ಕಲಬುರ್ಗಿ ವಿಮಾನ ನಿಲ್ದಾಣವು ದೇಶದಲ್ಲಿಯೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ವಿಮಾನ ನಿಲ್ದಾಣ ಎಂದು ರಾಷ್ಟ್ರೀಯ ವಿಮಾನ ನಿಲ್ದಾಣ ಪ್ರಾಧಿಕಾರ ಗುರುತಿಸಿದೆ. ಇಲ್ಲಿಂದ ಬೆಂಗಳೂರಿಗೆ ಪ್ರತಿದಿನ ಎರಡು ವಿಮಾನಗಳ ಸೇವೆ ಇದ್ದರೂ ಬೆಳಗಿನ ಸಮಯದಲ್ಲಿರದ ಕಾರಣ ಅನನುಕೂಲವಾಗುತ್ತಿದೆ. ಮಂಗಳವಾರ ಹೊರತುಪಡಿಸಿದರೆ ವಾರದ ಮಿಕ್ಕೆಲ್ಲ ದಿನಗಳಲ್ಲಿ ಎರಡೂ ವಿಮಾನಗಳ ಸೇವೆ ಅಪರಾಹ್ನ ಮಾತ್ರ ಲಭ್ಯ. ಬೆಂಗಳೂರಿಗೆ ಇಲ್ಲಿಂದ ಬೆಳಿಗ್ಗೆ 7ಕ್ಕೆ ಹೊರಟು ನಂತರ ಕೆಲಸ ಮುಗಿಸಿಕೊಂಡು ಅಲ್ಲಿಂದ ರಾತ್ರಿ 8 ಅಥವಾ 9ಕ್ಕೆ ವಿಮಾನ ಸೇವೆ ಲಭಿಸಿದರೆ, ಅಂದೇ ಹೊರಟು ಮರಳಿ ಕಲಬುರ್ಗಿ ಸೇರಿ, ಅಲ್ಲಿ ತಂಗುವ ವೆಚ್ಚವನ್ನು ಉಳಿಸಬಹುದು ಎಂಬ ಮಾತಿಗೆ ತೂಕವಿದೆ.