ಮುಖ್ಯಮಂತ್ರಿ ಹಾಗೂ ಟಿಎಂಸಿ ನಾಯಕಿ ಮಮತಾ ಬ್ಯಾನರ್ಜಿ ಅವರು ಪ್ರತಿನಿಧಿಸುವ ನಂದಿಗ್ರಾಮದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಅವರು ಭಾಗವಹಿಸಿದ್ದರು.
ಈ ವೇಳೆ ಜೈ ಶ್ರೀರಾಮ್ ಘೋಷಣೆಗಳನ್ನು ಕೂಗುತ್ತಿದ್ದವರನ್ನು ಉದ್ದೇಶಿಸಿ ಮಾತನಾಡಿದ ಯೋಗಿ, ʼದೀದಿ (ಮಮತಾ ಬ್ಯಾನರ್ಜಿ) ರಾಮನನ್ನು ವಿರೋಧಿಸುತ್ತಾರೆ. ಅವರು ಈ (ಜೈ ಶ್ರೀರಾಮ್) ಘೋಷಣೆಗಳನ್ನು ಕೂಗದಂತೆ ಹೇಳುತ್ತಾರೆ. ನೀವು ಮಮತಾ ದೀದಿಯ ಮಾತುಗಳನ್ನು ಒಪ್ಪುತ್ತೀರಾ?ʼ ಎಂದು ಪ್ರಶ್ನಿಸಿದ್ದಾರೆ.
ಮುಂದುವರಿದು, ʼಕೊಠಾರಿ ಸಹೋದರರು ಅಯೋಧ್ಯೆಯಲ್ಲಿ ನಡೆದ ಶ್ರೀರಾಮ ದೇವಾಲಯ ಆಂದೋಲನದಲ್ಲಿ ಪ್ರಾಣತ್ಯಾಗ ಮಾಡಿದ್ದಾರೆ. ಅವರ ಬಲಿದಾನದ ಸ್ಮಾರಕ ಅಯೋಧ್ಯೆಯಲ್ಲಿ ಇನ್ನೂ ಇದೆ. ರಾಮ ಮಂದಿರ ನಿರ್ಮಾಣ ಮಾಡುವ ಅವರ ಕನಸು ಪ್ರಧಾನಿ ನರೇಂದ್ರ ಮೋದಿ ಅವರಿಂದ ಸಾಕಾರಗೊಳ್ಳುತ್ತಿದೆʼ ಎಂದು ತಿಳಿಸಿದ್ದಾರೆ.
ಶ್ರೀರಾಮನ ವಿಚಾರವಾಗಿ ಮಮತಾ ವಿರುದ್ಧ ಮತ್ತಷ್ಟು ಆರೋಪಗಳನ್ನು ಮಾಡಿದ ಅವರು, ʼದೀದಿಗೆ ಐಐಟಿ ಮತ್ತು ಐಐಎಂಗಳನ್ನು ನಿರ್ಮಿಸುವ ಕಾಳಜಿಲ್ಲ. ʼಜೈ ಶ್ರೀರಾಮ್ʼ ಘೋಷಣೆಗಳನ್ನು ನಿಷೇಧಿಸುವುದು ಹೇಗೆ ಎಂಬುದರತ್ತಲೇ ಅವರ ಸಂಪೂರ್ಣ ಗಮನವಿದೆʼ ಎಂದಿದ್ದಾರೆ.
ಭಗವಾನ್‌ ರಾಮ ಪ್ರತಿಯೊಬ್ಬ ಭಾರತೀಯನಲ್ಲೂ ಅಂತರ್ಗತವಾಗಿದ್ದಾರೆ. ಮಮತಾ ಅವರನ್ನು ಹೊರತುಪಡಿಸಿ ಪ್ರತಿಯೊಬ್ಬ ಭಾರತೀಯರೂ ರಾಮನೊಂದಿಗೆ ಒಡನಾಟ ಹೊಂದಲು ಹೆಮ್ಮೆ ಪಡುತ್ತಾರೆ ಎಂದಿದ್ದಾರೆ. ಹಾಗೆಯೇ, ದೇವಾಲಯ ನಿರ್ಮಾಣಕ್ಕೆ ಉದಾರ ದೇಣಿಗೆ ನೀಡಿರುವ ಬಂಗಾಳದ ಜನರಿಗೆ ಧನ್ಯವಾದಗಳನ್ನೂ ತಿಳಿಸಿದ್ದಾರೆ.
1990ರಲ್ಲಿಅಯೋಧ್ಯೆಯಲ್ಲಿ ವಿವಾದಿತ ಕಟ್ಟಡದ ಮೇಲೆ ಕೇಸರಿ ಧ್ವಜ ಹಾರಿಸುವಾಗ ಪೊಲೀಸರುಗುಂಡು ಹಾರಿಸಿದ್ದರು. ಈ ವೇಳೆ ಕೊಠಾರಿ ಸಹೋದರರಾದ ರಾಮ್‌ ಮತ್ತು ಶರದ್‌ ಮೃತಪಟ್ಟಿದ್ದರು ಎಂದು ವರದಿಯಾಗಿತ್ತು.
294 ಸದಸ್ಯ ಬಲದ ಬಂಗಾಳ ವಿಧಾನಸಭೆಗೆ ಮೊದಲ ಹಂತದ ಮತದಾನ ಮಾರ್ಚ್27 ರಂದು ಆರಂಭವಾಗಲಿದೆ. 8 ಹಂತಗಳಲ್ಲಿ ನಡೆಯುವ ಮತದಾನ ಪ್ರಕ್ರಿಯೆಯ ಅಂತಿಮಸುತ್ತು ಏಪ್ರಿಲ್29ರಂದು ಜರುಗಲಿದೆ. ಮೇ2 ರಂದು ಫಲಿತಾಂಶ ಹೊರಬೀಳಲಿದೆ.