ಶುಕ್ರವಾರ, ನವೆಂಬರ್ 27, 2020
19 °C
ಮೊಬೈಲ್‌ ಸಾಗಿಸುತ್ತಿದ್ದ ಟ್ರಕ್‌ ತಡೆದು ಕೃತ್ಯ: ಮಧ್ಯಪ್ರದೇಶದ ‘ಕಂಜರ್‌ ಗ್ಯಾಂಗ್‌’ ಮೇಲೆ ಶಂಕೆ

₹15 ಕೋಟಿ ಮೌಲ್ಯದ 14,400 ಮೊಬೈಲ್‌ ಕಳ್ಳತನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಚೆನ್ನೈ: ಚೀನಾ ಮೂಲದ ಮೊಬೈಲ್‌ ತಯಾರಿಕಾ ಕಂಪನಿ ಶಿಯೋಮಿಯ ₹15 ಕೋಟಿ ಮೌಲ್ಯದ ಮೊಬೈಲ್‌ಗಳನ್ನು ಸಾಗಿಸುತ್ತಿದ್ದ ಟ್ರಕ್‌ ಅನ್ನು ತಮಿಳುನಾಡಿನ ಕೃಷ್ಣಗಿರಿ ಸಮೀಪ 10 ಜನರ ಕಳ್ಳರ ಗುಂಪೊಂದು ದೋಚಿದ್ದು, 14,400 ಮೊಬೈಲ್‌ಗಳೊಂದಿಗೆ ಪರಾರಿಯಾಗಿದ್ದಾರೆ.

ಮಧ್ಯಪ್ರದೇಶದ ‘ಕಂಜರ್‌ ಗ್ಯಾಂಗ್‌’ ಈ ಕೃತ್ಯ ನಡೆಸಿರುವ ಶಂಕೆ ಇದ್ದು, ಕಳ್ಳರ ಬೆನ್ನತ್ತಿ 9 ಪೊಲೀಸರ ತಂಡವು ಮಧ್ಯಪ್ರದೇಶ, ಮಹಾರಾಷ್ಟ್ರ ಹಾಗೂ ಆಂಧ್ರಪ್ರದೇಶಕ್ಕೆ ತೆರಳಿದೆ. ಬೆಂಗಳೂರಿನಿಂದ ಕೇವಲ 70 ಕಿ.ಮೀ ದೂರದಲ್ಲಿ ಈ ಘಟನೆ ನಡೆದಿದೆ. ಶ್ರೀಪೆರಂಬದೂರಿನಲ್ಲಿ ಇರುವ ಮೊಬೈಲ್‌ ತಯಾರಿಕಾ ಘಟಕದಿಂದಲೇ ಡಿಎಚ್‌ಎಲ್‌ ಕೊರಿಯರ್‌ ಕಂಪನಿಗೆ ಸೇರಿದ ಈ ಟ್ರಕ್‌ ಅನ್ನು ಕಳ್ಳರು ಹಿಂಬಾಲಿಸಿಕೊಂಡು ಬಂದಿದ್ದಾರೆ. ಕೃಷ್ಣಗಿರಿ ಸಮೀಪ ಯಾರೂ ಇಲ್ಲದ ಪ್ರದೇಶದಲ್ಲಿ ಟ್ರಕ್‌ ತಡೆದು, ಎಲ್ಲ ಮೊಬೈಲ್‌ಗಳನ್ನು ದೋಚಿದ್ದಾರೆ. ಮೊಬೈಲ್‌ಗಳನ್ನು ಮುಂಬೈನಲ್ಲಿರುವ ಪ್ಯಾಕಿಂಗ್‌ ಘಟಕಕ್ಕೆ ಟ್ರಕ್‌ ಮೂಲಕ ಕೊಂಡೊಯ್ಯಲಾಗುತ್ತಿತ್ತು.

ಕೃಷ್ಣಗಿರಿ ಜಿಲ್ಲೆಯ ಮೇಲುಮಲೈ ಹಳ್ಳಿಯ ಸಮೀಪ ಚೆನ್ನೈ–ಬೆಂಗಳೂರು ಹೆದ್ದಾರಿಯಲ್ಲಿ ಬುಧವಾರ ತಡರಾತ್ರಿ ಈ ಕೃತ್ಯ ನಡೆದಿದೆ. ‘ಟ್ರಕ್‌ ತಡೆದ ಕಳ್ಳರ ಗುಂಪು, ಚಾಲಕ ಹಾಗೂ ಜೊತೆಗಿದ್ದ ವ್ಯಕ್ತಿಯನ್ನು ಬೆದರಿಸಿ, ಟ್ರಕ್‌ ಅನ್ನು 8–10 ಕಿ.ಮೀ ಚಲಾಯಿಸಿಕೊಂಡು ಬಂದು, ಎಲ್ಲ ಮೊಬೈಲ್‌ಗಳನ್ನು ತಮ್ಮ ವಾಹನಕ್ಕೆ ತುಂಬಿಸಿಕೊಂಡು ಸ್ಥಳದಿಂದ ಪರಾರಿಯಾಗಿದ್ದಾರೆ’ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಬಿ.ಗಂಗಾಧರ್‌ ತಿಳಿಸಿದರು.

‘ಮುಂದಿನ ಎರಡು ದಿನದೊಳಗಾಗಿ ಈ ಗುಂಪನ್ನು ಬಂಧಿಸಲಿದ್ದೇವೆ. ಮಧ್ಯಪ್ರದೇಶದ ಕಂಜರ್‌ ಗ್ಯಾಂಗ್‌ ಮೇಲೆ ಸಂಶಯವಿದೆ. ಈ ಗ್ಯಾಂಗ್‌ ದೋಚುವ ಮಾದರಿಯಲ್ಲೇ ಈ ಕೃತ್ಯ ನಡೆದಿದೆ’ ಎಂದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು