ಅಶಿಸ್ತು ಮರುಕಳಿಸಿದರೆ ಇನ್ನಷ್ಟು ಕಠಿಣ ಕ್ರಮ: ವಿಧಾನಸಭಾಧ್ಯಕ್ಷ ಎಚ್ಚರಿಕೆ

ಮಂಗಳೂರು : ‘ಸದನದ ಘನತೆ ಗೌರವಕ್ಕೆ ಚ್ಯುತಿ ತರುವಂತಹ ನಡವಳಿಕೆ ವಿರುದ್ಧ ಎಂತಹ ಕಠಿಣ ತೀರ್ಮಾನ ತೆಗೆದುಕೊಳ್ಳುವುದಕ್ಕೂ ಹೇಸುವುದಿಲ್ಲ. ಶಾಸಕರು ವಿಧಾನ ಸಭಾಧ್ಯಕ್ಷರ ಪೀಠಕ್ಕೆ ಅಗೌರವ ತೋರುವ ಪ್ರವೃತ್ತಿಯನ್ನು ಮುಂದಿನ ಅಧಿವೇಶನದಲ್ಲೂ ಪುನರಾವರ್ತಿಸಿದರೆ ಅವರನ್ನು ವಜಾಗೊಳಿಸಲೂ ಅವಕಾಶವಿದೆ’ ಎಂದು ವಿಧಾನಸಭಾಧ್ಯಕ್ಷ ಯು.ಟಿ.ಖಾದರ್ ಹೇಳಿದರು.

ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಸೋಮವಾರ ಮಾತನಾಡಿದ ಅವರು, ‘ಸದನಕ್ಕಿಂತ ದೊಡ್ಡ ಸಾಂವಿಧಾನಿಕ ಸಂಸ್ಥೆ ಬೇರೆ ಇಲ್ಲ. ವಿಧಾನ ಸಭಾಧ್ಯಕ್ಷರ ಪೀಠಕ್ಕಿಂತ ದೊಡ್ಡದು ಬೇರೆ ಇಲ್ಲ. ಇದು ಗೊತ್ತಿದ್ದೂ ಸಭಾಧ್ಯಕ್ಷ ಪೀಠದ ಬಳಿಗೆ ಬಂದು ಮಸೂದೆಯ ಪ್ರತಿ ಕಿತ್ತುಕೊಳ್ಳಲು ಪ್ರಯತ್ನಿಸುವುದನ್ನು, ಮಾರ್ಷಲ್ಗಳನ್ನು ದೂಡುವುದನ್ನು ಸಹಿಸಲು ಸಾಧ್ಯವಿಲ್ಲ. ಅಧಿವೇಶನದ ಕೊನೆಯ ದಿನ ಏನೂ ಮಾಡಿದರೂ ನಡೆಯುತ್ತದೆ. ಹೆಚ್ಚೆಂದರೆ ಅಧಿವೇಶನದ ಅವಧಿಗೆ ತಮ್ಮನ್ನು ಅಮಾನತು ಮಾಡಬಹುದು. ಅದರಿಂದ ಏನೂ ಆಗದು ಎಂಬುದು ಕೆಲವು ಶಾಸಕರ ಧೋರಣೆಯಾಗಿತ್ತು. ಅವರ ತಪ್ಪನ್ನು ಮನವರಿಕೆ ಮಾಡಿಸಲು ಸಭಾಧ್ಯಕ್ಷನಾಗಿ ನನಗಿರುವ ಅಧಿಕಾರ ಏನೆಂಬುದನ್ನು ತೋರಿಸಿದ್ದೇನೆ. ಅವರು ತಮ್ಮ ವರ್ತನೆಯನ್ನು ಸುಧಾರಿಸಿಕೊಂಡು ಉತ್ತಮ ನಡವಳಿಕೆ ರೂಪಿಸಿಕೊಳ್ಳಲಿ ಎಂಬ ಉದ್ದೇಶದಿಂದ ಈ ಕ್ರಮಕೈಗೊಂಡಿದ್ದೇನೆ’ ಎಂದರು.

‘ಅಮಾನತುಗೊಂಡವರು ನಮ್ಮ ಸ್ನೇಹಿತರೇ. ಅವರು ಸದನದಲ್ಲಿ ನಡೆದುಕೊಂಡ ದೃಶ್ಯಗಳನ್ನು ಮತ್ತೆ ನೋಡಿದರೆ ಅವರು ಮಾಡಿರುವ ತಪ್ಪು ಎಷ್ಟು ಗಂಭೀರವಾದುದು ಎಂದು ಮನವರಿಕೆಯಾಗುತ್ತದೆ. ಅವರ ಇಂತಹ ವರ್ತನೆಯನ್ನು ಚಾಳಿಯನ್ನಾಗಿ ಮಾಡಿಕೊಂಡರೆ ಅವರನ್ನು ವಜಾ ಮಾಡುತ್ತೇನೆ ಎಂದು ನಾನು ಹೇಳುವುದಿಲ್ಲ. ಸಭಾಧ್ಯಕ್ಷರ ಪೀಠಕ್ಕೆ ಮೊದಲ ಸಲ ಅಗೌರವ ತೋರಿದಾಗ, ಶಾಸಕರನ್ನು ಮೂರು ದಿನಗಳ ಕಾಲ ಅಮಾನತು ಮಾಡಿದ್ದೆ. ಈ ಸಲ ಆರು ತಿಂಗಳು ಅಮಾನತು ಮಾಡಲಾಗಿದೆ. ಇಂತಹ ತಪ್ಪುಗಳು ಮರುಕಳಿಸಿದರೆ ಪೀಠವು ತೆಗೆದುಕೊಳ್ಳುವ ಕ್ರಮವೂ ಬದಲಾಗುತ್ತದೆ. ಅಗತ್ಯಬಿದ್ದರೆ ಒಂದು ವರ್ಷದವರೆಗೂ ಅಮಾನತು ಮಾಡಬಹುದು’ ಎಂದರು.

‘ಪೀಠಕ್ಕೆ ಅವಮಾನ ಮಾಡಿದ, ಅಸಹ್ಯ ಪಡುವಂತಹ ವಾತಾವರಣ ಸೃಷ್ಟಿಸಿದ ದೃಶ್ಯಗಳನ್ನು ನಮ್ಮ ರಾಜ್ಯದವರು ಮಾತ್ರವಲ್ಲ, ಬೇರೆ ದೇಶದವರೂ ನೋಡಿದ್ದಾರೆ. ಕೆಲವು ಶಾಸಕರ ನಡವಳಿಕೆ ಜನರಲ್ಲಿ ಅಸಹ್ಯ ಭಾವನೆಯನ್ನು ಮೂಡಿಸಿದೆ. ಸದನದ ಪಾಲಿಗೆ ಇದೊಂದು ಕಪ್ಪುಚುಕ್ಕೆ. ರಾಜ್ಯದ ಘನತೆ ಗೌರವ ಕಾಪಾಡಲು ವೈದ್ಯರು, ಎಂಜಿನಿಯರ್ಗಳು, ಪೊಲೀಸರು, ಸಾಹಿತಿಗಳು ಹಾಗೂ ಇತರರ ಕೊಡುಗೆ ಶೇ 90ರಷ್ಟಿದೆ. ಶಾಸಕರನ್ನು ಅಮಾನತು ಮಾಡಿದ್ದು ಇಡೀ ಸದನ ತೆಗೆದುಕೊಂಡ ತೀರ್ಮಾನ. ಈ ತೀರ್ಮಾನ ಸರಿ ಎಂದು ಬಹುತೇಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ’ ಎಂದರು.

