ಚೆನ್ನೈ: ಅತಿಯಾದ ವೇಗ, ಅಜಾಗರೂಕತೆ ಹಾಗೂ ಅಪಾಯಕಾರಿಯಾಗಿ ಬೈಕ್ ಓಡಿಸಿದ ಆರೋಪದ ಮೇಲೆ ತಮಿಳಿನ ಯುಟ್ಯೂಬರ್ ಟಿಟಿಎಫ್ ವಾಸನ್ ಅವರ ಬೈಕ್ ಚಾಲನಾ ಪರವಾನಗಿಯನ್ನು ಮುಂದಿನ ಹತ್ತು ವರ್ಷಗಳ (2033ರ ಅ. 5) ಅವಧಿಗೆ ಸಾರಿಗೆ ಇಲಾಖೆ ಅಮಾನತು ಮಾಡಿದೆ.
ಚೆನ್ನೈ–ವೆಲ್ಲೋರ್ ಹೆದ್ದಾರಿಯ ಕಾಂಚಿಪುರಂ ಬಳಿ ವಾಸನ್ ಅವರು ಅಜಾಗರೂಕತೆಯಿಂದ ಬೈಕ್ ಚಾಲನೆ ಮಾಡಿದ್ದರ ಕುರಿತು ಬಾಲುಚೆಟ್ಟಿ ಚತ್ರಂ ಎಂಬುವವರು ಸೆ. 19ರಂದು ದೂರು ನೀಡಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾಂಚಿಪುರಂ ನ್ಯಾಯಾಲಯ ವಾಸನ್ ಅವರ ಜಾಮೀನು ಅರ್ಜಿಯನ್ನು ತಿರಸ್ಕರಿಸಿತ್ತು. ಹೀಗಾಗಿ ಪುಳಲ್ ಜೈಲಿನಲ್ಲಿ ವಾಸನ್ ಅವರನ್ನು ಇರಿಸಲಾಗಿದೆ.
ಜಾಮೀನು ಮಂಜೂರು ಮಾಡಲು ಹೈಕೊರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಿರುವ ವಾಸನ್, ‘ಬೈಕ್ ಸಾಧಾರಣ ವೇಗದಲ್ಲೇ ಇತ್ತು. ಇದ್ದಕ್ಕಿದ್ದಂತೆ ರಸ್ತೆಯಲ್ಲಿ ಹಸುವೊಂದು ಅಡ್ಡ ಬಂದಿತು. ಅದನ್ನು ತಪ್ಪಿಸಲು ಬ್ರೇಕ್ ಹಾಕಿದಾಗ ಒಂದು ಚಕ್ರ ಮೇಲೆದ್ದಿತು. ಬ್ರೇಕ್ ಹಾಕದಿದ್ದರೆ ಹಸು ಮತ್ತು ತನ್ನ ಜೀವಕ್ಕೇ ಅಪಾಯ ಎದುರಾಗುತ್ತಿತ್ತು’ ಎಂದು ಹೇಳಿದ್ದಾರೆ.
