ಉದ್ಯಮದ ಒಳಿತಿಗೆ ಪೇಟೆಂಟ್‌ಗಳ ಉಚಿತ ಹಂಚಿಕೆ
ಸಾಂಪ್ರದಾಯಿಕ ಉದ್ದಿಮೆ ವಹಿವಾಟು ಚಿಂತನೆಯು ಕೆಲ ಸಂದರ್ಭಗಳಲ್ಲಿ ಅವಿವೇಕತನದ್ದು ಎಂದು ಭಾಸವಾಗಿ ಅದಕ್ಕೆ ಎಳ್ಳುನೀರು ಬಿಡಲಾಗುತ್ತದೆ. ಜಾಗತಿಕ ಉದ್ಯಮ ರಂಗದಲ್ಲಿ ಈಗ ಹೊಸದೊಂದು ಚಿಂತನೆ ಮೊಳಕೆಯೊಡೆದಿದೆ. ಹಣ ಖರ್ಚು ಮಾಡಿ ಸಂಶೋಧನೆ ನಡೆಸಿ ಪಡೆದುಕೊಂಡಿದ್ದ ಪೇಟೆಂಟ್‌ಗಳನ್ನು ಉದ್ಯಮದ ಒಳಿತಿಗೆ ಉಚಿತವಾಗಿ ಹಂಚಿಕೆ ಮಾಡುವ ಆಲೋಚನೆಯೊಂದು ವಾಹನ ತಯಾರಿಕಾ ರಂಗದಲ್ಲಿ ಜಾರಿಗೆ ಬಂದಿದೆ.
ಜಾಗತಿಕ ಯಶಸ್ವಿ ಉದ್ಯಮಿಗಳಲ್ಲಿ ಒಬ್ಬರಾಗಿರುವ ಇಲೊನ್ ಮಸ್ಕ್ ತಮ್ಮೆಲ್ಲ ಸಂಶೋಧನೆಗಳನ್ನು ಇಡೀ ಜಗತ್ತಿಗೆ ಉಚಿತವಾಗಿ ನೀಡಲು ಮುಂದಾಗಿ ಅಚ್ಚರಿ ಮೂಡಿಸಿದ್ದಾರೆ. ತಾವು ಪಡೆದುಕೊಂಡಿದ್ದ ಪೇಟೆಂಟ್‌ಗಳನ್ನು ತಮ್ಮ ಉದ್ಯಮ ಪ್ರತಿಸ್ಪರ್ಧಿ ಸಂಸ್ಥೆಗಳೂ ಸೇರಿದಂತೆ ಯಾರು ಬೇಕಾದರೂ ಬಳಸಿಕೊಳ್ಳಬಹುದು ಎಂದೂ ಘೋಷಿಸಿದ್ದಾರೆ.
ಮಸ್ಕ್ ಅವರು, ಸಮಕಾಲೀನ ಜಗತ್ತಿನಲ್ಲಿ ಅತ್ಯಂತ ಯಶಸ್ವಿ ಮತ್ತು ಸದಾ ಹೊಸತನಕ್ಕೆ ತುಡಿಯುವ ಉದ್ಯಮಿಯಾಗಿದ್ದಾರೆ. ಇವರನ್ನು ಮೈಕ್ರೊಸಾಫ್ಟ್‌ನ ಬಿಲ್ ಗೇಟ್ಸ್, ಆ್ಯಪಲ್‌ನ ದಿವಂಗತ ಸ್ಟೀವ್ ಜಾಬ್ಸ್ ಅವರ ಸಾಲಿಗೆ ಸೇರಿಸಲಾಗುತ್ತಿದೆ. ಮಸ್ಕ್ ಅವರ ತಂತ್ರಜ್ಞಾನ ಆಧಾರಿತ ವೈವಿಧ್ಯಮಯ ಆಸಕ್ತಿಗಳು ಮತ್ತು ಅಸಾಧಾರಣ ಸಾಮರ್ಥ್ಯವು ವಿಶ್ವದಾದ್ಯಂತ ಕೈಗಾರಿಕೋದ್ಯಮಿಗಳ ಮತ್ತು ಆರ್ಥಿಕ ತಜ್ಞರ ಗಮನ ಸೆಳೆದಿವೆ. ಹೊಸದಾಗಿ ಆರಂಭಿಸಲಾದ ಯಶಸ್ವಿ ಉದ್ಯಮಗಳನ್ನು ಖರೀದಿಸಿ ಅವುಗಳನ್ನು ಇನ್ನಷ್ಟು ಯಶಸ್ಸಿನ ಹಾದಿಯಲ್ಲಿ ಸಾಗಿಸುವುದು ಮಸ್ಕ್ ಅವರಿಗೆ ಕರತಲಾಮಲಕವಾಗಿದೆ.