‘ಶಾಸಕರಾದ ಬಸನಗೌಡ ಪಾಟೀಲ ಯತ್ನಾಳ್ ಹಾಗೂ ವಿ.ಸುನಿಲ್ ಕುಮಾರ್ ಸದನದಲ್ಲಿ ಹನಿಟ್ರ್ಯಾಪ್ ವಿಚಾರ ಪ್ರಸ್ತಾಪಿಸಿದಾಗ ಚರ್ಚೆಗೆ ಅವಕಾಶ ನೀಡಿದ್ದೆ. ಈ ಬಗ್ಗೆ ಗೃಹಸಚಿವ ಜಿ.ಪರಮೇಶ್ವರ ಅವರು ಉತ್ತರವನ್ನೂ ನೀಡಿದಾಗ ಅದಕ್ಕೆ ಒಪ್ಪಿ ವಿರೋಧ ಪಕ್ಷದ ಶಾಸಕರೂ ಸುಮ್ಮನೆ ಕುಳಿತಿದ್ದರು. ಅಧಿವೇಶನದ ಕೊನೆಯ ದಿನ ಬಜೆಟ್ ಕುರಿತ ಚರ್ಚೆಗೆ ಉತ್ತರಿಸಲು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಶುರುಮಾಡಿದಾಗ ಈ ವಿಚಾರವನ್ನು ವಿರೋಧ ಪಕ್ಷದವರು ಮತ್ತೆ ಪ್ರಸ್ತಾಪಿಸಿದರು. ‘ಈ ಬಗ್ಗೆ ಉನ್ನತ ಮಟ್ಟದ ಸಮಿತಿ ರಚಿಸಿ ತನಿಖೆ ನಡೆಸುತ್ತೇವೆ. ತನಿಖೆಯನ್ನು ಸಿಬಿಐಗೆ ಒಪ್ಪಿಸಬೇಕೋ ಅಥವಾ ನ್ಯಾಯಾಧೀಶರಿಂದ ನಡೆಸಬೇಕೋ ಎಂಬ ಬಗ್ಗೆ ಶೀಘ್ರವೇ ಸಮಿತಿ ತೀರ್ಮಾನಿಸಲಿದೆ’ ಎಂದು ಮುಖ್ಯಮಂತ್ರಿ ಸ್ಪಷ್ಟಪಡಿಸಿದ್ದರು. ಸಿ.ಎಂ ಉತ್ತರದ ಬಳಿಕ ವಿರೋಧ ಪಕ್ಷದವರು ಧನವಿನಿಯೋಗ ಮಸೂದೆ ಮಂಡನೆಗೆ ಅವಕಾಶ ನೀಡದೇ, ಗದ್ದಲ ನಡೆಸಿದ್ದು ಸರಿಯೇ’ ಎಂದು ಖಾದರ್ ಪ್ರಶ್ನಿಸಿದರು.

‘ಧನವಿನಿಯೋಗ ಮಸೂದೆ ಮಂಡನೆಗೆ ಅವಕಾಶ ಕಲ್ಪಿಸುವುದು ಸಭಾಧ್ಯಕ್ಷರ ಜವಾಬ್ದಾರಿ. ಈ ಮಸೂದೆ ಅಂಗೀಕಾರ ಆಗದಿದ್ದರೆ ಅಧಿಕಾರಿಗಳಿಗೆ ಸಂಬಳ ಆಗುವುದಿಲ್ಲ. ಸರ್ಕಾರದ ಯಾವುದೇ ಖಾತೆಗಳಿಗೆ ಹಣ ಹಾಕಲು, ಅನುದಾನ ಬಿಡುಗಡೆ ಮಾಡಲು ಸಾಧ್ಯವಾಗುವುದಿಲ್ಲ. ಬೇರೆ ಮಸೂದೆಗಳ ತರಹ ಈ ಮಸೂದೆಯ ಮಂಡನೆಯನ್ನು ಮುಂದೂಡಲು ಸಾಧ್ಯವಿಲ್ಲ. ಹಾಗಾಗಿ ಯಾರೂ ಈ ಮಸೂದೆ ಮಂಡನೆಗೆ ಅಡ್ಡಿಪಡಿಸುವುದಿಲ್ಲ. ಶಾಸಕರು ಏನೇ ಗದ್ದಲ ನಡೆಸಿದರೂ ಅದನ್ನೆಲ್ಲ ಸಹಿಸಿಕೊಂಡು ಈ ಮಸೂದೆ ಅಂಗೀಕಾರ ಆಗುವಂತೆ ನೋಡಿಕೊಂಡಿದ್ದೇನೆ’ ಎಂದರು.

