ಎನ್‌ಪಿಎ: ಹಲವು ಅಲಗುಗಳ ಕತ್ತಿ ನಿಯಂತ್ರಣಕ್ಕೆ ನೆರವಾದೀತೇ ಬಜೆಟ್?

ದೇಶದಲ್ಲಿ ಲಾಕ್‌ಡೌನ್‌ ಜಾರಿಗೆ ಬಂದಾಗ ಕುಸಿದಿದ್ದ ಷೇರು ಮಾರುಕಟ್ಟೆಗಳು, ನಂತರದ ದಿನಗಳಲ್ಲಿ ಭರ್ಜರಿ ಚೇತರಿಕೆ ದಾಖಲಿಸಿವೆ. ಲಾಕ್‌ಡೌನ್‌ ದಿನಗಳ ಆರಂಭದಲ್ಲಿ ಹೂಡಿಕೆ ಮಾಡಿದ್ದವರ ಲಾಭದ ಪ್ರಮಾಣವು ಎರಡಂಕಿಗಳಲ್ಲಿ ಇದೆ. ಹೂಡಿಕೆದಾರರಿಗೆ ಇದು ಜೀವಮಾನದಲ್ಲಿ ಒಮ್ಮೆ ಮಾತ್ರ ಸಿಗುವಂತಹ ಅವಕಾಶ ಎಂದು ಮಾರುಕಟ್ಟೆ ತಜ್ಞರು ಹೇಳಿದ್ದಾರೆ. ವಾಸ್ತವದಲ್ಲಿ, ದೇಶದ ಷೇರು ಮಾರುಕಟ್ಟೆಗಳು ವರ್ತಿಸುತ್ತಿರುವ ರೀತಿಯನ್ನು ಗಮನಿಸಿದರೆ, ಈ ದೇಶದಲ್ಲಿ ಆರ್ಥಿಕ ಬಿಕ್ಕಟ್ಟಿನ ಸ್ಥಿತಿ ನಿರ್ಮಾಣವಾಗಿತ್ತು ಎನ್ನಲು ಸಾಧ್ಯವೇ ಇಲ್ಲ! ಆದರೆ, ದೇಶದ ಅರ್ಥವ್ಯವಸ್ಥೆಯಲ್ಲಿನ ವಾಸ್ತವವು ಷೇರು ಮಾರುಕಟ್ಟೆಯಲ್ಲಿನ ಗೂಳಿಯ ಓಟದಂತೆ ಇಲ್ಲ ಎಂಬುದು ಜನಸಾಮಾನ್ಯರ ಅನುಭವಕ್ಕೂ ಬಂದಿರುವ ಸತ್ಯ. ಈ ಅನುಭವವನ್ನೇ ಭಾರತೀಯ ರಿಸರ್ವ್‌ ಬ್ಯಾಂಕ್ (ಆರ್‌ಬಿಐ) ಗವರ್ನರ್ ಶಕ್ತಿಕಾಂತ ದಾಸ್ ಅವರು 2020ರಲ್ಲಿ, ‘ಅರ್ಥ ವ್ಯವಸ್ಥೆಗೂ ಷೇರು ಮಾರುಕಟ್ಟೆಗೂ ಸಂಬಂಧ ಕಡಿದು ಹೋಗಿರುವಂತೆ ಕಾಣುತ್ತಿದೆ’ ಎಂದು ವಿವರಿಸಿದ್ದರು. ಈಚೆಗೆ ಬಿಡುಗಡೆ ಆಗಿರುವ ಆರ್‌ಬಿಐನ ಹಣಕಾಸು ಸ್ಥಿರತೆ ವರದಿಯಲ್ಲಿಯೂ ಅವರು ಇದೇ ನೆಲೆಯ ಮಾತುಗಳನ್ನು ಆಡಿದ್ದಾರೆ. ‘ಹಣಕಾಸು ಮಾರುಕಟ್ಟೆಗಳ ಕೆಲವು ವಲಯಗಳು ಹಾಗೂ ನಿಜ ಆರ್ಥಿಕತೆ ನಡುವಿನ ಸಂಬಂಧದಲ್ಲಿ ಉಂಟಾಗಿರುವ ಕಂದಕವು ಈಚೆಗೆ ಹೆಚ್ಚಾಗುತ್ತಿದೆ’ ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ. ಅವರ ಎಚ್ಚರಿಕೆಯ ಮಾತುಗಳಿಗೆ ಆಧಾರವನ್ನು ಒದಗಿಸುವ ಹಲವು ಸಂಗತಿಗಳು ಹಣಕಾಸು ಸ್ಥಿರತೆ ವರದಿಯಲ್ಲಿಯೇ ಇವೆ. ಬ್ಯಾಂಕ್‌ಗಳಲ್ಲಿನ ವಸೂಲಾಗದ ಸಾಲದ (ಎನ್‌ಪಿಎ) ಸರಾಸರಿ ಪ್ರಮಾಣವು 2021ರ ಸೆಪ್ಟೆಂಬರ್‌ ವೇಳೆಗೆ ಶೇಕಡ 13.5ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ವರದಿಯಲ್ಲಿ ಹೇಳಲಾಗಿದೆ. 2020ರ ಸೆಪ್ಟೆಂಬರ್‌ನಲ್ಲಿ ಸರಾಸರಿ ಎನ್‌ಪಿಎ ಪ್ರಮಾಣ ಶೇ 7.5ರಷ್ಟು ಇತ್ತು. ಆರ್ಥಿಕ ಪರಿಸ್ಥಿತಿ ಇನ್ನಷ್ಟು ಹದಗೆಟ್ಟಲ್ಲಿ ಸರಾಸರಿ ಎನ್‌ಪಿಎ ಶೇ 14.8ಕ್ಕೂ ಏರಿಕೆಯಾಗಬಹುದು ಎಂದೂ ವರದಿಯಲ್ಲಿ ಹೇಳಲಾಗಿದೆ. ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗಳ ಎನ್‌ಪಿಎ ಪ್ರಮಾಣವು ಶೇ 16.2ರವರೆಗೆ ಏರಿಕೆಯಾಗುವ ಸಾಧ್ಯತೆ ಇದೆ. ಖಾಸಗಿ ಬ್ಯಾಂಕ್‌ಗಳ ಎನ್‌ಪಿಎ ಪ್ರಮಾಣ ಶೇ 7.9ಕ್ಕೆ ಹೆಚ್ಚಳ ಆಗಬಹುದು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.