‘ಕೋವಿಡ್‌–19 ಚಿಕಿತ್ಸೆಯಲ್ಲಿ ರೆಮ್ಡಿಸಿವಿರ್‌ ನೆರವು ಅತ್ಯಲ್ಪ’

ನವದೆಹಲಿ: ಕೋವಿಡ್‌-19 ರೋಗಿಗಳ ಚಿಕಿತ್ಸೆಯಲ್ಲಿ ನೆರವಾಗಬಹುದು ಎಂದು ಭಾವಿಸಲಾಗಿದ್ದ ನಾಲ್ಕು ಪ್ರಮುಖ ಔಷಧಗಳಿಂದ ಮರಣ ಪ್ರಮಾಣ ಕಡಿಮೆಯಾಗಿಲ್ಲ ಎಂದು ಅಧ್ಯಯನ ವರದಿ ಹೇಳಿದೆ. ರೆಮ್ಡಿಸಿವಿರ್, ಎಚ್‌ಸಿಕ್ಯು, ಲೊಪಿನ್ಯಾವಿರ್ ಮತ್ತು ಇಂಟರ್‌ಫೆರಾನ್‌ ಔಷಧಗಳು ಕೋವಿಡ್‌ ರೋಗಿಗಳ ಮೇಲೆ ಬಿರುವ ಪರಿಣಾಮಗಳ ಬಗ್ಗೆ ವಿಶ್ವ ಆರೋಗ್ಯ ಸಂಸ್ಥೆ ನಡೆಸಿದ್ದ ಅಧ್ಯಯನದಲ್ಲಿ ಈ ಅಂಶ ಪತ್ತೆಯಾಗಿದೆ.

ಇವು ಬೇರೆ-ಬೇರೆ ಕಾಯಿಲೆಗಳನ್ನು ಗುಣಪಡಿಸಲು ಅಭಿವೃದ್ಧಿಪಡಿಸಿದ್ದ ಔಷಧಗಳಾಗಿವೆ. ಕೋವಿಡ್‌ ಚಿಕಿತ್ಸೆಯಲ್ಲಿ ನೆರವಾಗಬಹುದು ಎಂದು ಇವನ್ನು ಕೋವಿಡ್ ರೋಗಿಗಳಿಗೆ ನೀಡಲಾಗುತ್ತಿತ್ತು. ರೆಮ್ಡಿಸಿವಿರ್‌ ಮತ್ತು ಎಚ್‌ಸಿಕ್ಯು ಔಷಧಗಳು, ಆಸ್ಪತ್ರೆಗೆ ದಾಖಲಾಗಿರುವ ಕೋವಿಡ್‌ ರೋಗಿಗಳಲ್ಲಿ ಮರಣ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ ಎಂದು ಈ ಮೊದಲು ನಿರೀಕ್ಷಿಸಲಾಗಿತ್ತು. ಜಗತ್ತಿನ ಎಲ್ಲೆಡೆ ಈ ಔಷಧಗಳನ್ನು ಕೋವಿಡ್‌ ರೋಗಿಗಳಿಗೆ ನೀಡಲಾಗುತ್ತಿತ್ತು. ಈ ಎರಡೂ ಔಷಧಗಳು ಸೇರಿದಂತೆ ಒಟ್ಟು ನಾಲ್ಕು ಔಷಧಗಳ ಮೇಲೆ ಅಧ್ಯಯನ ನಡೆಸಲಾಗಿತ್ತು.

ಭಾರತವೂ ಸೇರಿ 30 ದೇಶಗಳಲ್ಲಿ ಈ ಅಧ್ಯಯನ ನಡೆಸಲಾಗಿತ್ತು. ಯಾವುದೇ ರೀತಿಯ ಉಪಯೋಗ ಇಲ್ಲದ ಕಾರಣ ಎಚ್‌ಸಿಕ್ಯು ಮತ್ತು ಲೊಪಿನ್ಯಾವಿರ್‌ ಔಷಧಗಳ ಬಳಕೆಯನ್ನು ಅದ್ಯಯನದ ಮಧ್ಯದಲ್ಲೇ ನಿಲ್ಲಿಸಲಾಗಿತ್ತು. ಅಧ್ಯಯನ ಪೂರ್ಣವಾದ ನಂತರ ಉಳಿದ ಎರಡು ಔಷಧಗಳಿಂದಲೂ ಯಾವುದೇ ಉಪಯೋಗವಿಲ್ಲ ಎಂಬುದು ಪತ್ತೆಯಾಗಿದೆ.

‘ಈ ಔಷಧಗಳು ಕೋವಿಡ್‌ ರೋಗಿಗಗಳ ಮರಣ ಪ್ರಮಾಣವನ್ನು ಕಡಿಮೆ ಮಾಡುವುದಿಲ್ಲ. ಆಸ್ಪತ್ರೆಗೆ ದಾಖಲಾಗಿರುವ ರೋಗಿಗಳಿಗೆ ವೆಂಟಿಲೇಟರ್‌ ಅಗತ್ಯವನ್ನು ಕಡಿಮೆ ಮಾಡುವಲ್ಲೂ ಇವು ನೆರವಾಗುವುದಿಲ್ಲ. ರೆಮ್ಡಿಸಿವಿರ್‌ನ ಉಪಯೋಗ ಅತ್ಯಲ್ಪ’ ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಪರಿಷತ್ತಿನ ಪ್ರಧಾನ ನಿರ್ದೇಶಕ ಬಲರಾಮ್ ಭಾರ್ಗವ್ ಹೇಳಿದ್ದಾರೆ.

ಅಧ್ಯಯನದ ವ್ಯಾಪ್ತಿ