ದುಬೈ: ಹೈದರಾಬಾದ್ನಲ್ಲಿ ಮೊದಲ ಟೆಸ್ಟ್ ವೇಳೆ, ಇಂಗ್ಲೆಂಡ್ನ ಬ್ಯಾಟರ್ ಒಲಿ ಪೋಪ್ ರನ್ ಓಡುವಾಗ ‘ತಕ್ಕುದಲ್ಲದ ರೀತಿ ಅಡ್ಡಬಂದಿದ್ದಕ್ಕೆ ಭಾರತದ ವೇಗದ ಬೌಲರ್ ಜಸ್ಪ್ರೀತ್ ಬೂಮ್ರಾ ಅವರಿಗೆ ಐಸಿಸಿ ಸೋಮವಾರ ವಾಗ್ದಂಡನೆ ವಿಧಿಸಿದೆ. ಜೊತೆಗೆ ಒಂದು ಡಿಮೆರಿಟ್ ಪಾಯಿಂಟ್ ಸಹ ಹೇರಿದೆ.
ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ ನೀತಿಸಂಹಿತೆಯ ಲೆವೆಲ್ 1 ನಡಿ ಬೂಮ್ರಾ ತಪ್ಪೆಸಗಿದ್ದಾರೆ. ಇಂಗ್ಲೆಂಡ್ ತಂಡದ ಎರಡನೇ ಇನಿಂಗ್ಸ್ ವೇಳೆ (81ನೇ ಓವರ್) ಈ ಪ್ರಸಂಗ ನಡೆದಿತ್ತು. ತಾವು ಬೌಲಿಂಗ್ ಮಾಡಿದ ನಂತರ ಪೋಪ್ ರನ್ನಿಗೆ ಓಡುವ ವೇಳೆ ಬೂಮ್ರಾ ಅಡ್ಡಬಂದು ದೈಹಿಕವಾಗಿ ತಡೆಯಲು ಯತ್ನಿಸಿದ್ದರೆಂಬ ಕಾರಣಕ್ಕೆ ಈ ಕ್ರಮ ಕೈಗೊಳ್ಳಲಾಗಿದೆ.
ಕ್ರೀಡಾಂಗಣದಲ್ಲಿದ್ದ ಅಂಪೈರ್ಗಳಾದ ಪಾಲ್ ರೈಫೆಲ್ ಮತ್ತು ಕ್ರಿಸ್ ಗಫಾನಿ, ಮೂರನೇ ಅಂಪೈರ್ ಮರೈಸ್ ಎರಾಸ್ಮಸ್ ಮತ್ತು ನಾಲ್ಕನೇ ಅಂಪೈರ್ ರೋಹನ್ ಪಂಡಿತ್ ಅವರು ಬೂಮ್ರಾ ವಿರುದ್ಧ ದೂರು ಸಲ್ಲಿಸಿದ್ದರು.
ವಾಗ್ದಂಡನೆ ಜೊತೆ, ಇದು 24 ತಿಂಗಳ ಅವಧಿಯಲ್ಲಿ ಇದು ಅವರ ಮೊದಲ ತಪ್ಪು ಆದ ಕಾರಣ ಅವರ ‘ಶಿಸ್ತಿನ ದಾಖಲೆ’ಗೆ ಒಂದು ಡಿಮೆರಿಟ್ ಪಾಯಿಂಟ್ ಸೇರಿಸಲಾಗಿದೆ. ಬೂಮ್ರಾ ತಪ್ಪು ಒಪ್ಪಿಕೊಂಡಿದ್ದು, ಕ್ರಮಕ್ಕೆ ಸಮ್ಮತಿಸಿದ್ದಾರೆ.