದಂತೆ ಹಲವು ಧಾರ್ಮಿಕ ಯಾತ್ರೆಗಳಲ್ಲಿ ಶಿಬಿರಗಳನ್ನು ಮಾಡಲಾಗಿದೆ. ಜೊತೆಗೆ, ರೈಲು, ಬಸ್‌, ವಿಮಾನ ನಿಲ್ದಾಣಗಳಲ್ಲಿ, ಶಾಲಾ ಕಾಲೇಜುಗಳಲ್ಲಿ, ಖಾಸಗಿ, ಸರ್ಕಾರಿ ಕಚೇರಿಗಳಲ್ಲಿ ಮುನ್ನೆಚ್ಚರಿಕೆ ಡೋಸ್‌ಗಳನ್ನು ನೀಡುವ ಶಿಬಿರಗಳನ್ನು ಮಾಡಲಾಗಿತ್ತು ಎಂದಿದೆ.
