ಲಾಸ್ ಏಂಜಲೀಸ್: ಯುನಿವರ್ಸಿಟಿ ಆಫ್ ಕ್ಯಾಲಿಫೋರ್ನಿಯಾ, ಲಾಸ್ ಏಂಜಲೀಸ್ ಕ್ಯಾಂಪಸ್ನಲ್ಲಿ ಪ್ಯಾಲೆಸ್ಟೀನ್ ಪರ ಪ್ರತಿಭಟನೆಯಿಂದಾಗಿ ಬುಧವಾರ ಘರ್ಷಣೆ ಏರ್ಪಟ್ಟಿತ್ತು.
ಪ್ಯಾಲೆಸ್ಟೀನ್ ಪರ ಮತ್ತು ಇಸ್ರೇಲ್ ಪರ ಗುಂಪಿನ ಮಧ್ಯೆ ಘರ್ಷಣೆ ನಡೆದಿದೆ ಎಂದು ‘ಸಿಎನ್ಎನ್’ ವರದಿ ಮಾಡಿದೆ.
‘ವಿಶ್ವವಿದ್ಯಾಲಯದ ಮನವಿಯ ಮೇರೆಗೆ ಕ್ಯಾಂಪಸ್ನಲ್ಲಿ ಪೊಲೀಸರನ್ನು ನಿಯೋಜಿಸಲಾಗಿದೆ. ಸ್ಥಳಕ್ಕೆ ಬಂದ ಪೊಲೀಸರು ಉದ್ರಿಕ್ತ ಗುಂಪುಗಳನ್ನು ನಿಯಂತ್ರಿಸಿ ಪರಿಸ್ಥಿತಿಯನ್ನು ಶಾಂತಗೊಳಿಸಿದ್ದಾರೆ’ ಎಂದು ಲಾಸ್ ಏಂಜಲೀಸ್ ಪೊಲೀಸರು ‘ಎಕ್ಸ್’ ಮೂಲಕ ತಿಳಿಸಿದ್ದಾರೆ.
ಪರ–ವಿರೋಧಿ ಪ್ರತಿಭಟನಕಾರರು ಬಡಿಗೆ ಮೂಲಕ ಪರಸ್ಪರ ಹೊಡೆದಾಡಿಕೊಂಡ ದೃಶ್ಯ ಟಿ.ವಿಯಲ್ಲಿ ಬಿತ್ತರವಾಗಿದೆ.
ಇನ್ನೊಂದೆಡೆ ಪಟಾಕಿ ಸಿಡಿಸುವ ಮತ್ತು ವಸ್ತುಗಳನ್ನು ಪರಸ್ಪರರ ವಿರುದ್ಧ ಎಸೆದ, ಬ್ಯಾರಿಕೇಡ್ಗಳನ್ನು ತಳ್ಳಿದ ದೃಶ್ಯಗಳೂ ಇವೆ.