ಕೋವಿಡ್‌ ಸೋಂಕಿತರ ಸಂಖ್ಯೆಯಲ್ಲಿ ರಷ್ಯಾ ಹಿಂದಿಕ್ಕಿ 2ನೇ ಸ್ಥಾನಕ್ಕೇರಿದ ಬ್ರೆಜಿಲ್‌

ಕೊರೊನಾ ವೈರಸ್‌ ಸೋಂಕು ಪ್ರಕರಣಗಳ ಸಂಖ್ಯೆಯಲ್ಲಿ ಬ್ರೆಜಿಲ್‌ ಶುಕ್ರವಾರ ರಷ್ಯಾವನ್ನು ಹಿಂದಿಕ್ಕಿದ್ದು, ಜಾಗತಿಕವಾಗಿ ಎರಡನೇ ಸ್ಥಾನಕ್ಕೇರಿದೆ. 

ಸದ್ಯ ಅಲ್ಲಿ 3,30,890 ಸೋಂಕಿತರಿದ್ದು 21,048 ಮಂದಿ ಮಹಾಮಾರಿಗೆ ಬಲಿಯಾಗಿದ್ದಾರೆ. ಆದರೆ, ಸಾವಿನ ಅಸಲಿ ಸಂಖ್ಯೆ ಅಧಿಕೃತ ಸಂಖ್ಯೆಗಿಂತಲೂ ಹೆಚ್ಚಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.  ಇನ್ನೊಂದೆಡೆ ರಷ್ಯಾದಲ್ಲಿ 3,26,448 ಸೋಂಕಿತರಿದ್ದು, 3,249 ಮಂದಿ ಮೃತಪಟ್ಟಿದ್ದಾರೆ. 

ಬ್ರೆಜಿಲ್‌ನಲ್ಲಿ ಕಳೆದ 24 ಗಂಟೆಗಳಲ್ಲಿ 1001 ಸಾವು ಸಂಭವಿಸಿದೆ. ಹೀಗಾಗಿ, ವೈರಸ್ ಹರಡುವುದನ್ನು ತಡೆಯಲು ಪರಿಚಯಿಸಲಾದ ನಿರ್ಬಂಧ ಕ್ರಮಗಳನ್ನು ಇನ್ನು ಮುಂದೆ ಸಡಿಲಗೊಳಿಸಬೇಕೋ ಅಥವಾ ಕಠಿಣವಾಗಿ ಜಾರಿಗೊಳಿಸಬೇಕೋ ಎಂಬ ಚರ್ಚೆಗಳು ಬ್ರೆಜಿಲ್‌ನಾದ್ಯಂತ ಚರ್ಚೆಗೆ ಒಳಗಾಗಿದೆ. 

ಸದ್ಯ ಸೋಂಕಿತರ ಸಂಖ್ಯೆಯಲ್ಲಿ ಅಮೆರಿಕ ವಿಶ್ವದಲ್ಲೇ ಮೊದಲ ಸ್ಥಾನದಲ್ಲಿದೆ. ಅಲ್ಲಿ 16,01,434 ಸೋಂಕಿತರಿದ್ದು, 96,007 ಮಂದಿ ಮೃತಪಟ್ಟಿದ್ದಾರೆ.