ವಿದ್ಯುನ್ಮಾನ ವಾಹನ ತಯಾರಿಕೆಯ ಅವರ ಉದ್ದಿಮೆಯು ಭಾಗಶಃ ಯಶಸ್ವಿಯಾಗಿದೆ. ವಿಶ್ವದ ವಾಹನ ತಯಾರಿಕಾ ರಂಗದಲ್ಲಿ ಇನ್ನಷ್ಟು ಹೊಸತನ ತರುವ ಅವರ ಕನಸಿಗೆ ಇದು ತಣ್ಣೀರು ಎರಚಿದೆ. ಎಲೆಕ್ಟ್ರಾನಿಕ್ ವಾಹನಗಳ ಬಳಕೆ ಉತ್ತೇಜಿಸುವ ಅವರ ಹೆಬ್ಬಯಕೆಗೆ ನಿರೀಕ್ಷಿತ ರೀತಿಯಲ್ಲಿ ಯಶಸ್ಸು ದೊರೆತಿಲ್ಲ. ಇವರ ಟೆಲ್ಸಾ ಮೋಟಾರ್ಸ್‌ನ ಎಲೆಕ್ಟ್ರಾನಿಕ್ ವಾಹನಗಳ ಮಾರಾಟ ನಿರೀಕ್ಷಿತ ಮಟ್ಟದಲ್ಲ್ಲಿ ಇಲ್ಲ.
ಕಳೆದ ವರ್ಷ ಅಮೆರಿಕದಲ್ಲಿ ಟೆಲ್ಸಾ ಮೋಟಾರ್ಸ್‌ನ ಕೇವಲ 30 ಸಾವಿರ ವಾಹನಗಳು ಮಾರಾಟವಾಗಿವೆ. ಪ್ರತಿಯೊಂದು ವಾಹನಕ್ಕೆ 70 ಸಾವಿರ ಡಾಲರ್ ಬೆಲೆ (₨ 42 ಲಕ್ಷ) ನಿಗದಿಯಾಗಿರುವುದೂ ಮಾರಾಟ ಕಡಿಮೆಯಾಗಿರಲು ಕಾರಣವಾಗಿರಬಹುದು. ಈ ಎಲ್ಲ ಪ್ರತಿಕೂಲತೆಗಳ ಮಧ್ಯೆ, ಅವರು ವಾಹನ ತಯಾರಿಕೆ ಉದ್ಯಮಕ್ಕೆ ಚೇತರಿಕೆ ನೀಡಬೇಕೆಂಬ ಉತ್ಸಾಹ ಕಳೆದುಕೊಂಡಿಲ್ಲ.
ವಾಹನದ ಬ್ಯಾಟರಿ ವಿನ್ಯಾಸದ ನೂರಕ್ಕೂ ಹೆಚ್ಚು ಪೇಟೆಂಟ್ ಸೇರಿದಂತೆ ಮಸ್ಕ್ ಅವರ ಕಂಪೆನಿಯು 2 ಸಾವಿರಕ್ಕೂ ಹೆಚ್ಚು ಪೇಟೆಂಟ್‌ಗಳನ್ನು ಇತರರ ಬಳಕೆಗೆ ಉಚಿತವಾಗಿ ಬಿಟ್ಟುಕೊಟ್ಟಿದೆ.
