International Womens Day | ಕಲೆಗೆ ಲಿಂಗ ಭಾಷೆಯ ಹಂಗಿಲ್ಲ...

**

ಕಾಲ ಬದಲಾಗಿದೆ. ಕಲೆ ವಿಷಯಕ್ಕೆ ಬಂದರೆ ಇಲ್ಲಿ ಲಿಂಗ ತಾರತಮ್ಯ ಇಲ್ಲ. ಹೆಣ್ಣುಮಕ್ಕಳು ವೇದಿಕೆ ಹತ್ತುವುದೇ ನಿಷಿದ್ಧ ಎಂಬ ಕಾಲವೊಂದಿತ್ತು. ಈಗ ಯಾವ ಕ್ಷೇತ್ರದಲ್ಲಿ ಮಹಿಳೆ ಇಲ್ಲ ಹೇಳಿ? ಮಹಿಳೆಗೆ ದೈಹಿಕ ತಾಕತ್ತು ಪುರುಷರಿಗಿಂತ ಕಡಿಮೆ ಇರಬಹುದು. ಆದರೆ ಪ್ರತಿಭೆ, ಅರ್ಹತೆ, ಸಾಧನೆ ಸಿದ್ಧಿ.. ಯಾವುದರಲ್ಲಿ ಕಮ್ಮಿ ಹೇಳಿ?

ವೃತ್ತಿ, ಪ್ರವೃತ್ತಿ ಏನೇ ಇರಲಿ, ಈಗ ಎಲ್ಲರಿಗೂ ಅವಕಾಶ ಇದೆ. ಇದನ್ನು ನನ್ನ ವೃತ್ತಿಯಲ್ಲಿ ಹಲವು ಸಂದರ್ಭಗಳಲ್ಲಿ ಗುರುತಿಸಿದ್ದೇನೆ. ಸಂಗೀತ ಕಛೇರಿ ಸಂಬಂಧ ನಾನು ಎಷ್ಟೋ ಸಲ ಒಬ್ಬಳೇ ಹೋಗಬೇಕಾಗುತ್ತೆ. ಶೇ 90ರಷ್ಟು ಪ್ರವಾಸಗಳಲ್ಲಿ ನಾನು ಯಾರ ಜೊತೆಗೆ ಹೋಗ್ತೀನಿ ಅನ್ನೋದೇ ಗೊತ್ತಿರಲ್ಲ. ಅಲ್ಲಿ ಹೋಗಿ ಭೇಟಿಯಾಗುವ ಸಂಘಟಕರ ಪರಿಚಯ ಇರಲ್ಲ. ಸಮಯದ ಪರಿವೇ ಇಲ್ಲದೆ ನಮ್ಮ ವೃತ್ತಿಯಲ್ಲಿ ತೊಡಗಿಸಿಕೊಳ್ಳಬೇಕಾಗುತ್ತದೆ. ವಿದೇಶಗಳಿಗೆ ಹೋದಾಗಲೂ ಅಷ್ಟೆ. ಹೊಸ ಜಾಗ, ಹೊಸ ಜನ, ಹೊಸ ಅನುಭವ ಆಗುತ್ತೆ. ಎಲ್ಲೂ ನನಗೆ ಲಿಂಗ ತಾರತಮ್ಯದ ಅರಿವೇ ಆಗಿಲ್ಲ. ಸಂಗೀತಕ್ಕೆ ಲಿಂಗ, ಭಾಷೆ, ಕಾಲ, ದೇಶದ ಹಂಗಿಲ್ಲ. ಸಂಗೀತಕ್ಕಿರುವುದು ಒಂದೇ ಭಾಷೆ. ಅದು ಹೃದಯದ ಭಾಷೆ. ಜನರ ನಡುವೆ ಸೌಹಾರ್ದ ಸಂಬಂಧ ಏರ್ಪಡಿಸುವ ವಿಶ್ವ ಭಾಷೆ.

ನಮ್ಮ ಕನಸುಗಳನ್ನು ನನಸು ಮಾಡಿಕೊಳ್ಳಬೇಕಾದರೆ ನಾವು ಸಾಹಸ, ಸಾಧನೆ ಮಾಡಲೇಬೇಕಾಗುತ್ತದೆ. ಇಷ್ಟೆಲ್ಲ ಇದ್ದರೂ ಒಬ್ಬ ಹೆಣ್ಣಾಗಿ, ನಾವು ಮಧ್ಯರಾತ್ರಿ ಒಬ್ಬರೇ ಕ್ಯಾಬ್‌ ಮಾಡಿಕೊಂಡು ಹೋಗುವಾಗ ಎಚ್ಚರಿಕೆ ವಹಿಸಬೇಕಾಗುತ್ತದೆ. ನಮ್ಮ ಬಯಲಾಜಿಕಲ್‌ ಸಿಸ್ಟಮ್‌ ಹಾಗೇ ಇದೆ. ನನಗೆ ಒಳ್ಳೆಯ ಅವಕಾಶ ಸಿಕ್ಕಿದೆ ಎಂದಾದರೆ ನಾನು ಹುಷಾರಿಲ್ಲ, ಪೀರಿಯಡ್ಸ್‌ ಆಗಿದೆ.. ಈ ಎಲ್ಲ ಮಹಿಳಾ ಸಂವೇದನೆಯ ವಿಚಾರವನ್ನು ಲೆಕ್ಕಕ್ಕೇ ಇಟ್ಟುಕೊಳ್ಳಲ್ಲ. ಗುರಿ ಸಾಧನೆಯತ್ತ ಮುನ್ನುಗ್ಗುತ್ತಲೇ ಇರುತ್ತೇನೆ. ಸಂಗೀತ ಎಂದರೆ ದೇವರ ಸಮಾನ ಎಂಬುದು ನನ್ನ ಭಾವನೆ.

ಸಂಗೀತ ಕಛೇರಿಗಳಿಗೆ ಅವಕಾಶ ಸಿಗೋ ವಿಚಾರ ಬಂದರೆ ಸಂಘಟಕರು ನಮ್ಮ ಪ್ರತಿಭೆ ಆಧರಿಸಿ ಅವಕಾಶ ಕೊಡಬೇಕು. I am a strong advocate for equality. ಇಲ್ಲಿ ಪುರುಷ–ಮಹಿಳೆ ಎಂಬ ಭೇದ ಸಲ್ಲದು. ನನ್ನ ತಂದೆ–ತಾಯಿ ಇಬ್ಬರೂ ಕಲಾವಿದರಾಗಿರುವುದರಿಂದ ಮನೆಯಲ್ಲೂ ನನಗೆ ಯಾವುದೇ ನಿರ್ಬಂಧ ಇಲ್ಲ. ಕಲೆಯ ವಿಚಾರದಲ್ಲಿ ಮಹಿಳೆ–ಪುರುಷ ಎಂಬ ಭೇದಭಾವ ಸಲ್ಲದು.

–ನಿರೂಪಣೆ: ಉಮಾ ಅನಂತ್