ನವದೆಹಲಿ: ಮುದ್ರಣ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಸಾರವಾಗುವ ಅಡಕಗಳ ಮೇಲೆ ಕಣ್ಗಾವಲು ಇಡಲು ಹಾಗೂ ನಿಯಂತ್ರಿಸಲು ಶಾಸನಬದ್ಧವಾದ ‘ಮಾಧ್ಯಮ ನಿಯಂತ್ರಣ ಪ್ರಾಧಿಕಾರ‘ ರಚಿಸಬೇಕು ಎಂದು ಸಂಸದೀಯ ಸಮಿತಿಯು ಗುರುವಾರ ಶಿಫಾರಸು ಮಾಡಿದೆ.
ವ್ಯಕ್ತಿಗತ ವಿವರ ರಕ್ಷಣಾ ಮಸೂದೆ 2019 ಕುರಿತ ಬಿಜೆಪಿ ಸಂಸದ ಪಿ.ಪಿ.ಚೌಧರಿ ನೇತೃತ್ವದ ಜಂಟಿ ಸಮಿತಿಯ ವರದಿಯನ್ನು ಸಂಸತ್ತಿನ ಉಭಯ ಸದನಗಳಲ್ಲಿ ಮಂಡಿಸಲಾಯಿತು. ಭಾರತೀಯ ಪತ್ರಿಕಾ ಮಂಡಳಿ ಮಾದರಿಯಲ್ಲೇ ಪ್ರಾಧಿಕಾರವನ್ನು ರಚಿಸಬಹುದು ಎಂದು ಸಮಿತಿ ಹೇಳಿದೆ.
ದೇಶದಲ್ಲಿ ಸುದ್ಧಿ ಮಾಧ್ಯಮವನ್ನು ಒಟ್ಟಾಗಿ ನಿಯಂತ್ರಿಸುವ ಒಂದೂ ಸಂಸ್ಥೆಯೂ ಸದ್ಯ ಇಲ್ಲ. ಹಾಲಿ ಇರುವ ಭಾರತೀಯ ಪತ್ರಿಕಾ ಮಂಡಳಿಯು ಇದಕ್ಕೆ ಪೂರ್ಣ ಸನ್ನದ್ಧವಾಗಿಲ್ಲ. ಈ ಕಾರಣದಿಂದ ಪ್ರತ್ಯೇಕ ಪ್ರಾಧಿಕಾರದ ರಚನೆ ಅಗತ್ಯವಾಗಿದೆ ಎಂದು ಪ್ರತಿಪಾದಿಸಿದೆ.
ಮೂಲ ಕಂಪನಿಯು ಭಾರತದಲ್ಲಿ ತಂತ್ರಜ್ಞಾನ ಆಧರಿತ ಕಚೇರಿಯನ್ನು ಸ್ಥಾಪಿಸದೇ ಇದ್ದಲ್ಲಿ, ಯಾವುದೇ ಸಾಮಾಜಿಕ ಜಾಲತಾಣದ ಮಾಧ್ಯಮ ವೇದಿಕೆಗೆ ಕಾರ್ಯನಿರ್ವಹಿಸಲು ಅವಕಾಶ ನೀಡಬಾರದು ಎಂದು ಸಮಿತಿಯು ಶಿಫಾರಸು ಮಾಡಿದೆ.
