Samsung 25ರ ಸಂಭ್ರಮ; ಬೆಂಗಳೂರಿನಲ್ಲಿ ಮಲ್ಟಿ-ಡಿವೈಸ್ ಇಂಟೆಲಿಜೆನ್ಸ್ ಅಭಿವೃದ್ಧಿ

ಬೆಂಗಳೂರು: ಮುಂದಿನ ಐದು ವರ್ಷಗಳಲ್ಲಿ ಬೆಂಗಳೂರಿನ ಸಂಶೋಧನಾ ಹಾಗೂ ಅಭಿವೃದ್ಧಿ ಕೇಂದ್ರದಲ್ಲಿ (ಎಸ್‌ಆರ್‌ಐ-ಬಿ) 5ಜಿ ಹೊರತಾಗಿ ಬಹುಸಾಧನಗಳ ಬುದ್ಧಿಮತ್ತೆ ತಂತ್ರಜ್ಞಾನ (ಮಲ್ಟಿ-ಡಿವೈಸ್ ಇಂಟೆಲಿಜೆನ್ಸ್), ಬ್ಲಾಕ್‌ಚೈನ್ ಹಾಗೂ ಡೇಟಾ ಸೈನ್ಸ್ ಅಭಿವೃದ್ಧಿಪಡಿಸುವುದಾಗಿ ಸ್ಯಾಮ್ಸ್‌ಸಂಗ್ ಎಲೆಕ್ಟ್ರಾನಿಕ್ಸ್ ಬುಧವಾರ ಘೋಷಿಸಿದೆ.

ದಕ್ಷಿಣ ಕೊರಿಯಾ ಹೊರತಾಗಿ ಬೆಂಗಳೂರಿನಲ್ಲಿ ಅತಿ ದೊಡ್ಡ ಆರ್ & ಡಿ ಘಟಕವನ್ನು ಹೊಂದಿರುವ ಸ್ಯಾಮ್‌ಸಂಗ್, ಭಾರತಕ್ಕೆ ಕಾಲಿಟ್ಟು 25ನೇ ಯಶಸ್ವಿ ವರ್ಷಗಳ ಸಂಭ್ರಮವನ್ನು ಆಚರಿಸಿಕೊಳ್ಳುತ್ತಿದೆ. 

ಈ ಕುರಿತು ಬುಧವಾರ ಪ್ರಕಟಣೆ ಹೊರಡಿಸಿರುವ ಸ್ಯಾಮ್‌ಸಂಗ್, ಕಳೆದ ಹಲವಾರು ವರ್ಷಗಳಲ್ಲಿ ಬೆಂಗಳೂರಿನ ಆರ್ & ಡಿ ಘಟಕವು ಸಂಸ್ಥೆಯ ಸುಧಾರಿತ ಕೇಂದ್ರವಾಗಿ ಬೆಳೆದಿದೆ. ವೈರ್‌ಲೆಸ್ ಕಮ್ಯೂನಿಕೇಷನ್, ಮಲ್ಟಿಮೀಡಿಯಾ, ಇಮೇಜ್ ಪ್ರೊಸೆಸ್ಸಿಂಗ್, ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ (ಕೃತಕ ಬುದ್ಧಿಮತ್ತೆ) ಇನ್ ವಿಷನ್, ವಾಯ್ಸ್, ಟೆಕ್ಸ್ಟ್ ತಂತ್ರಜ್ಞಾನ, ಇಂಟರ್‌ನೆಟ್ ಆಫ್ ಥಿಂಗ್ಸ್ (ಐಒಟಿ) ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದೆ ಎಂದು ತಿಳಿಸಿದೆ.

ಇದನ್ನೂ ಓದಿ: Galaxy M02: ಸ್ಯಾಮ್‌ಸಂಗ್ ಹೊಸ ಗ್ಯಾಲಕ್ಸಿ ಸ್ಮಾರ್ಟ್‌ಫೋನ್ ಬಿಡುಗಡೆ

ಮುಂದಿನ ಐದು ವರ್ಷಗಳಲ್ಲಿ ಸ್ಯಾಮ್‌ಸಂಗ್ ಬೆಂಗಳೂರಿನ ಆರ್ & ಡಿ ಕೇಂದ್ರದಲ್ಲಿ ಮಲ್ಟಿ-ಡಿವೈಸ್ ಇಂಟೆಲಿಜೆನ್ಸ್, ಬ್ಲಾಕ್‌ಚೈನ್ ಹಾಗೂ ಡೇಟಾ ಸೈನ್ಸ್ ಅಭಿವೃದ್ಧಿಸಲಿದ್ದು, ನಾವೀನ್ಯ ಕ್ಯಾಮೆರಾ ತಂತ್ರಜ್ಞಾನ, ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಮತ್ತು 5ಜಿ ತಂತ್ರಗಾರಿಕೆಯಲ್ಲಿ ಗರಿಷ್ಠ ತಂತ್ರಜ್ಞಾನವನ್ನು ಒದಗಿಸಲಿದೆ ಎಂದು ತಿಳಿಸಿದೆ.

1996ನೇ ಇಸವಿಯಲ್ಲಿ ಬೆಂಗಳೂರಿನಲ್ಲಿ ಸ್ಥಾಪನೆಯಾದ ಸ್ಯಾಮ್‌ಸಂಗ್ ಆರ್ & ಡಿ ಘಟಕವು, 5ಜಿ, ಎಐ, ಕ್ಲೌಡ್ ಸರ್ವೀಸ್ ಜೊತೆಗೆ ಭಾರತಕ್ಕಾಗಿ ಸೀಮಿತ ಗ್ಯಾಲಕ್ಸಿ ಸ್ಮಾರ್ಟ್‌ಫೋನ್‌ಗಳ ಅವಿಷ್ಕಾರವನ್ನು ಮುಂದುವರಿಸುವುದಾಗಿ ತಿಳಿಸಿದೆ. ಇದಕ್ಕಾಗಿ ಸ್ಯಾಮ್‌ಸಂಗ್ ಎಂಜಿನಿಯರ್‌ಗಳು ಇದುವರೆಗೆ 3,200ಕ್ಕೂ ಹೆಚ್ಚು ಪೇಟೆಂಟ್‌ಗಳನ್ನು ಸಲ್ಲಿಸಿದ್ದಾರೆ.