ಟೆನಿಸ್‌: ವೈಭವ್, ದಿಶಾಗೆ ಚಾಂಪಿಯನ್ ಪಟ್ಟ

ಶುಕ್ರವಾರ ನಡೆದ ಫೈನಲ್‌ ಪಂದ್ಯದಲ್ಲಿ ಆರನೇ ಶ್ರೇಯಾಂಕದ ವೈಭವ್‌ ನಾಲ್ಕನೇ ಶ್ರೇಯಾಂಕಿತ ಸುಚಿರ್ ಚೇತನ್ ಶೇಷಾದ್ರಿ ವಿರುದ್ಧ ಗೆಲುವು ಸಾಧಿಸಿದರು. ಬಾಲಕಿಯರ ವಿಭಾಗದಲ್ಲಿ ಮೂರನೇ ಶ್ರೇಯಾಂಕದ ಕಾಜಲ್ ರಮಿಸೆಟ್ಟಿ ಅವರನ್ನು ಮಣಿಸಿದ ದಿಶಾ ಪ್ರಶಸ್ತಿ ಮುಡಿಗೇರಿಸಿಕೊಂಡರು.

ಕಳೆದ ತಿಂಗಳು ನಡೆದ ಕೆಎಸ್‌ಎಲ್‌ಟಿಎ–ಎಐಟಿಎ 14 ವರ್ಷದೊಳಗಿನವರ ವಿಭಾಗದ ಟೂರ್ನಿಯಲ್ಲಿ ರನ್ನರ್ ಅಪ್‌ ಆಗಿದ್ದ ದಿಶಾ ಶುಕ್ರವಾರ ಮೊದಲ ಗೇಮ್‌ನಲ್ಲೇ ಎದುರಾಳಿಯ ಸರ್ವ್ ಮುರಿದು ಭರವಸೆ ಮೂಡಿಸಿದರು. ಆದರೆ ಮುಂದಿನ ಮೂರು ಗೇಮ್‌ಗಳಲ್ಲಿ ನಿರಾಸೆ ಅನುಭವಿಸಿದರು. ಚೇತರಿಸಿಕೊಂಡು ಹಿನ್ನಡೆಯನ್ನು 3–4ಕ್ಕೆ ಇಳಿಸಿದ ಅವರು ನಂತರ ಸತತ ಮೂರು ಗೇಮ್‌ ಗೆದ್ದು ಖುಷಿಪಟ್ಟರು.

ಎರಡನೇ ಸೆಟ್‌ನಲ್ಲೂ ಆರಂಭದಲ್ಲಿ ಹಿನ್ನಡೆ ಅನುಭವಿಸಿದ 13 ವರ್ಷದ ದಿಶಾ ನಂತರ 4–2ರಲ್ಲಿ ಮುನ್ನಡೆದರು. 5–4ರ ಮುನ್ನಡೆಯೊಂದಿಗೆ ಚಾಂಪಿಯನ್‌ಷಿಪ್‌ಗಾಗಿ ಸರ್ವ್ ಮಾಡಿದ ಅವರು ಒಂದು ಹಂತದಲ್ಲಿ 15–40ರ ಹಿನ್ನಡೆಯಲ್ಲಿದ್ದರು. ಆದರೆ ಪಟ್ಟು ಬಿಡದೆ ಕಾದಾಡಿ ಪಂದ್ಯ ಗೆದ್ದು ಸಂಭ್ರಮಿಸಿದರು.

ಬಾಲಕರ ವಿಭಾಗದ ಫೈನಲ್‌ನಲ್ಲಿ ಇಬ್ಬರೂ ಜಿದ್ದಾಜಿದ್ದಿಯ ಹೋರಾಟ ನಡೆಸಿದರು. ಮೊದಲ ಸೆಟ್‌ನ ಏಳನೇ ಗೇಮ್‌ ವರೆಗೂ ರೋಚಕ ಹೋರಾಟ ಕಂಡುಬಂತು. ವೈಭವ್‌ 4–3ರ ಮುನ್ನಡೆ ಸಾಧಿಸಿ ಮುಂದಿನ ಎರಡು ಗೇಮ್‌ಗಳನ್ನು ಸುಲಭವಾಗಿ ಗೆದ್ದು ಶುಭಾರಂಭ ಮಾಡಿದರು. ಎರಡನೇ ಸೆಟ್‌ನಲ್ಲಿ 5–4ರ ಮುನ್ನಡೆ ಸಾಧಿಸಿದ್ದರೂ ನಂತರ ಎದುರಾಳಿ ತಿರುಗೇಟು ನೀಡಿ 7–5ರಲ್ಲಿ ಜಯ ಗಳಿಸಿದರು. ನಿರ್ಣಾಯಕ ಮೂರನೇ ಸೆಟ್‌ನಲ್ಲಿ ಆಕ್ರಮಣಕಾರಿ ಆಟವಾಡಿದ ವೈಭವ್ 4–2ರ ಮುನ್ನಡೆ ಸಾಧಿಸಿ ನಿರೀಕ್ಷೆ ಮೂಡಿಸಿದರು. ಮುಂದಿನ ಎರಡು ಗೇಮ್‌ಗಳನ್ನು ಕೂಡ ಗೆದ್ದು ಪಂದ್ಯ ಹಾಗೂ ಪ್ರಶಸ್ತಿ ತಮ್ಮದಾಗಿಸಿಕೊಂಡರು.

ಫಲಿತಾಂಶ: ಬಾಲಕರ ಫೈನಲ್‌: ವೈಭವ್ ಕೃಷ್ಣಗೆ ಸುಚಿರ್ ಚೇತನ್ ಶೇಷಾದ್ರಿ ವಿರುದ್ಧ 6-3, 5-7, 6-2ರಲ್ಲಿ ಜಯ. ಬಾಲಕಿಯರ ಫೈನಲ್‌: ದಿಶಾ ಸಂತೋಷ್ ಖಂಡೋಜಿಗೆ ಕಾಜಲ್ ರಮಿಸೆಟ್ಟಿ ವಿರುದ್ಧ 6-4, 6-4ರಲ್ಲಿ ಗೆಲುವು.