ಹಿಮಾಚಲ ಪ್ರದೇಶ ಎದುರು ಬ್ಯಾಟಿಂಗ್ ಅಬ್ಬರ: ಸತತ 2ನೇ ತ್ರಿಶತಕದತ್ತ ಸರ್ಫರಾಜ್

ಮಂದ ಬೆಳಕಿನ ಕಾರಣ ಮೊದಲ ದಿನದಾಟವನ್ನು 75 ಓವರ್‌ಗಳಿಗೆ ನಿಲ್ಲಿಸಲಾಯಿತು. ಈ ವೇಳೆಗಾಗಲೇ 5 ವಿಕೆಟ್‌ ನಷ್ಟಕ್ಕೆ 372 ರನ್‌ ಕಲೆಹಾಕಿರುವ ಮುಂಬೈ ಬೃಹತ್‌ ಮೊತ್ತದತ್ತ ಹೆಚ್ಚೆ ಇಟ್ಟಿದೆ.

ಟಾಸ್‌ ಸೋತರೂ ಮೊದಲು ಬ್ಯಾಟಿಂಗ್‌ ಮಾಡುವ ಅವಕಾಶ ಪಡೆದ ಆದಿತ್ಯ ತಾರೆ ಪಡೆಗೆ, ಆತಿಥೇಯ ಹಿಮಾಚಲ ಪ್ರದೇಶ ಆಘಾತ ನೀಡಿತ್ತು. ಕೇವಲ 71 ರನ್‌ ಆಗುಷ್ಟರಲ್ಲಿ ಪ್ರಮುಖ ನಾಲ್ಕು ವಿಕೆಟ್‌ ಉರುಳಿಸಿ ತವರಿನ ಅಂಗಳದಲ್ಲಿ ದರ್ಬಾರ್ ನಡೆಸುವ ಸೂಚನೆ ನೀಡಿತ್ತು. ಆದರೆ, ಅದಕ್ಕೆ ಸರ್ಫರಾಜ್‌ ಮತ್ತುನಾಯಕ ತಾರೆ (62) ಅವಕಾಶ ನೀಡಲಿಲ್ಲ. ಈ ಜೋಡಿ ಐದನೇ ವಿಕೆಟ್‌ಗೆ143 ರನ್‌ ಕೂಡಿಸಿತು.

ಇದನ್ನೂ ಓದಿ:‘ಕೊಹ್ಲಿ ಫಿಟ್‌ನೆಸ್ ಸಲಹೆ ನೀಡಿದ್ದರು; ಆರ್‌ಸಿಬಿಯಿಂದ ಕೈಬಿಟ್ಟಾಗ ನೋವಾಗಿತ್ತು’

ತಾರೆ ನಿರ್ಗಮನದ ಬಳಿಕವೂ ತಡೆಯಿಲ್ಲದೆ ಬ್ಯಾಟ್‌ ಬೀಸಿದ ಸರ್ಫರಾಜ್‌, ಶುಭಂ ರಂಜನೆ ಜೊತೆಗೂಡಿ ಮುರಿಯದ ಆರನೇ ವಿಕೆಟ್‌ ಜೊತೆಯಾಟದಲ್ಲಿ 158 ರನ್ ಕೂಡಿಸಿದ್ದಾರೆ. ಇದರಲ್ಲಿ ರಂಜನೆ ಪಾಲು ಕೇವಲ 44 ಮಾತ್ರ.213 ಎಸೆತಗಳಲ್ಲಿ 32 ಬೌಂಡರಿ ಮತ್ತು 4 ಸಿಕ್ಸರ್‌ ನೆರವಿನಿಂದ ಬರೋಬ್ಬರಿ 226 ರನ್‌ ಗಳಿಸಿರುವ ಸರ್ಫರಾಜ್‌ ಅಜೇಯರಾಗಿ ಉಳಿದಿದ್ದಾರೆ.

ಕಳೆದ ಪಂದ್ಯದಲ್ಲಿ ತ್ರಿಶತಕ
ಜನವರಿ 19 ರಿಂದ 22ರ ವರೆಗೆ ಉತ್ತರ ಪ್ರದೇಶ ತಂಡದ ವಿರುದ್ಧ ಮುಂಬೈನ ವಾಂಖೆಡೆ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಸರ್ಫರಾಜ್‌ ಅಜೇಯ ತ್ರಿಶತಕ ಬಾರಿಸಿದ್ದರು. ಮೊದಲು ಬ್ಯಾಟಿಂಗ್ ಮಾಡಿದ್ದ ಉತ್ತರ ಪ್ರದೇಶ ಎಂಟು ವಿಕೆಟ್‌ ನಷ್ಟಕ್ಕೆ 625 ರನ್‌ ಗಳಿಸಿತ್ತು.

ಬಳಿಕ ಬ್ಯಾಟಿಂಗ್‌ ನಡೆಸಿದ ಮುಂಬೈ 124 ರನ್‌ಗಳಿಗೆ 4 ವಿಕೆಟ್‌ ಕಳೆದುಕೊಂಡು, ಫಾಲೋಆನ್‌ ಭೀತಿಗೊಳಗಾಗಿತ್ತು. ಈ ವೇಳೆ ಕ್ರೀಸ್‌ಗಿಳಿದ ಸರ್ಫರಾಜ್‌ ಖಾನ್‌ ಕ್ರಮವಾಗಿ ಸಿದ್ದೇಶ್ ಲಾಡ್‌ (98),ಆದಿತ್ಯ ತಾರೆ (97) ಹಾಗೂಶ್ಯಾಮ್ಸ್‌ ಮಲಾನಿ(65) ಜೊತೆ ಸೇರಿ ಐದನೇ ವಿಕೆಟ್ ಜೊತೆಯಾಟದಲ್ಲಿ 210 ರನ್‌,ಆರನೇ ವಿಕೆಟ್ ಜೊತೆಯಾಟದಲ್ಲಿ179 ರನ್‌ ಮತ್ತು ಏಳನೇ ವಿಕೆಟ್‌ಜೊತೆಯಾಟದಲ್ಲಿ 150 ರನ್‌ ಕೂಡಿಸಿದ್ದರು.

ಹೀಗಾಗಿಮುಂಬೈ 7 ವಿಕೆಟ್‌ ನಷ್ಟಕ್ಕೆ 688 ರನ್‌ ಗಳಿಸಿ ಇನಿಂಗ್ಸ್‌ ಮುನ್ನಡೆ ಸಾಧಿಸಿ ಮೂರು ಅಂಕ ಸಂಪಾದಿಸಿತ್ತು.

ಒಟ್ಟು 391 ಎಸೆತಗಳನ್ನು ಎದುರಿದ ಸರ್ಫರಾಜ್‌, 30 ಬೌಂಡರಿ ಹಾಗೂ 8 ಭರ್ಜರಿ ಸಿಕ್ಸರ್ ಸಹಿತ 301 ರನ್‌ ಗಳಿಸಿದ್ದರು.