ಎಲೆಕ್ಟ್ರಿಕಲ್ ವಾಹನಗಳ ದಕ್ಷತೆ ಕಡಿಮೆಯಾಗಲು ಅವುಗಳ ಬ್ಯಾಟರಿಯ ಕಳಪೆ ಕಾರ್ಯಕ್ಷಮತೆಯೇ ಕಾರಣ ಎಂದು ಗುರುತಿಸಿರುವ ಮಸ್ಕ್, ಬ್ಯಾಟರಿಯ ತೂಕ, ಜೀವಿತಾವಧಿ, ಉಪಯುಕ್ತತೆ ಹೆಚ್ಚಳಕ್ಕೆ ಸಂಬಂಧಿಸಿದ ರಂಗದಲ್ಲಿ ಸಂಶೋಧನೆ ನಡೆಸಲು ಅಪಾರ ಪ್ರಮಾಣದಲ್ಲಿ ಹಣ ತೊಡಗಿಸಿದ್ದಾರೆ. ಇಂತಹ ಸಂಶೋಧನಾ ಕಾರ್ಯಕ್ರಮಗಳಿಂದ ಅವರ ಸಂಸ್ಥೆಗೆ ಲಾಭ ದೊರೆಯುವುದು ನಿಜವಾಗಿದ್ದರೂ, ಆರಂಭಿಕ ಯಶಸ್ಸು ಸೀಮಿತವಾಗಿತ್ತು. ಇದು ಅವರು ಹೊಸ ರೀತಿಯಲ್ಲಿ ಚಿಂತನೆ ನಡೆಸಲು ಪ್ರೇರಣೆ ನೀಡಿದೆ.
ಎಲೆಕ್ಟ್ರಿಕಲ್ ವಾಹನ ತಯಾರಿಕಾ ರಂಗದಲ್ಲಿ ಮಾರಾಟ ಹೆಚ್ಚಳಗೊಳ್ಳಲು ಈ ವಲಯದಲ್ಲಿನ ಎಲ್ಲ ಉದ್ದಿಮೆ ಸಂಸ್ಥೆಗಳ ಸಹಕಾರ ತುಂಬ ಅಗತ್ಯ ಎಂದು ಮನಗಂಡಿರುವ ಮಸ್ಕ್, ಸಾಂಪ್ರದಾಯಿಕ ಇಂಧನ ಚಾಲಿತ ವಾಹನಗಳ ಸ್ಪರ್ಧೆಯನ್ನು ಸಮರ್ಥವಾಗಿ ಎದುರಿಸಲು ಜಂಟಿ ಪ್ರಯತ್ನದಿಂದ ಮಾತ್ರ ಸಾಧ್ಯ ಎಂದು ಬಲವಾಗಿ ನಂಬಿದ್ದಾರೆ. ವರ್ಷಗಳ ಕಾಲ ನಡೆಸಿರುವ ಸಂಶೋಧನೆಗಳನ್ನು ಮತ್ತು ಖರೀದಿಸಿರುವ ಪೇಟೆಂಟ್‌ಗಳನ್ನು ತಮ್ಮ ಪ್ರತಿಸ್ಪರ್ಧಿಗಳ ಜತೆ ಹಂಚಿಕೊಳ್ಳಲು ಮುಂದಾಗುವ ಮೂಲಕ ಅವರು ವಾಹನ ತಯಾರಿಕಾ ಪ್ರಪಂಚದಲ್ಲಿ ತಮ್ಮ ಉದ್ದಿಮೆ ಸಂಸ್ಥೆಯ ಭವಿಷ್ಯವನ್ನೇ ಒತ್ತೆ ಇಟ್ಟಂತಾಗಿದೆ.
