ಭಾರತೀಯ ವೃತ್ತಪತ್ರಿಕೆಗಳಿಗೆ ನಿರ್ಬಂಧ: ಚೀನಾ ಕ್ರಮಕ್ಕೆ ಐಎನ್‍ಎಸ್‍ ಖಂಡನೆ

ಪ್ರತಿಯಾಗಿ ಭಾರತದಲ್ಲಿಯೂ ಚೀನಾದ ಮಾಧ್ಯಮಗಳ ಮೇಲೂ ನಿಷೇಧ ಹೇರಲು ತ್ವರಿತ ಕ್ರಮ ಕೈಗೊಳ್ಳಬೇಕು ಎಂದು ಸಂಸ್ಥೆಯು ಕೇಂದ್ರ ಸರ್ಕಾರವನ್ನು ಆಗ್ರಹಿಸಿದೆ.

ಐಎನ್‍ಎಸ್‍ ಅಧ್ಯಕ್ಷ ಶೈಲೇಶ್‍ ಗುಪ್ತಾ, ಭಾರತದ ಮಾಧ್ಯಮಗಳು ಮತ್ತು ವೆಬ್‌ಸೈಟ್‌ಗಳ ವೀಕ್ಷಣೆಗೆ ಅವಕಾಶ ಸಿಗದಂತೆ ನಿರ್ಬಂಧಿಸುವ ಚೀನಾದ ಕ್ರಮ ಸರಿಯಲ್ಲ. ಅತ್ಯಾಧುನಿಕ ತಂತ್ರಜ್ಞಾನದ ಫೈರ್‌ವಾಲ್‌ಗಳ ಮೂಲಕ, ವಿಪಿಎನ್‍ (ವರ್ಚುಯೆಲ್ ಪ್ರೈವೇಟ್ ನೆಟ್‍ವರ್ಕ್) ಮೂಲಕ ಮಾಹಿತಿ ಪಡೆಯುವುದನ್ನೂ ನಿರ್ಬಂಧಿಸಲಾಗಿದೆ ಎಂದು ದೂರಿದ್ದಾರೆ.

ಭಾರತದಲ್ಲೂ ಚೀನಾ ಮಾಧ್ಯಮಗಳ ವೀಕ್ಷಣೆಗೆ ಇರುವ ಹಾದಿಗಳನ್ನು ನಿರ್ಬಂಧಿಸಲು ಎಲ್ಲ ರೀತಿಯ ಕ್ರಮ ಕೈಗೊಳ್ಳಬೇಕು. ಭಾರತದ ಮಾಧ್ಯಮ ಕಂಪನಿಗಳಲ್ಲಿ ಚೀನಾ ಸಹಯೋಗ/ಪಾಲುದಾರಿಕೆಯನ್ನು ಸ್ಥಗಿತಗೊಳಿಸಲು ಕ್ರಮ ಕೈಗೊಳ್ಳಬೇಕು ಎಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.