ಸಂಪಾದಕೀಯ | ವಿವೇಕಾನಂದರ ಹೆಸರು, ಕೇಸರಿ ಬಣ್ಣರಾಜಕೀಯ ಕಾರಣಗಳಿಗೆ ಬಳಕೆ ಸಲ್ಲ

‘ವಿವೇಕ’ ಹೆಸರಿನಲ್ಲಿ ಶಾಲೆ ಮತ್ತು ಪದವಿಪೂರ್ವ ಕಾಲೇಜುಗಳಲ್ಲಿ ಕೊಠಡಿಗಳನ್ನು ನಿರ್ಮಿಸುವ ರಾಜ್ಯ ಸರ್ಕಾರದ ಕಾರ್ಯಕ್ರಮ ರಾಜಕೀಯ ವಿವಾದದ ಸ್ವರೂಪ ‍ಪಡೆದುಕೊಂಡಿದೆ. ಹೊಸದಾಗಿ ನಿರ್ಮಿಸಲು ಉದ್ದೇಶಿಸಿರುವ 7,601 ಕೊಠಡಿಗಳಿಗೆ ಸ್ವಾಮಿ ವಿವೇಕಾನಂದರ ಸ್ಮರಣಾರ್ಥ ‘ವಿವೇಕ’ ಎಂದು ಹೆಸರಿಡುವುದಾಗಿ ಸರ್ಕಾರ ಹೇಳಿದೆ. ಕೊಠಡಿಗಳಿಗೆಕೇಸರಿ ಬಣ್ಣ ಬಳಿಯುವ ಚಿಂತನೆ ನಡೆದಿದೆ. ‘ವಿವೇಕ’ ಹೆಸರಿನ ಕೊಠಡಿಗಳ ಜೊತೆಗೆ, 2023ರ ಆಗಸ್ಟ್‌ ವೇಳೆಗೆ ಎಲ್ಲ ಸರ್ಕಾರಿ ಪ್ರಾಥಮಿಕ ಮತ್ತು ಪ್ರೌಢಶಾಲೆಗಳಿಗೆ ಶೌಚಾಲಯ ನಿರ್ಮಿಸಿಕೊಡುವುದಾಗಿ ಹಾಗೂ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರು ಕಲಿತ ಶಾಲೆಗಳೊಂದಿಗೆ, ಶತಮಾನ ಪೂರೈಸಿರುವ ಸರ್ಕಾರಿ ಶಾಲೆಗಳನ್ನು ಅಭಿವೃದ್ಧಿಪಡಿಸುವುದಾಗಿ ಸರ್ಕಾರ ಹೇಳಿದೆ. ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಸವಿನೆನಪಿಗಾಗಿ 750 ಸರ್ಕಾರಿ ಶಾಲೆಗಳ ಸಮಗ್ರ ಅಭಿವೃದ್ಧಿಗೂ ಸರ್ಕಾರ ಮುಂದಾಗಿದೆ. ಕೊಠಡಿಗಳ ನಿರ್ಮಾಣ ಸೇರಿದಂತೆ ಮೂಲಸೌಕರ್ಯ ವೃದ್ಧಿಗೆ ಕೈಗೊಂಡ ಕ್ರಮಗಳು ಸ್ವಾಗತಾರ್ಹ. ಆದರೆ, ಹೊಸದಾಗಿ ನಿರ್ಮಿಸುವ ಶಾಲಾ ಕೊಠಡಿಗಳಿಗೆ ಕೇಸರಿ ಬಣ್ಣ ಬಳಿಸಲು ಸರ್ಕಾರದ ಮಟ್ಟದಲ್ಲಿ ನಡೆದಿರುವ ಪ್ರಯತ್ನದ ಹಿಂದೆ ಮಕ್ಕಳ ಹಿತಾಸಕ್ತಿಗಿಂತಲೂ ರಾಜಕೀಯ ಉದ್ದೇಶಗಳೇ ಸ್ಪಷ್ಟವಾಗಿ ಕಾಣಿಸುತ್ತಿವೆ. ಶಾಲಾ ಕೊಠಡಿಗಳಿಗೆ ಕೇಸರಿ ಬಣ್ಣ ಬಳಿಸುವುದಕ್ಕೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹಾಗೂ ಶಿಕ್ಷಣ ಸಚಿವ ಬಿ.