ಮಹೇಂದ್ರಾ ರೇವಾ ಎಲೆಕ್ಟ್ರಾನಿಕ್ ವೆಹಿಕಲ್ ಪ್ರೈವೇಟ್ ಲಿಮಿಟೆಡ್‌ನ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಯಾಗಿರುವ (ಸಿಇಒ) ಚೇತನ್ ಮೈನಿ ಅವರು, ಈ ಐತಿಹಾಸಿಕ ಬೆಳವಣಿಗೆಯನ್ನು ತುಂಬು ಹೃದಯದಿಂದ ಸ್ವಾಗತಿಸಿದ್ದಾರೆ.
ಈ ಬದಲಾವಣೆಯು ಭವಿಷ್ಯದಲ್ಲಿ ವಾಹನ ತಯಾರಿಕಾ ರಂಗದ ಚಿತ್ರಣವನ್ನೇ ಬದಲಿಸಲಿ-ದೆಯೇ? ಎನ್ನುವ ಅನುಮಾನಗಳೂ ಈ ಸಂದರ್ಭದಲ್ಲಿ ಕಾಡುತ್ತಿವೆ. ಉದ್ದಿಮೆ ಸಂಸ್ಥೆಗಳು ಸಂಶೋಧನಾ ಕಾರ್ಯಕ್ರಮಗಳಿಗೆ ದೊಡ್ಡ ಮೊತ್ತದ ಹಣ ಹೂಡಿಕೆ ಮಾಡಿ ಬೌದ್ಧಿಕ ಆಸ್ತಿ ಹಕ್ಕುಗಳನ್ನು ಪಡೆದುಕೊಳ್ಳುತ್ತವೆ. ಆನಂತರ ಈ ಉದ್ದಿಮೆ ಸಂಸ್ಥೆಗಳು ಪರಿಣತರು ಮತ್ತು ವೃತ್ತಿನಿರತರ ಸೇವೆ ಪಡೆದುಕೊಂಡು ತಾವು ಪಡೆದುಕೊಂಡಿದ್ದ ಪೇಟೆಂಟ್‌ಗಳನ್ನು ಜೋಪಾನದಿಂದ ಕಾಯ್ದುಕೊಂಡಿರುತ್ತವೆ.
ಕೆಲ ಪ್ರಕರಣಗಳಲ್ಲಿ ಪೇಟೆಂಟ್‌ಗಳ ಸಣ್ಣಪುಟ್ಟ ದುರ್ಬಳಕೆಗೆ ಸಂಬಂಧಿಸಿದ ಪ್ರಕರಣಗಳು ದೊಡ್ಡ ವಿವಾದಗಳಾಗಿ ಸುದ್ದಿ ಮಾಡುತ್ತವೆ. ಇನ್ನೂ ಕೆಲ ಸಂದರ್ಭಗಳಲ್ಲಿ ಇಂತಹ ವಿವಾದಗಳು ರಾಜತಾಂತ್ರಿಕ ಮಟ್ಟದವರೆಗೂ ಹೋಗಿರುತ್ತವೆ. ಪೇಟೆಂಟ್‌ಗಳ ಕಾನೂನುಬದ್ಧ ಜೀವಿತಾವಧಿ ಪೂರ್ಣಗೊಳ್ಳುವ ಮೊದಲೇ ಅವುಗಳನ್ನು ಬಳಸಿಕೊಳ್ಳಲು ಪ್ರತಿಸ್ಪರ್ಧಿಗಳಿಗೆ ಮುಕ್ತ ಅವಕಾಶ ನೀಡುವುದು ತುಂಬ ವಿರಳ.
