ಆಸ್ಟ್ರೇಲಿಯಾ ಓಪನ್ ಟೆನಿಸ್‌ ಟೂರ್ನಿ: ಎಂಟರಘಟ್ಟಕ್ಕೆ ಜೊಕೊವಿಚ್‌, ಸಬಲೆಂಕಾ

22ನೇ ಗ್ಯಾನ್‌ಸ್ಲಾಮ್ ಪ್ರಶಸ್ತಿ ನಿರೀಕ್ಷೆಯಲ್ಲಿರುವ ಜೊಕೊವಿಚ್‌ ಪ್ರೀಕ್ವಾರ್ಟರ್‌ಫೈನಲ್ ಹಣಾಹಣಿಯಲ್ಲಿ 6-2, 6-1, 6-2ರಿಂದ ಆಸ್ಟ್ರೇಲಿಯಾದ ಅಲೆಕ್ಸ್ ಡಿ ಮಿನೌರ್ ಅವರನ್ನು ಪರಾಭವಗೊಳಿಸಿದರು.

ಆಸ್ಟ್ರೇಲಿಯಾ ಓಪನ್ ಟೂರ್ನಿಯಲ್ಲಿ 10ನೇ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಜೊಕೊವಿಚ್‌, ಎಂಟರಘಟ್ಟದಲ್ಲಿ ರಷ್ಯಾದ ಆ್ಯಂಡ್ರೆ ರುಬ್ಲೆವ್ ಅವರನ್ನು ಎದುರಿಸುವರು. ಮತ್ತೊಂದು ಪ್ರೀಕ್ವಾರ್ಟರ್‌ಫೈನಲ್‌ನಲ್ಲಿ ರುಬ್ಲೆವ್‌ 6-3, 3-6, 6-3, 4-6, 7-6 (11/9)ರಿಂದ ಡೆನ್ಮಾರ್ಕ್‌ನ ಹೋಲ್ಗರ್ ರೂನ್ ಅವರನ್ನು ಪರಾಭವಗೊಳಿಸಿದರು.

ಪುರುಷರ ಸಿಂಗಲ್ಸ್ ವಿಭಾಗದ ಇನ್ನುಳಿದ ಪ್ರೀಕ್ವಾರ್ಟರ್‌ ಹಣಾಹಣಿಗಳಲ್ಲಿ ಅಮೆರಿಕದ ಬೆನ್ ಶೆಲ್ಟನ್‌ 6-7 (5/7), 6-2, 6-7 (4/7), 7-6 (7/4), 6-2ರಿಂದ ತಮ್ಮದೇ ದೇಶದ ಜೆಜೆ ವೂಲ್ಫ್ ವಿರುದ್ಧ ಗೆದ್ದರು. ಈ ಮೂಲಕ 20 ವರ್ಷಗಳಲ್ಲಿ ಪದಾರ್ಪಣೆಯಲ್ಲೇ ಟೂರ್ನಿಯ ಕ್ವಾರ್ಟರ್‌ಫೈನಲ್ ಪ್ರವೇಶಿಸಿದ ಮೊದಲ ಆಟಗಾರ ಎನಿಸಿಕೊಂಡರು.

ಅಮೆರಿಕದ ಟಾಮಿ ಪೌಲ್‌ 6-2, 4-6, 6-2, 7-5ರಿಂದ ಸ್ಪೇನ್‌ನ ರಾಬರ್ಟೊ ಬೌಟಿಸ್ಟಾ ಅಗುಟ್ ಅವರಿಗೆ ಆಘಾತ ನೀಡಿದರು.

ಸಬಲೆಂಕಾ ಜಯಭೇರಿ: ಮೊದಲ ಗ್ರ್ಯಾನ್‌ಸ್ಲಾಮ್ ಪ್ರಶಸ್ತಿ ಬೆನ್ನತ್ತಿರುವ ಸಬಲೆಂಕಾ ಅವರು ಪ್ರೀಕ್ವಾರ್ಟರ್‌ಫೈನಲ್‌ನಲ್ಲಿ 7-5, 6-2ರಿಂದ 12ನೇ ಶ್ರೇಯಾಂಕದ, ಸ್ವಿಟ್ಜರ್ಲೆಂಡ್ ಆಟಗಾರ್ತಿ ಬೆಲಿಂದಾ ಬೆನ್ಸಿಚ್‌ ಅವರನ್ನು ಪರಾಭವಗೊಳಿಸಿದರು. ಅವರಿಗೆ ಎಂಟರಘಟ್ಟದಲ್ಲಿ ಡೊನ್ನಾ ವೆಕಿಕ್‌ ಸವಾಲು ಎದುರಾಗಿದೆ. ಕ್ರೊವೇಷ್ಯಾದ 17 ವರ್ಷದ ಡೊನ್ನಾ, 16ರ ಘಟ್ಟದ ಹಣಾಹಣಿಯಲ್ಲಿ 6-2, 1-6, 6-3ರಿಂದ ಜೆಕ್‌ ಗಣರಾಜ್ಯದ ಲಿಂಡಾ ಫ್ರುಹ್‌ವಿರ್ಟೊವಾ ಎದುರು ಗೆದ್ದರು.

ಗಾರ್ಸಿಯಾಗೆ ಆಘಾತ: ಮಹಿಳಾ ಸಿಂಗಲ್ಸ್ ಮತ್ತೊಂದು ಪ್ರೀಕ್ವಾರ್ಟರ್‌ಫೈನಲ್‌ನಲ್ಲಿ 4ನೇ ಶ್ರೇಯಾಂಕದ ಆಟಗಾರ್ತಿ ಫ್ರಾನ್ಸ್‌ನ ಕ್ಯಾರೊಲಿನ್‌ ಗಾರ್ಸಿಯಾ ಆಘಾತ ಅನುಭವಿಸಿದರು. ಪೋಲೆಂಡ್‌ನ ಮ್ಯಾಗ್ಡಾ ಲಿನೆಟ್‌ 7-6 (7/3), 6-4ರಿಂದ ಕ್ಯಾರೊಲಿನ್ ಅವರನ್ನು ಸೋಲಿಸಿದರು. ಮತ್ತೊಂದು ಪಂದ್ಯದಲ್ಲಿ ಜೆಕ್ ಗಣರಾಜ್ಯದ ಕರೋಲಿನಾ ಪ್ಲಿಸ್ಕೊವಾ 6-0, 6-4ರಿಂದ ಚೀನಾದ ಜಾಂಗ್‌ ಶುಯಿ ಮೇಲೆ ಸುಲಭ ಗೆಲುವು ಸಾಧಿಸಿ ಎಂಟರಘಟ್ಟ ತಲುಪಿದರು.