ಈ ಹಿಂದೆ ವಿಧಾನ ಪರಿಷತ್ತಿನಲ್ಲಿ ಸಭಾಪತಿಯ ಪೀಠದಲ್ಲಿದ್ದವರನ್ನು ಕೆಳಕ್ಕಿಳಿಸಿದ ಘಟನೆ ನಡೆದಾಗ ಇಷ್ಟು ಕಠಿಣ ಕ್ರಮ ಆಗಿರಲಿಲ್ಲ ಅಲ್ಲವೇ ಎಂಬ ಪ್ರಶ್ನೆಗೆ, ‘ಆಗ ಕಠಿಣ ಕ್ರಮ ಕೈಗೊಳ್ಳದೇ ಇದ್ದುದರಿಂದಲೇ ಇಂತಹ ಘಟನೆಗಳು ಮರುಕಳಿಸಿವೆ. ಹಿಂದಿನವರು ಕ್ರಮ ಕೈಗೊಂಡಿಲ್ಲ ಎಂದು ನಾನು ಸುಮ್ಮನೆ ಇದ್ದರೆ ಭವಿಷ್ಯದಲ್ಲಿ ಎಲ್ಲ ಮಸೂದೆ ಮಂಡನೆ ವೇಳೆ ಇವರು ಬಂದು ಪೀಠದಲ್ಲಿ ಕುಳಿತುಕೊಳ್ಳಬಹುದು. ಈ ಬಗ್ಗೆ ಯಾರಾದರೂ ಕಠಿಣ ತೀರ್ಮಾನ ಕೈಗೊಳ್ಳಲೇಬೇಕು. ಹಿಂದಿನವರಿಗೆ ಧೈರ್ಯ ಇರಲಿಲ್ಲ, ಹಾಗಾಗಿ ಕಠಿಣ ಕ್ರಮ ಕೈಗೊಂಡಿಲ್ಲ. ನನಗೆ ಧೈರ್ಯವಿದೆ ನಾನು ಕಠಿಣ ಕ್ರಮ ಕೈಗೊಂಡಿದ್ದೇನೆ’ ಎಂದು ಕ್ರಮವನ್ನು ಸಮರ್ಥಿಸಿಕೊಂಡರು. ಈ ತೀರ್ಮಾನದಲ್ಲಿ ಮುಖ್ಯಮಂತ್ರಿ ಯಾವುದೇ ಹಸ್ತಕ್ಷೇಪ ಮಾಡಿಲ್ಲ ಎಂದರು.

‘ಇದಷ್ಟೇ ಅಲ್ಲ, ಈ ಹಿಂದೆ ಪಕ್ಷಾಂತರ ನಡೆದಾಗ ನಾನೇನಾದರೂ ಸಭಾಧ್ಯಕ್ಷ ಆಗಿರುತ್ತಿದ್ದರೆ ಅಂತಹ ಶಾಸಕರನ್ನು ತಕ್ಷಣವೇ ವಜಾಗೊಳಿಸುತ್ತಿದ್ದೆ. ಬೇಕಿದ್ದರೆ ಆ ನಿರ್ಣಯವನ್ನು ಅವರು ನ್ಯಾಯಾಲಯದಲ್ಲಿ ಪ್ರಶ್ನಿಸಬಹುದು. ಪಕ್ಷಾಂತರ ನಿಷೇಧ ಕಾಯ್ದೆ ದುರ್ಬಲವಾಗಿಲ್ಲ. ಅದು ಬಲಿಷ್ಠವಾಗಿಯೇ ಇದೆ. ಅದನ್ನು ಹೇಗೆ ಬಳಸುತ್ತೇವೆ ಎಂಬುದು ಮುಖ್ಯ’ ಎಂದರು.

‘ನಾನು ತೆಗೆದುಕೊಂಡ ಕ್ರಮದಿಂದಾಗಿ ರಾಜ್ಯದ ಗೌರವ ಉಳಿದಿದೆ. ಇಲ್ಲದಿದ್ದರೆ ಶಾಸಕರು ಹೀಗೆಲ್ಲ ನಡೆದುಕೊಂಡರೂ ಏನೂ ಕ್ರಮ ಆಗಿಲ್ಲ ಎಂದು ಜನ ಆಡಿಕೊಳ್ಳುತ್ತಿದ್ದರು. ರಾಜಕೀಯವಾಗಿ ಇದನ್ನು ಒಬ್ಬೊಬ್ಬರು ಒಂದೊಂದು ರೀತಿ ವ್ಯಾಖ್ಯಾನಿಸಬಹುದು. ನಾನು ಈ ಕುರಿತ ರಾಜಕೀಯದ ಬಗ್ಗೆ ಮಾತನಾಡುವುದಿಲ್ಲ. ಅದನ್ನು ಜನ ಅರ್ಥೈಸಿಕೊಳ್ಳುತ್ತಾರೆ. ಸದನದಲ್ಲಿ ಏನು ನಡೆಯಿತು ಎಂಬುದನ್ನು ಸಣ್ಣ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೂ ನೋಡಿದ್ದಾರೆ. ನನ್ನ ತೀರ್ಮಾನ ಸರಿಯೋ ತಪ್ಪೋ ಎಂದು ಅವರೇ ತೀರ್ಮಾನಿಸಲಿ. ನಾನು ಸಂವಿಧಾನದ ಪರವಾಗಿ ನಿಂತಿದ್ದೇನೆ‘ ಎಂದರು.

ವಿಧಾನಸೌಧಕ್ಕೆ ದೀಪಾಲಂಕಾರ : ‘ವಿಧಾನಸೌಧಕ್ಕೆ ಇನ್ನು ವರ್ಷಪೂರ್ತಿ ಪ್ರತಿ ಶನಿವಾರ ಮತ್ತು ಭಾನುವಾರ ವಿದ್ಯುತ್ ದೀಪಾಲಂಕಾರ ಮಾಡಲಾಗುತ್ತದೆ. ಸಂಜೆ 6ರಿಂದ 9 ಗಂಟೆವರೆಗೆ ದೀಪಾಲಂಕಾರ ಇರಲಿದೆ. ಇದಕ್ಕೆ ಮುಖ್ಯಮಂತ್ರಿಯವರು ಏಪ್ರಿಲ್ ಮೊದಲ ವಾರದಲ್ಲಿ ಚಾಲನೆ ನೀಡುವರು’ ಎಂದು ಖಾದರ್ ತಿಳಿಸಿದರು.

