Ram Temple | ಅಯೋಧ್ಯೆ ತಲುಪಿದ ನೇಪಾಳದ ಬೃಹತ್‌ ಸಾಲಿಗ್ರಾಮ ಶಿಲೆಗಳು

ಅಯೋಧ್ಯೆ: ನೇಪಾಳದಿಂದ ತರಿಸಲಾಗಿರುವ ಎರಡು ಸಾಲಿಗ್ರಾಮ ಶಿಲೆಗಳು ಇಲ್ಲಿನ ರಾಮ ಜನ್ಮಭೂಮಿ ಸ್ಥಳಕ್ಕೆ ತಲುಪಿವೆ.

ಸ್ಥಳೀಯರು ಹಾಗೂ ಅರ್ಚಕರು ಕಲ್ಲಿಗೆ ಪೂಜೆ ಸಲ್ಲಿಸಿ, ಹೂವಿನಿಂದ ಅಲಂಕಾರ ಮಾಡಿ ಸ್ವಾಗತಿಸಿದರು. ಬಳಿಕ ಅದನ್ನು ಶ್ರೀರಾಮ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌ಗೆ ಹಸ್ತಾಂತರಿಸಲಾಯ್ತು.

ಈ ಶಿಲೆಗಳಿಂದ ರಾಮ ಹಾಗೂ ಜಾನಕಿಯ ಮೂರ್ತಿಯನ್ನು ನಿರ್ಮಾಣ ಮಾಡಿ, ಅವುಗಳನ್ನು ರಾಮ ಮಂದಿರದಲ್ಲಿ ಪ್ರತಿಷ್ಠಾಪನೆ ಮಾಡುವ ಸಾಧ್ಯತೆ ಇದೆ.

ಮೈಯಾಗ್ಡಿ ಹಾಗೂ ಮುಸ್ತಂಗ್‌ ಜಿಲ್ಲೆಯಲ್ಲಿ ಹರಿಯುವ ಕಾಳಿ ಗಂಡಕಿ ನದಿ ದಡದಲ್ಲಿ ಮಾತ್ರ ಈ ಶಿಲೆಗಳು ಲಭ್ಯವಿದ್ದು, ಇವುಗಳನ್ನು ಸೀತಾ ದೇವಿಯ ಜನ್ಮಸ್ಥಳವಾದ ನೇಪಾಳದ ಜಾನಕಪುರಿಂದ ಭಾರೀ ಟ್ರಕ್‌ಗಳ ಮೂಲಕ ತರಲಾಗಿದೆ.

ಬುಧವಾರ ಗೋರಖಪುರಕ್ಕೆ ಈ ಶಿಲೆಗಳು ತಲುಪಿದ್ದು, ಭಕ್ತರಿಗೆ ಪ್ರಾರ್ಥನೆ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.

ಒಂದು ಶಿಲೆ 18 ಟನ್ ಹಾಗೂ ಇನ್ನೊಂದು ಶಿಲೆ 16 ಟನ್‌ ತೂಕವಿದ್ದು, ಇವುಗಳಲ್ಲಿ ಮೂರ್ತಿ ತಯಾರಿಕೆ ಸಾಧ್ಯ ಎಂದು ತಾಂತ್ರಿಕವಾಗಿ ಹಾಗೂ ವೈಜ್ಞಾನಿಕವಾಗಿ ಖಚಿತಪಡಿಸಿಕೊಳ್ಳಲಾಗಿದೆ ಎಂದು ನೇಪಾಳದ ಅಧಿಕಾರಿಗಳು ತಿಳಿಸಿದ್ದಾರೆ.