ಇಲೊನ್ ಮಸ್ಕ್ ಅವರು ಚಾಲನೆ ನೀಡಿರುವ ಪೇಟೆಂಟ್‌ಗಳ ಉಚಿತ ಬಳಕೆ ಅವಕಾಶಕ್ಕೆ ಇತರ ತಯಾರಕರೂ ಸೂಕ್ತ ರೀತಿಯಲ್ಲಿ ಸ್ಪಂದಿಸಿ, ತಮ್ಮ ಜ್ಞಾನವನ್ನು ಉಚಿತವಾಗಿ ಬಳಸಿಕೊಳ್ಳಲು ಅವಕಾಶ ಮಾಡಿಕೊಟ್ಟರೆ ಜ್ಞಾನ ಹಂಚಿಕೆಗೆ ಎಣೆಯೇ ಇರದು. ಇಂತಹ ತ್ವರಿತಗತಿಯ ಬದಲಾವಣೆಯು ಅಂತಿಮವಾಗಿ ಒಟ್ಟಾರೆ ವಾಹನ ತಯಾರಿಕಾ ರಂಗಕ್ಕೆ ಒಳಿತನ್ನುಂಟು ಮಾಡಲಿದೆ. ಸಾಂಪ್ರದಾಯಿಕ ಇಂಧನ ಚಾಲಿತ ವಾಹನಗಳಿಗೆ ಪರ್ಯಾಯವಾಗಿ ದಕ್ಷ ಮತ್ತು ಉತ್ತಮ ಗುಣಮಟ್ಟದ ಎಲೆಕ್ಟ್ರಾನಿಕ್ ವಾಹನಗಳನ್ನು ಅಭಿವೃದ್ಧಿಪಡಿಸಿ, ತಯಾರಿಸಲು ಕೂಡ ಪೇಟೆಂಟ್‌ಗಳ ಉಚಿತ ವಿನಿಮಯವು ನೆರವಾಗಲಿದೆ. ಇದರಿಂದ ಪಳೆಯುಳಿಕೆ ಇಂಧನಗಳ ಬಳಕೆ ಮತ್ತು ಅದರಿಂದಾಗುವ ಮಾಲಿನ್ಯ ತಡೆಗಟ್ಟುವ ಪ್ರಯತ್ನಗಳ ಮೇಲೆ ಸಕಾರಾತ್ಮಕ ಪರಿಣಾಮ ಕಂಡು ಬರಲಿದೆ.
ಜ್ಞಾನದ ಹಂಚಿಕೆಗೆ ಅವಕಾಶ ಮಾಡಿಕೊಟ್ಟಿರುವ ಅಪರೂಪದ ಮತ್ತು ಧೈರ್ಯದ ನಿರ್ಧಾರ ಕೈಗೊಂಡ ಮಸ್ಕ್ ಅವರ ನಿಲುವನ್ನು ಎಲ್ಲರೂ ಶ್ಲಾಘಿಸಬೇಕಾಗಿದೆ. ಇತರ ಉದ್ದಿಮೆದಾರರೂ ಮಸ್ಕ್ ನಿರ್ಧಾರದಿಂದ ಸ್ಫೂರ್ತಿ ಪಡೆಯುವರೇ? ಕಾದು ನೋಡಬೇಕು.
ಇದೇ ಬಗೆಯಲ್ಲಿ ಅಮೆರಿಕ ಸರ್ಕಾರವು ಕೈಗೊಂಡ ಇನ್ನೊಂದು ಮಹತ್ವದ ನಿರ್ಧಾರವೊಂದು ಜಾಗತಿಕ ಆರ್ಥಿಕ ರಂಗದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.
