ಕೇಂದ್ರ ಸರ್ಕಾರದ ಸೂಚನೆ: ವಿವಿಧ ಪೋಸ್ಟ್‌ ಕೈಬಿಟ್ಟ ಜಾಲತಾಣಗಳು

ದೇಶದಲ್ಲಿ ಉದ್ಭವಿಸಿರುವ ವೈದ್ಯಕೀಯ ಬಿಕ್ಕಟ್ಟು ಅಥವಾ ನಕಲಿ ಸುದ್ದಿಗಳನ್ನು ತೆಗೆಯಲಾಗಿದೆ ಎಂದು ತಿಳಿಸಲಾಗಿದೆ. ‘ಹೀಗೇ ತೆಗೆಯಲಾದ ಪೋಸ್ಟ್‌ಗಳ ಬಗ್ಗೆ ಆಯಾ ಖಾತೆದಾರರಿಗೆ, ಕಾನೂನ ಪ್ರಕಾರ ಸರ್ಕಾರದ ಕೋರಿಕೆಯಂತೆ ಈ ಕ್ರಮವಹಿಸಲಾಗಿದೆ ಎಂದು ಮಾಹಿತಿ ನೀಡಲಾಗಿದೆ’ ಎಂದು ಟ್ವಿಟರ್ ತಿಳಿಸಿದೆ.

ಆದರೆ, ತೆಗೆಯಲಾಗಿರುವ ಪೋಸ್ಟ್‌ಗಳು ಯಾವುವು ಎಂಬುದು ತಕ್ಷಣಕ್ಕೆ ತಿಳಿದುಬಂದಿಲ್ಲ. ಸರ್ಕಾರದ ಮೂಲಗಳ ಪ್ರಕಾರ, ಕೇಂದ್ರ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವಾಲಯವು ಗೃಹ ಸಚಿವಾಲಯದ ಶಿಫಾರಸು ಆಧರಿಸಿ, ಜಾಲತಾಣಗಳ ಆಡಳಿತಗಳಿಗೆ ಪೋಸ್ಟ್‌ ಮತ್ತು ಯುಆರ್‌ಎಲ್‌ಗಳನ್ನು ತೆಗೆಯುವಂತೆ ಸೂಚಿಸಿತ್ತು.

ಕೆಲವು ಖಾತೆದಾರರು ಜಾಲತಾಣಗಳನ್ನು ದುರ್ಬಳಕೆ ಮಾಡಿಕೊಂಡು ತಪ್ಪು ಮಾಹಿತಿಯನ್ನು ಜನತೆಗೆ ರವಾನಿಸುತ್ತಿದ್ದರು ಇದು, ಸಮಾಜದಲ್ಲಿ ಗೊಂದಲ ಮೂಡಲು ಕಾರಣವಾಗಿತ್ತು. ಸಂಬಂಧವಿಲ್ಲದ, ಹಳೆಯದಾದ, ಸಂದರ್ಭಕ್ಕೆ ಸೂಕ್ತವಲ್ಲದ ಮಾಹಿತಿ ಮತ್ತು ಚಿತ್ರಗಳನ್ನು ಹಂಚಿಕೆ ಮಾಡಿಕೊಳ್ಳಲಾಗಿತ್ತು. ಇವು ಒಟ್ಟಾರೆ ಕೋವಿಡ್ ನಿರ್ವಹಣೆಯ ಶಿಷ್ಟಾಚಾರಕ್ಕೂ ವಿರುದ್ಧವಾಗಿತ್ತು ಎಂದು ಮೂಲಗಳು ವಿವರಿಸಿವೆ.

ಕೊರೊನಾ ನಿರ್ವಹಣೆ ಕುರಿತ ಟೀಕೆಯನ್ನು ಹೊಂದಿದ್ದ ಪೋಸ್ಟ್‌ಗಳು ಸೇರಿದಂತೆ ಸುಮಾರು 50 ಪೋಸ್ಟ್‌ಗಳನ್ನು ಟ್ವಿಟರ್‌ ತೆಗೆದುಹಾಕಿದೆ. ಸರ್ಕಾರದ ಆದೇಶದಂತೆ ಕಳೆದ ತಿಂಗಳು 500ಕ್ಕೂ ಅಧಿಕ ಖಾತೆಗಳನ್ನು ಅಮಾನತಿನಲ್ಲಿ ಇಡಲಾಗಿತ್ತು.