‘ದೀಪಾಲಂಕಾರಕ್ಕೆ ಎಲ್ಇಡಿ ಬಳಸುವುದರಿಂದ ವಿದ್ಯುತ್ಗೆ ಹೆಚ್ಚೇನೂ ವೆಚ್ಚವಾಗದು. ಈ ಹಿಂದೆ ರಾಷ್ಟ್ರೀಯ ಹಬ್ಬದ ಸಂದರ್ಭದಲ್ಲಿ ದೀಪಾಲಂಕಾರ ಮಾಡಲಾಗುತ್ತಿತ್ತು. ಪ್ರತಿ ಸಲವೂ ₹30 ಲಕ್ಷದವರೆಗೆ ವೆಚ್ಚವಾಗುತ್ತಿತ್ತು. ಈ ರೀತಿ ಎರಡು ವರ್ಷದಲ್ಲಿ ಮಾಡುವ ವೆಚ್ಚದಲ್ಲಿ ಶಾಶ್ವತ ವ್ಯವಸ್ಥೆ ಕಲ್ಪಿಸಬಹುದು ಎಂಬ ಕಾರಣಕ್ಕೆ ಈ ತೀರ್ಮಾನ ಕೈಗೊಂಡಿದ್ದೇನೆ. ಇದನ್ನು ಪ್ರಾಯೋಗಿಕವಾಗಿ ಅನುಷ್ಠಾನ ಮಾಡುತ್ತಿರುವಾಗಲೇ ಜನರಿಂದ ಉತ್ತಮ ಪ್ರತಿಕ್ರಿಯೆ ಬಂದಿದೆ’ ಎಂದರು.

‘ವಿಧಾನ ಸಭೆಯ ಮೊಗಸಾಲೆಯಲ್ಲಿ ಇತಿಹಾಸ ಪರಿಚಯಿಸಲು ಪೋಟೊ ಗ್ಯಾಲರಿ ಸ್ಥಾಪಿಸಿದ್ದೇವೆ. ಮೈಸೂರು ರಾಜ್ಯದಲ್ಲಿ ಬ್ರಿಟಿಷರ ವಿರೋಧದ ನಡುವೆಯೇ 1861ರಲ್ಲೇ ಪ್ರಜಾಪ್ರತಿನಿಧಿ ಸಭೆ ಆರಂಭವಾಗಿತ್ತು. ದೇಶಕ್ಕೆ ಸ್ವಾತಂತ್ರ್ಯ ಬಂದ ಬಳಿಕ ಕೆಲಕಾಲ ಈಗಿನ ಹೈಕೋರ್ಟ್ ಇರುವ ಅಠಾರ ಕಚೇರಿಯಲ್ಲಿ ವಿಧಾನಸಭೆಯ ಕಲಾಪ ನಡೆಯುತ್ತಿತ್ತು. ಇತಿಹಾಸದ ಇಂತಹ ಮಾಹಿತಿ ಅನೇಕರಿಗೆ ತಿಳಿದಿಲ್ಲ. ಇಂತಹ ಐತಿಹಾಸಿಕ ವಿಚಾರಗಳ ಬಗ್ಗೆ ಬೆಳಕು ಚೆಲ್ಲುವ ಛಾಯಾಚಿತ್ರಗಳನ್ನು ವಿಧಾನಸಭೆಯ ಗೋಡೆಗಳಲ್ಲಿ ಅಳವಡಿಸಲಿದ್ದೇವೆ. ವಿಧಾನ ಸೌಧದ ಕೆಳಗಿನ ಮಹಡಿಯಲ್ಲೂ ಬೀಟೆ ಮರದಿಂದ (ರೋಸ್ ವುಡ್) ತಯಾರಿಸಿದ ದ್ವಾರವನ್ನೂ ಅಳವಡಿಸಲಿದ್ದೇವೆ’ ಎಂದರು. ಎಂದರು.

ಉತ್ತರ ನೀಡದ ಅಧಿಕಾರಿಗಳ ವಿರುದ್ಧ ಕ್ರಮ: ‘ವಿಧಾನಸಭೆಯಲ್ಲಿ ಶಾಸಕರು ಕೇಳಿದ ಪ್ರಶ್ನೆಗಳಿಗೆ ಕೆಲ ಅಧಿಕಾರಿಗಳು ಉತ್ತರ ನೀಡುವುದಿಲ್ಲ. ಇಂತಹ ಅಧಿಕಾರಿಗಳ ವಿರುದ್ಧ ಕ್ರಮಕೈಗೊಳ್ಳಲು ವಿಧಾನಸಭಾ ಉಪಾಧ್ಯಕ್ಷರ ನೇತೃತ್ವದಲ್ಲಿ ಸಮಿತಿ ರಚಿಸಿದ್ದೇನೆ. ಯಾವುದೇ ಪ್ರಶ್ನೆಗೆ ಮೂರು ತಿಂಗಳ ಒಳಗೆ ಉತ್ತರ ಸಿಗದಿದ್ದರೆ ಶಾಸಕರು ಈ ಸಮಿತಿಗೆ ದೂರು ನೀಡಬಹುದು. ಸಮಿತಿಯ ಅಧ್ಯಕ್ಷರು ಸಂಬಂಧ ಪಟ್ಟ ಅಧಿಕಾರಿಯನ್ನು ಕರೆಸಿ ವಿಚಾರಣೆ ನಡೆಸಿ ಕ್ರಮಕ್ಕೆ ಶಿಫಾರಸು ಮಾಡಲಿದ್ದಾರೆ’ ಎಂದು ಅವರು ಮಾಹಿತಿ ನೀಡಿದರು.

‘ವಿಧಾನಸಭೆಯ 16ನೇ ಅಧಿವೇಶನ ಅತ್ಯಂತ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಬಜೆಟ್ ಮೇಲಿನ ಚರ್ಚೆಯಲ್ಲಿ ಭಾಗವಹಿಸಲು ಎಲ್ಲ ಶಾಸಕರಿಗೂ ಅವಕಾಶ ಕಲ್ಪಿಸಿದ್ದೇನೆ. ಶೇ 80ರಷ್ಟು ಶಾಸಕರು ಈ ಬಗ್ಗೆ ಮಾತನಾಡಿದ್ದಾರೆ’ ಎಂದರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಅಶಿಸ್ತು ಮರುಕಳಿಸಿದರೆ ಇನ್ನಷ್ಟು ಕಠಿಣ ಕ್ರಮ: ವಿಧಾನಸಭಾಧ್ಯಕ್ಷ ಎಚ್ಚರಿಕೆ

ಚಿನಕುರುಳಿ: 03 ಜುಲೈ 2025 ಗುರುವಾರ

ಚುರುಮುರಿ | ಬದಲಾವಣೆ ಕ್ರಾಂತಿ!

ದಿನ ಭವಿಷ್ಯ | ಎಲ್ಲಾ ವಿಚಾರಗಳಲ್ಲಿಯೂ ಸಾವಧಾನವಾಗಿ ಮುಂದುವರಿಯಿರಿ

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

IND vs ENG: ಟೆಸ್ಟ್ ಕ್ರಿಕೆಟ್‌ನಲ್ಲಿ ಶುಭಮನ್ ಗಿಲ್ ಚೊಚ್ಚಲ ದ್ವಿಶತಕ ಸಾಧನೆ

ಫಿಡೆ ವಿಶ್ವ ಕೆಡೆಟ್ಸ್‌ ಕಪ್‌: ಚಿನ್ನ ಗೆದ್ದ ಪ್ರತೀತಿ, ಆದ್ಯಾಗೆ ಬೆಳ್ಳಿ

IND vs ENG: ಗಿಲ್ 168*, ಜಡೇಜ 89; ಊಟದ ವಿರಾಮಕ್ಕೆ ಭಾರತ 419/6

ಭಾರತದಲ್ಲಿ ನಡೆಯಲಿರುವ ಏಷ್ಯಾ ಕಪ್ ಹಾಕಿಯಲ್ಲಿ ಆಡಲು ಪಾಕಿಸ್ತಾನಕ್ಕೆ ಅವಕಾಶ: ವರದಿ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ: 03 ಜುಲೈ 2025 ಗುರುವಾರ

ಚುರುಮುರಿ | ಬದಲಾವಣೆ ಕ್ರಾಂತಿ!

ದಿನ ಭವಿಷ್ಯ | ಎಲ್ಲಾ ವಿಚಾರಗಳಲ್ಲಿಯೂ ಸಾವಧಾನವಾಗಿ ಮುಂದುವರಿಯಿರಿ

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