ಶುದ್ಧೀಕರಿಸದ ಕಚ್ಚಾ ತೈಲವನ್ನು ರಫ್ತು ಮಾಡಲು ಅಮೆರಿಕವು ಇತ್ತೀಚೆಗೆ ಎರಡು ಸಣ್ಣ ಉದ್ದಿಮೆ ಸಂಸ್ಥೆಗಳಿಗೆ ಅನುಮತಿ ನೀಡಿ ವಿಶ್ವದ ಉದ್ಯಮ ರಂಗದ ಗಮನ ಸೆಳೆದಿದೆ. ಸಂಸ್ಕರಣೆ ಮಾಡದ ಷೇಲ್ ತೈಲಕ್ಕೆ ಜಾಗತಿಕ ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆ ಪಡೆಯಲು, ಈ ತೈಲದ ರಫ್ತು ಅವಕಾಶವನ್ನು ತಮಗೇ ನೀಡಬೇಕೆಂದು ಹಲವಾರು ತೈಲ ಮಾರಾಟ ಸಂಸ್ಥೆಗಳು ಅಮೆರಿಕ ಸರ್ಕಾರದ ಮೇಲೆ ಪ್ರಭಾವ ಬೀರಲು ಯತ್ನಿಸುತ್ತಿದ್ದವು.
ನಾಲ್ಕು ದಶಕಗಳ ನಂತರ ಅಮೆರಿಕದ ಧೋರಣೆಯಲ್ಲಿ ಆಗಿರುವ ಈ ಮಹತ್ವದ ಬದಲಾವಣೆ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ವ್ಯಾಪಕ ಪರಿಣಾಮಗಳನ್ನು ಬೀರುವ ನಿರೀಕ್ಷೆ ಇದೆ. ಸದ್ಯಕ್ಕೆ ಅಂತರರಾಷ್ಟ್ರೀಯ ಕಚ್ಚಾ ತೈಲ ಮಾರುಕಟ್ಟೆಯಲ್ಲಿ ತೈಲದ ಬೆಲೆಯನ್ನು ಪೆಟ್ರೋಲ್ ರಫ್ತು ದೇಶಗಳ ಸಂಘಟನೆ (ಒಪಿಇಸಿ) ನಿರ್ಧರಿಸುವಾಗ ಇಡೀ ವಿಶ್ವವೇ ಅದನ್ನು ಅಸಹಾಯಕತೆಯಿಂದ ನೋಡುತ್ತಿದೆ. ಕಚ್ಚಾ ತೈಲ ಆಮದು ಮಾಡಿಕೊಳ್ಳವಲ್ಲಿ ಅಮೆರಿಕವು ಮುಂಚೂಣಿಯಲ್ಲಿ ಇದೆ. ಹೀಗಾಗಿ ತೈಲದ ಪೂರೈಕೆ ಮತ್ತು ಬೆಲೆ ಪರಿಸ್ಥಿತಿಯಲ್ಲಿ ಸ್ಥಿರತೆ ಕಾಯ್ದುಕೊಳ್ಳಲು ಅಮೆರಿಕವು ನಿರಂತರವಾಗಿ ಪ್ರಯತ್ನಿಸುತ್ತಲೇ ಇದೆ.
ದಶಕದ ಹಿಂದೆ ಅಮೆರಿಕದಲ್ಲಿ ತೀರ ಕಡಿಮೆ ಪ್ರಮಾದಲ್ಲಿ ಆರಂಭಗೊಂಡಿದ್ದ ಷೇಲ್ ತೈಲದ ಉತ್ಪಾದನೆಯು ಈಗ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದ್ದು, 2020ರ ಹೊತ್ತಿಗೆ ಅಮೆರಿಕವು ತೈಲ ಸ್ವಾವಲಂಬನೆ ಸಾಧಿಸುವುದರ ಜತೆಗೆ ತೈಲ ರಫ್ತು ಮಾಡಲೂ ಮುಂದಾಗಲಿದೆ.
