ಸಂಪಾದಕೀಯ|‘ಅಂಪನ್‌’ ಚಂಡಮಾರುತ ನಷ್ಟ ತುಂಬಿಕೊಡುವ ಕೆಲಸ ಆಗಲಿ

ನಾಲ್ಕು ದಶಕಗಳಿದೀಚೆಗೆ ಚಂಡಮಾರುತಗಳು ಅತಿ ವಿನಾಶಕಾರಿಯಾಗಿ ಪರಿವರ್ತಿತವಾಗುತ್ತಿವೆ ಎಂದು ಕಾಮನ್‌ವೆಲ್ತ್‌ ವೈಜ್ಞಾನಿಕ ಮತ್ತು ಕೈಗಾರಿಕಾ ಸಂಘಟನೆಯ ವಿಜ್ಞಾನಿಗಳ ಅಧ್ಯಯನ ಹೇಳಿದೆ. ಸಾಗರದ ತಾಪಮಾನ ಹೆಚ್ಚಳವು ಅಪಾಯಕಾರಿಯಾದ ಇನ್ನಷ್ಟು ಚಂಡಮಾರುತಗಳಿಗೆ ಕಾರಣವಾಗಬಹುದು ಎಂದೂ ಈ ವಿಜ್ಞಾನಿಗಳು ಅಂದಾಜಿಸಿದ್ದಾರೆ. ಚಂಡಮಾರುತಗಳಲ್ಲಿ ಶೇ 30ರಷ್ಟು ಮಾತ್ರ 1980ರ ದಶಕದಲ್ಲಿ ಅಪಾಯಕಾರಿಯಾಗಿ ಬೆಳೆಯುತ್ತಿದ್ದವು. ಈಗ ಈ ಪ್ರಮಾಣ ಶೇ 40ಕ್ಕೆ ಏರಿದೆ. ಅಷ್ಟೇ ಅಲ್ಲದೆ, ಹಿಂದೆ ಬರುತ್ತಿದ್ದ ಚಂಡಮಾರುತಗಳು ಹೆಚ್ಚು ಮಳೆ ತರುತ್ತಿದ್ದವು ಮತ್ತು ವೇಗ ಕಡಿಮೆ ಇರುತ್ತಿತ್ತು. ಈಗ ಚಂಡಮಾರುತಗಳ ವೇಗ ಹೆಚ್ಚುತ್ತಿದೆ. ಪರಿಣಾಮವಾಗಿ ಅದರಿಂದಾಗುವ ವಿಧ್ವಂಸವೂ ಹೆಚ್ಚು ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಚಂಡಮಾರುತಗಳು ಹೆಚ್ಚು ಭೀಕರವಾಗಲು ಮನುಷ್ಯನೂ ಕಾರಣ ಎಂಬುದರತ್ತ ಇದು ಬೊಟ್ಟು ಮಾಡುತ್ತಿದೆ. ಹಾಗಾಗಿ, ಎಷ್ಟು ಸಾಧ್ಯವೋ ಅಷ್ಟರಮಟ್ಟಿಗೆ ಪ್ರಕೃತಿಯನ್ನು ರಕ್ಷಿಸುವ ಮೂಲಕ ಮನುಷ್ಯ ತನ್ನನ್ನು ತಾನು ರಕ್ಷಿಸಿಕೊಳ್ಳಬೇಕಾದ ಅನಿವಾರ್ಯ ಈಗ ಎದುರಾಗಿದೆ.‘ಅಂಪನ್‌’ನಿಂದಾಗಿ ಮನೆಗಳು, ಬೆಳೆ, ಜಮೀನು ನಾಶವಾಗಿವೆ. ಇದರ ನಷ್ಟವನ್ನು ಸರ್ಕಾರವು ತುಂಬಿಕೊಡಬೇಕಿದೆ. ಕೊರೊನಾ ವೈರಾಣು ಸಂಕಷ್ಟದ ನಡುವೆಯೇ ಮತ್ತೊಂದು ಆಘಾತ ಎರಗಿದೆ. ಕೊರೊನಾ ಲಾಕ್‌ಡೌನ್‌ನಿಂದಾಗಿ ವಿವಿಧ ರಾಜ್ಯಗಳಿಂದ ಕೆಲಸ ಕಳೆದುಕೊಂಡು ಊರಿಗೆ ಮರಳಿರುವವರಲ್ಲಿ ಹಲವು ಮಂದಿ ‘ಅಂಪನ್‌’ನಿಂದಾಗಿ ಮನೆ ಕಳೆದುಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಅಂಥವರಿಗೆ ಇದು ದುಪ್ಟಟ್ಟು ದುರಂತ. ಹಾಗಾಗಿ, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ನಷ್ಟ ತುಂಬಿಕೊಡುವ ದಿಸೆಯಲ್ಲಿ ಹೆಚ್ಚಿನ ಕಾಳಜಿ ತೋರಬೇಕಿದೆ. ಕೇಂದ್ರ ಮತ್ತು ಪಶ್ಚಿಮ ಬಂಗಾಳ ಸರ್ಕಾರಗಳ ನಡುವೆ ಬಾಂಧವ್ಯ ಉತ್ತಮವಾಗಿಲ್ಲ ಎಂಬುದು, ಕೊರೊನಾ ತಡೆ ವಿಚಾರದಲ್ಲಿ ಈ ಸರ್ಕಾರಗಳ ನಡುವಣ ವಾಗ್ವಾದದಿಂದ ಬಯಲಾಗಿದೆ. ಅದಲ್ಲದೆ, ಮುಂದಿನ ವರ್ಷದ ಆರಂಭದಲ್ಲಿ ಪಶ್ಚಿಮ ಬಂಗಾಳ ವಿಧಾನಸಭೆಗೆ ಚುನಾವಣೆ ನಡೆಯಬೇಕಿದೆ. ಇಲ್ಲಿ ಅಧಿಕಾರ ಹಿಡಿಯಬೇಕು ಎಂದು ಬಿಜೆ‍ಪಿ ಎಲ್ಲ ಪ್ರಯತ್ನಗಳನ್ನು ನಡೆಸುತ್ತಿದೆ. ಚುನಾವಣೆಯನ್ನು ದೃಷ್ಟಿಯಲ್ಲಿ ಇರಿಸಿಕೊಂಡೇ ಮಮತಾ ಬ್ಯಾನರ್ಜಿ ಮತ್ತು ಬಿಜೆಪಿ ಮುಖಂಡರು ಪರಸ್ಪರರನ್ನು ಸಿಕ್ಕ ಎಲ್ಲ
ಸಂದರ್ಭಗಳಲ್ಲಿಯೂ ಹಣಿಯಲು ಯತ್ನಿಸಿದ್ದಾರೆ. ಆದರೆ ಈಗ, ಪಶ್ಚಿಮ ಬಂಗಾಳ ಮತ್ತು ಒಡಿಶಾದ ಕೆಲವು ಭಾಗಗಳ ಮರುನಿರ್ಮಾಣದ ಕೆಲಸ ಆಗಬೇಕು. ಆ ಕೆಲಸದಲ್ಲಿ ಅಧಿಕಾರ ರಾಜಕಾರಣದ ಪಟ್ಟುಗಳು ಮೇಲುಗೈ ಪಡೆಯಬಾರದು. ನೊಂದ ಜನರ ಕಣ್ಣೀರು ಒರೆಸುವುದೇ ಮುಖ್ಯವಾಗಬೇಕು. ಅವರ ಬದುಕನ್ನು ಹಸನಾಗಿಸಬೇಕು. ಎಂತಹ ಸುಳಿಗಾಳಿಯಲ್ಲಿಯೂ ತಮ್ಮ ಬದುಕು ಹಾರಿಹೋಗದಂತೆ ಸರ್ಕಾರಗಳು ನೋಡಿಕೊಳ್ಳುತ್ತವೆ ಎಂಬ ವಿಶ್ವಾಸವನ್ನು ಜನರಲ್ಲಿ ಮೂಡಿಸಬೇಕು.