ಭಾನುವಾರ, ಜೂನ್ 13, 2021
21 °C

ಒಲಿಂಪಿಕ್ಸ್‌: 18 ಸಾವಿರ ಮಂದಿಗೆ ಲಸಿಕೆ

ಎಎಫ್‌ಪಿ Updated:

ಅಕ್ಷರ ಗಾತ್ರ : | |

Prajavani

ಟೋಕಿಯೊ: ರೆಫರಿಗಳು ಮತ್ತು ಸ್ವಯಂಸೇವಕರು ಒಳಗೊಂಡಂತೆ ಒಲಿಂಪಿಕ್ಸ್‌ನಲ್ಲಿ ಕಾರ್ಯನಿರ್ವಹಿಸುವ 18 ಸಾವಿರ ಮಂದಿಗೆ ಮುಂದಿನ ವಾರದಿಂದ ಕೋವಿಡ್‌–19ರ ಲಸಿಕೆ ಹಾಕಿಸಲು ಆಯೋಜಕರು ನಿರ್ಧರಿಸಿದ್ದಾರೆ. 

ಮುಂದೂಡಿರುವ ಒಲಿಂಪಿಕ್ಸ್ ಆರಂಭವಾಗಲು ಆರು ವಾರಗಳು ಬಾಕಿ ಇದ್ದು ಸ್ಥಳೀಯರ ವಿರೋಧದ ನಡುವೆಯೂ ಕೂಟವನ್ನು ನಡೆಸಲು ಆಯೋಜಕರು ಮುಂದಾಗಿದ್ದಾರೆ. ವೈರಸ್ ಹರಡುವ ಆತಂಕವೂ ಅವರನ್ನು ಕಾಡುತ್ತಿದೆ. 

ಈ ನಡುವೆ ಜಪಾನ್‌ನಲ್ಲಿ ನಿಧಾನಗತಿಯಲ್ಲಿ ಸಾಗುತ್ತಿದ್ದ ಲಸಿಕೆ ನೀಡುವ ಕಾರ್ಯ ಈಗ ವೇಗ ಪಡೆದುಕೊಂಡಿದೆ. ಆದರೂ ನಾಲ್ಕು ಶೇಕಡಾ ಮಂದಿಗೆ ಮಾತ್ರ ಎರಡೂ ಡೋಸ್ ನೀಡಲು ಸಾಧ್ಯವಾಗಿದೆ. 13 ಶೇಕಡಾ ಮಂದಿ ಒಂದು ಡೋಸ್ ಪಡೆದುಕೊಂಡಿದ್ದಾರೆ. 

‘ಕಾರ್ಯಕರ್ತರಿಗೆ ಲಸಿಕೆ ಹಾಕುವ ಮೂಲಕ ಒಲಿಂಪಿಕ್ಸ್‌ಗೆ ಅವರನ್ನು ಸಜ್ಜುಗೊಳಿಸಲಾಗುವುದು. ಕ್ರೀಡಾಪಟುಗಳ ಜೊತೆ ನಿರಂತರವಾಗಿ ಹತ್ತಿರದಿಂದ ವ್ಯವಹರಿಸುವ ರೆಫರಿಗಳು, ಒಲಿಂಪಿಕ್‌ ಗ್ರಾಮದ ಸಿಬ್ಬಂದಿ, ಕಾರ್ಮಿಕರು ಮತ್ತು ಗುತ್ತಿಗೆದಾರರು, ವಿಮಾನನಿಲ್ದಾಣ ಸಿಬ್ಬಂದಿ, ಡೋಪ್ ಟೆಸ್ಟಿಂಗ್ ಅಧಿಕಾರಿಗಳು ಮತ್ತು ಸಹಾಯಕರಿಗೆ ಆದ್ಯತೆ ನೀಡಲಾಗುವುದು’ ಎಂದು ಟೋಕಿಯೊ ಒಲಿಂಪಿಕ್ಸ್‌ ಆಯೋಜನಾ ಸಮಿತಿಯ ಮುಖ್ಯಸ್ಥೆ ಸೀಕೊ ಹಾಶಿಮೊಟೊ ಅಭಿಪ್ರಾಯಪಟ್ಟಿದ್ದಾರೆ. 