ಸದ್ಯದ ಕಚ್ಚಾ ತೈಲದ ಬೆಲೆಯು ಅಮೆರಿಕದಲ್ಲಿ ಷೇಲ್ ತೈಲದ ನಿರಂತರ ಶೋಧ ಮತ್ತು ಉತ್ಪಾದನೆಗೆ ಪುಷ್ಟಿ ನೀಡುತ್ತಿದೆ. ಒಂದೊಮ್ಮೆ ಅಮೆರಿಕವು ತೈಲದ ವಿಷಯದಲ್ಲಿ ಸ್ವಾವಲಂಬನೆ ಸಾಧಿಸುತ್ತಿದ್ದಂತೆ ಅದು ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಪರಿಸ್ಥಿತಿ ಮೇಲೆ ವ್ಯಾಪಕ ಪರಿಣಾಮ ಬೀರಲಿದೆ. ಅದರ ಲಕ್ಷಣಗಳು ಈಗಾಗಲೇ ಕಂಡು ಬರುತ್ತಿವೆ. ಅಮೆರಿಕವು ತೈಲ ಸ್ವಾವಲಂಬನೆ ಸಾಧಿಸುತ್ತಿದ್ದಂತೆ ತೈಲ ಸಮೃದ್ಧ ಪಶ್ಚಿಮ ಏಷ್ಯಾ ಪ್ರದೇಶದಲ್ಲಿ ಶಾಂತಿ ಕಾಯ್ದುಕೊಳ್ಳುವ ಬಗ್ಗೆ ಅಷ್ಟಾಗಿ ತಲೆಕೆಡಿಸಿಕೊಳ್ಳುವುದಿಲ್ಲ ಎಂದು ನಿರೀಕ್ಷಿಸಲಾಗಿದೆ. ಕಚ್ಚಾ ತೈಲದ ಪೂರೈಕೆಗೆ ಅಡ್ಡಿಪಡಿಸುವಂತಹ ಅಶಾಂತ ಪರಿಸ್ಥಿತಿ ನಿರ್ಮಾಣವಾದರೂ ಬಿಕ್ಕಟ್ಟು ಬಗೆಹರಿಸಲು ಅಮೆರಿಕವೂ ಯಾವುದೇ ಗಂಭೀರ ಪ್ರಯತ್ನ ಮಾಡಲಾರದೂ ಎಂದೇ ಭಾವಿಸಲಾಗಿದೆ.
ಭಾರತವೂ ಗಮನಾರ್ಹ ಪ್ರಮಾಣದಲ್ಲಿ ಕಚ್ಚಾತೈಲ ಆಮದು ಮಾಡಿಕೊಳ್ಳುತ್ತಿದೆ. ತೈಲ ರಫ್ತು ದೇಶಗಳಲ್ಲಿ ಉದ್ಭವಿಸುವ ಅರಾಜಕತೆ ಮತ್ತು ಈ ಸಮಸ್ಯೆಯಿಂದ ದೂರ ಉಳಿಯಲು ಬಯಸುವ ಅಮೆರಿಕದ ಧೋರಣೆಯಿಂದ ಭಾರತದ ಅರ್ಥ ವ್ಯವಸ್ಥೆ ಮೇಲೂ ಭವಿಷ್ಯದಲ್ಲಿ ಪ್ರತಿಕೂಲ ಪರಿಣಾಮಗಳು ಕಂಡು ಬರಬಹುದು. ಇಂತಹ ಸಂದರ್ಭಗಳಲ್ಲಿ ಭಾರತವು ಪರಿಸ್ಥಿತಿಯನ್ನು ಎಚ್ಚರಿಕೆಯಿಂದ ಅವಲೋಕಿಸುತ್ತ, ತ್ವರಿತವಾಗಿ ಕಾರ್ಯೋನ್ಮುಖವಾಗಿ ತನ್ನ ಹಿತಾಸಕ್ತಿಗಳನ್ನು ರಕ್ಷಿಸಿಕೊಳ್ಳಲು ಮುಂದಾಗಬೇಕಾಗುತ್ತದೆ.
ನಿಮ್ಮ ಅನಿಸಿಕೆ ತಿಳಿಸಿ:
editpagefeedback@prajavani.co.in
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.