ನವದೆಹಲಿ: ಅತ್ಯಂತ ವಿಷಕಾರಿ ರಾಸಾಯನಿಕ ಮಿಥೆನಾಲ್ ಬಳಸಿ ನಕಲಿ ಹ್ಯಾಂಡ್ ಸ್ಯಾನಿಟೈಸರ್ ಮಾರಾಟ ಮಾಡುತ್ತಿರುವ ಜಾಲದ ಬಗ್ಗೆ ಎಲ್ಲ ರಾಜ್ಯಗಳಿಗೆ ಹಾಗೂ ಕೇಂದ್ರಾದಳಿತ ಪ್ರದೇಶಗಳಿಗೆ ಕೇಂದ್ರೀಯ ತನಿಖಾ ದಳ(ಸಿಬಿಐ)ಎಚ್ಚರಿಕೆ ರವಾನಿಸಿದೆ.
ಈ ಜಾಲದ ಜೊತೆಗೆ ಪಿಪಿಇ ಕಿಟ್ ಹಾಗೂ ಕೋವಿಡ್–19ಗೆ ಸಂಬಂಧಿಸಿದ ವೈದ್ಯಕೀಯ ಉಪಕರಣಗಳ ಮಾರಾಟಗಾರರ ಸೋಗಿನಲ್ಲಿರುವ ಜಾಲದ ಬಗ್ಗೆಯೂ ಸಿಬಿಐ ಎಚ್ಚರಿಸಿದೆ.
ಈ ತುರ್ತು ಸಂದರ್ಭವನ್ನು ಹಣ ಮಾಡಲು ಈ ಜಾಲವು ಉಪಯೋಗಿಸಿಕೊಳ್ಳುತ್ತಿದ್ದು, ದುಷ್ಕರ್ಮಿಗಳು ಪಿಪಿಇ ಕಿಟ್ ತಯಾರಿಕಾ ಕಂಪನಿಗಳ ಪ್ರತಿನಿಧಿಗಳ ಸೋಗಿನಲ್ಲಿ ಆಸ್ಪತ್ರೆಗಳಿಗೆ ಭೇಟಿ ನೀಡುತ್ತಿದ್ದಾರೆ. ಆನ್ಲೈನ್ ಮೂಲಕ ಹಣ ಪಡೆದು ವಂಚಿಸುತ್ತಿದ್ದಾರೆ ಎಂದು ಸಿಬಿಐ ತಿಳಿಸಿದೆ.