ಅಗತ್ಯವಿದ್ದರೆ ಹೆಚ್ಚುವರಿ 70 ಸಾವಿರ ಸ್ವಯಂ ಸೇವಕರಿಗೂ ಲಸಿಕೆ ನೀಡಲಾಗುವುದು. ಜೂನ್ 18ರಂದು ಅಭಿಯಾನ ಆರಂಭಗೊಳ್ಳಲಿದ್ದು ಕ್ರೀಡಾಕೂಟದ ಉದ್ಘಾಟನೆಗೆ ಕೆಲವೇ ದಿನಗಳ ಮೊದಲು ಎರಡನೇ ಡೋಸ್ ನೀಡಲಾಗುವುದು ಎಂದು ಅವರು ವಿವರಿಸಿದರು.

ಭಾರತ ತಂಡದಲ್ಲಿ ನೆರವು ಸಿಬ್ಬಂದಿಗೆ ಆದ್ಯತೆ

ನವದೆಹಲಿ (ಪಿಟಿಐ): ಒಲಿಂಪಿಕ್ಸ್‌ಗೆ ತೆರಳುವ ಭಾರತ ತಂಡದಲ್ಲಿ ಕೋಚ್‌, ಫಿಸಿಯೊ, ವೈದ್ಯರು ಸೇರಿದಂತೆ ಹೆಚ್ಚಿನ ನೆರವು ಸಿಬ್ಬಂದಿಗೆ ಆದ್ಯತೆ ನೀಡಲಾಗುವುದು ಎಂದು ಕ್ರೀಡಾ ಸಚಿವಾಲಯ ಶುಕ್ರವಾರ ತಿಳಿಸಿದೆ.

100 ಕ್ರೀಡಾಪಟುಗಳು ಈಗಾಗಲೇ ಒಲಿಂಪಿಕ್ಸ್‌ಗೆ ಅರ್ಹತೆ ಗಳಿಸಿದ್ದಾರೆ. ಈ ತಿಂಗಳ ಅಂತ್ಯದೊಳಗೆ ಇನ್ನೂ 25ರಿಂದ 35 ಮಂದಿ ಆಯ್ಕೆಯಾಗುವ ಸಾಧ್ಯತೆ ಇದೆ. ಕ್ರೀಡಾಪಟುಗಳು ಸಾಮರ್ಥ್ಯವನ್ನು ಹೆಚ್ಚಿಸಲು ಸಹಕಾರಿಯಾಗುವ ನೆರವು ಸಿಬ್ಬಂದಿಯನ್ನು ಹೆಚ್ಚು ಸಂಖ್ಯೆಯಲ್ಲಿ ಕಳುಹಿಸಲಾಗುವುದು. ಅನಿವಾರ್ಯವಾಗಿದ್ದರೆ ಮಾತ್ರ ಇತರ ವ್ಯಕ್ತಿಗಳಿಗೆ ಅವಕಾಶ ನೀಡಲಾಗುವುದು ಎಂದು ತಿಳಿಸಲಾಗಿದೆ.

ನಿಯಮದಂತೆ ತಂಡದೊಂದಿಗೆ ತೆರಳುವ ಸಿಬ್ಬಂದಿಯ ಸಂಖ್ಯೆ ಕ್ರೀಡಾಪಟುಗಳ ಸಂಖ್ಯೆಯ ಮೂರನೇ ಒಂದು ಭಾಗವನ್ನು ಮೀರುವಂತಿಲ್ಲ. ಕೋವಿಡ್ ಕಾರಣದಿಂದ ಜಪಾನ್ ಸರ್ಕಾರ ಈ ಸಂಖ್ಯೆಯನ್ನು ಇನ್ನೂ ಕಡಿಮೆ ಮಾಡಲು ನಿರ್ಧರಿಸಿದೆ. 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು