ಪ್ರಜಾವಾಣಿ ದೀಪಾವಳಿ ವಿಶೇಷಾಂಕ: ಕಥೆ, ಕವನ ಸ್ಪರ್ಧೆ; ದಯಾನಂದ, ಲಕ್ಷ್ಮಣಗೆ ಬಹುಮಾನ

ಇಲ್ಲಿನ ಕಥೆಗಳ ಓದು, ಸಮಕಾಲೀನ ಸಮಾಜದ ವಿದ್ಯಮಾನಗಳಿಗೆ ನಮ್ಮನ್ನು ಮುಖಾಮುಖಿಯಾಗಿಸುತ್ತ, ಆ ಬೆಳವಣಿಗೆಗಳಲ್ಲಿ ನಮ್ಮ ಜವಾಬ್ದಾರಿಯನ್ನು ಪ್ರಶ್ನಿಸುವಂತೆ, ಸಾಮಾಜಿಕ ಸ್ವಾಸ್ಥ್ಯಕ್ಕೆ ನಮ್ಮ ಕೊಡುಗೆ ಏನಾಗಿರಬೇಕೆಂಬ ವಿಚಾರದಲ್ಲಿ ಸೂಕ್ಷ್ಮಜ್ಞರನ್ನಾಗಿಸುತ್ತದೆ

ಹೆಚ್ಚು ಕಡಿಮೆ ಒಂದು ದಶಕದಿಂದೀಚೆಗೆ ಕನ್ನಡದಲ್ಲಿ ಕಥೆ ಕಾದಂಬರಿಗಳ ಸುಗ್ಗಿಯನ್ನೇ ಕಾಣುತ್ತಿದ್ದೇವೆ. ಹೊಸ ತಲೆಮಾರಿನ ಕಥನಕಾರರು ಕಥೆ, ಕಾದಂಬರಿ ಪ್ರಕಾರಗಳ ದಿಗಂತವನ್ನು ಅಚ್ಚರಿಯೆನಿಸುವಂತೆ ವಿಸ್ತರಿಸುತ್ತಿದ್ದಾರೆ.

ಕೆಲವು ಕವಿತೆಗಳ ಒಳ ಬಿಕ್ಕುಗಳು, ಹೇಳಿಕೊಳ್ಳಲಾರದ ಸಂಕಟಗಳು, ಸಮಾಜದ ಒಳರಚನೆಗಳಲ್ಲಿ ಅಡಗಿರುವ ಹಿಂಸೆಯ ನೆಲೆಗಳು ಸೂಕ್ಷ್ಮವಾದ ಹೊಸ ನುಡಿಗಟ್ಟಿನಲ್ಲಿ ಕಾವ್ಯದ ಅನುಭವವಾಗಿ ರೂಪುಗೊಂಡಿದ್ದವು. ಕೊನೆಗೆ ಅವು ಪುಟಗಳಲ್ಲಿ ಮುಗಿದರೂ ಮನಸ್ಸಿನಲ್ಲಿ ಬೆಳೆಯತೊಡಗಿದವು.

ಇತ್ತೀಚೆಗೆ ಬಹುಮಾನ ಗೆಲ್ಲುವ ಹುಕಿಗೆ ಬಿದ್ದಂತ ಬರವಣಿಗೆಗಳು ಹೆಚ್ಚುತ್ತಿವೆ. ಹೀಗೆ ಬರೆದರೆ ಗಮನಸೆಳೆಯಬಹುದೆಂಬ ‘ಪ್ಯಾಟರ್ನ್’ ಒಂದನ್ನು ರೂಪಿಸಿಕೊಳ್ಳಲಾಗುತ್ತಿದೆ. ಆ ಸವಕಲು ಜಾಡಿನಲ್ಲಿ ನಡೆಯುವ ಕಾವ್ಯ ಜೀವಾಂತಃಕರಣವನ್ನು ಸೋಕದೇ ರೆಡಿಮೇಡ್ ಹೂವಿನಂತೆ ಕಂಗೊಳಿಸುತ್ತದೆ.