ಲಾಕ್‌ಡೌನ್‌: ಪಾಸ್ ಇಲ್ಲದೆ ಪಯಣಿಸಿದ ಪೃಥ್ವಿ ಶಾ

ಇಂಡಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿ ಕೋವಿಡ್‌ನಿಂದಾಗಿ ಅರ್ಧಕ್ಕೆ ನಿಂತ ನಂತರ ಮುಂಬೈಯಲ್ಲಿರುವ ಮನೆಗೆ ಮರಳಿದ್ದ ಪೃಥ್ವಿ ಶಾ ಅವರು ಇ–ಪಾಸ್ ಇಲ್ಲದೇ ಮಹಾರಾಷ್ಟ್ರದ ಸಿಂಧುದುರ್ಗ ಜಿಲ್ಲೆಯಿಂದ ಗೋವಾಗೆ ಬೆಳಗ್ಗಿನ ವೇಳೆ ಪಯಣಿಸುತ್ತಿದ್ದರು.

ಕೋವಿಡ್ ತಡೆಗಟ್ಟುವ ಕ್ರಮದ ಅಂಗವಾಗಿ ಮಹಾರಾಷ್ಟ್ರ ಸರ್ಕಾರ ಪ್ರಯಾಣಕ್ಕೆ ಪಾಸ್‌ ಕಡ್ಡಾಯಗೊಳಿಸಿದೆ. ಪಾಸ್‌ಗೆ ಅರ್ಜಿ ಸಲ್ಲಿಸಿದ್ದ ಶಾ ಅದು ಸಿಗುವ ಮೊದಲೇ ಪಯಣ ಬೆಳೆಸಿದ್ದರು. ಅರ್ಜಿ ಸಲ್ಲಿಸಿದ್ದರ ಮಾಹಿತಿ ಮಾತ್ರ ಅವರಲ್ಲಿತ್ತು.

ಅಂಬೋಲಿಯಲ್ಲಿ ಪೊಲೀಸರು ಅಡ್ಡಹಾಕಿದ ನಂತರ ಮತ್ತೊಮ್ಮೆ ಅರ್ಜಿ ಸಲ್ಲಿಸಿದರು. ಒಂದು ತಾಸಿನಲ್ಲಿ ಪಾಸ್ ಸಿಕ್ಕಿದ ನಂತರ ಪ್ರಯಾಣ ಮುಂದುವರಿಸಿದರು.