ಕಾಮನ್‌ವೆಲ್ತ್ ಕ್ರೀಡಾಕೂಟ: ಭಾರತ ತಂಡದಲ್ಲಿ 215 ಅಥ್ಲೀಟ್‌ಗಳು

ಜುಲೈ 28ರಿಂದ ಬರ್ಮಿಂಗ್‌ಹ್ಯಾಮ್‌ನಲ್ಲಿ ಕೂಟ ಆರಂಭವಾಗಲಿದೆ. ಭಾರತ ಒಲಿಂಪಿಕ್ ಸಮಿತಿ (ಐಒಎ)ಯ ಹಂಗಾಮಿ ಅಧ್ಯಕ್ಷ ಅನಿಲ್ ಖನ್ನಾ ಪ್ರಕಟಿಸಿರುವ ತಂಡದಲ್ಲಿ 108 ಪುರುಷರು ಮತ್ತು 107 ಮಹಿಳೆಯರು ಸ್ಥಾನ ಪಡೆದಿದ್ದಾರೆ. ಇವರಲ್ಲದೇ 72 ಮಂದಿ ಅಧಿಕಾರಿಗಳು, 26 ಹೆಚ್ಚುವರಿ ಅಧಿಕಾರಿಗಳು, ಮೂವರು ವ್ಯವಸ್ಥಾಪಕರು ಸೇರಿದಂತೆ ಒಂಬತ್ತು ಸಿಬ್ಬಂದಿ ಕೂಡ ಬಳಗದಲ್ಲಿದ್ದಾರೆ.

ಒಟ್ಟು 16 ಕ್ರೀಡಾ ವಿಭಾಗಗಳಲ್ಲಿ ಭಾರತ ತಂಡವು ಸ್ಪರ್ಧಿಸಲಿದೆ. ಅಥ್ಲೆಟಿಕ್ಸ್ ಮತ್ತು ಹಾಕಿ ವಿಭಾಗಗಳಲ್ಲಿ ತಲಾ 36 ಅಥ್ಲೀಟ್‌ಗಳು ಭಾಗವಹಿಸುತ್ತಿದ್ದಾರೆ. ಇದೇ ಮೊದಲ ಬಾರಿಗೆ ಕೂಟದಲ್ಲಿ ಮಹಿಳಾ ಕ್ರಿಕೆಟ್ ಕೂಡ ನಡೆಯಲಿದೆ. ಭಾರತ ತಂಡವು ಆಡಲಿದೆ. ಈಜು, ಬ್ಯಾಡ್ಮಿಂಟನ್, ಟೇಬಲ್ ಟೆನಿಸ್, ಬಾಕ್ಸಿಂಗ್, ಸೈಕ್ಲಿಂಗ್, ಜಿಮ್ನಾಸ್ಟಿಕ್ಸ್‌, ಟ್ರಯಥ್ಲಾನ್, ವೇಟ್‌ಲಿಫ್ಟಿಂಗ್, ಲಾನ್ ಬಾಲ್ಸ್, ಸ್ಕ್ವಾಷ್, ಜೂಡೊ ಮತ್ತು ಪ್ಯಾರಾ ಕ್ರೀಡೆಗಳ ಅಥ್ಲೀಟ್‌ಗಳಿದ್ದಾರೆ.

ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಚಿನ್ನದ ಪದಕ ಗೆದ್ದ ಜಾವೆಲಿನ್ ಥ್ರೋ ಪಟು ನೀರಜ್ ಚೋಪ್ರಾ ಅವರು ಪಥಸಂಚಲನದಲ್ಲಿ ಭಾರತ ತಂಡದ ಧ್ವಜಧಾರಿಯಾಗಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.