ಸಿ. ನಾಗೇಶ್‌ ಅವರು ನೀಡಿರುವ ಕಾರಣಗಳಲ್ಲಿ ಶೈಕ್ಷಣಿಕ ಕಾಳಜಿ ಕಾಣಿಸುತ್ತಿಲ್ಲ. ಜಗತ್ತಿಗೆ ವಿವೇಕವನ್ನು ನೀಡಿದ ಸ್ವಾಮಿ ವಿವೇಕಾನಂದರನ್ನು ಪ್ರೇರಣೆಯಾಗಿ ಇರಿಸಿಕೊಂಡು ಉತ್ತಮ ಶೈಕ್ಷಣಿಕ ವಾತಾವರಣ ಕಲ್ಪಿಸಲು ‘ವಿವೇಕ’ ಕೊಠಡಿಗಳ ಪರಿಕಲ್ಪನೆ ರೂಪಿಸಲಾಗಿದೆ ಎಂದು ಮುಖ್ಯಮಂತ್ರಿ ಹೇಳಿದ್ದಾರೆ. ‘ಕೇಸರಿ ಕಂಡರೆ ಏಕೆ ಸಿಟ್ಟು’ ಎಂದು ವಿರೋಧಪಕ್ಷಗಳ ನಾಯಕರನ್ನು ಪ್ರಶ್ನಿಸಿರುವ ಮುಖ್ಯಮಂತ್ರಿ, ರಾಷ್ಟ್ರಧ್ವಜದಲ್ಲೂ ಕೇಸರಿ ಬಣ್ಣ ಇರುವುದನ್ನು ನೆನಪಿಸಿದ್ದಾರೆ. ಮುಖ್ಯಮಂತ್ರಿ ಹೇಳಿರುವ ಮಾತುಗಳಲ್ಲಿ ಸತ್ಯಾಂಶವಿದೆ. ಕೇಸರಿ ಬಣ್ಣವನ್ನು ಯಾರೂ ಅಸಹನೆ ಅಥವಾ ಅನುಮಾನದಿಂದ ನೋಡಬಾರದು. ಹಾಗೆಯೇ, ರಾಷ್ಟ್ರಧ್ವಜದಲ್ಲಿ ಇರುವ ಬಣ್ಣವನ್ನು ಸಿಕ್ಕಸಿಕ್ಕಲ್ಲೆಲ್ಲ ಬಳಸುವ ಮೂಲಕ ಅದರ ಘನತೆಯನ್ನು ಕಡಿಮೆ ಮಾಡುವ ಪ್ರಯತ್ನಗಳನ್ನೂ ಯಾರೂ ಮಾಡಬಾರದು. ಕೇಸರಿ ಮಾತ್ರವಲ್ಲ, ಯಾವುದೇ ಬಣ್ಣಕ್ಕೆ ಅನಗತ್ಯ ಮಹತ್ವ ನೀಡುವುದು ಇಲ್ಲವೇ ಅನುಮಾನದಿಂದ ನೋಡುವುದು ಸರಿಯಲ್ಲ. ಮಕ್ಕಳು ಶಾಲೆಯಲ್ಲಿ ಕಲಿಯಬೇಕಾದುದು ಎಲ್ಲ ಬಣ್ಣಗಳ ಅಗತ್ಯ ಮತ್ತು ಮಹತ್ವವನ್ನೇ ಹೊರತು, ಯಾವುದೋ ಒಂದು ಬಣ್ಣವನ್ನು ವಿಶೇಷವಾಗಿ ನೋಡುವುದನ್ನಲ್ಲ. ವಿವೇಕಾನಂದರ ಹೆಸರನ್ನು ಕೂಡ ರಾಜಕೀಯ ಕಾರಣಗಳಿಗಾಗಿ ಬಳಸುವುದು ಸರಿಯಲ್ಲ.