ಬ್ರೆಸಿಲಿಯಾ: ಭಾರತ್ ಬಯೋಟೆಕ್‌ನಿಂದ 2 ಕೋಟಿ ಕೋವಿಡ್–19 ಲಸಿಕೆ ಖರೀದಿಗೆ ಬ್ರೆಜಿಲ್‌ನ ಆರೋಗ್ಯ ಸಚಿವಾಲಯ ಒಪ್ಪಂದ ಮಾಡಿಕೊಂಡಿದೆ. ಮಾರ್ಚ್ – ಮೇ ಅವಧಿಯಲ್ಲಿ ಲಸಿಕೆ ಪೂರೈಕೆಯಾಗಲಿದೆ.
ಮೊದಲ ಹಂತದಲ್ಲಿ ಮಾರ್ಚ್‌ನಲ್ಲಿ 80 ಲಕ್ಷ ಡೋಸ್‌ ಲಸಿಕೆ ದೇಶಕ್ಕೆ ಪೂರೈಕೆಯಾಗಲಿದೆ ಎಂದು ಬ್ರೆಜಿಲ್ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಲಸಿಕೆಗಳ ಖರೀದಿ ವೇಗ ಹೆಚ್ಚಿಸಲು ಮತ್ತು ಕೋವಿಡ್ ಎರಡನೇ ಅಲೆಯನ್ನು ನಿರ್ವಹಿಸುವ ಸಲುವಾಗಿ ಬಿಡ್ಡಿಂಗ್‌ ಪ್ರಕ್ರಿಯೆಗೆ ಸಂಬಂಧಿಸಿ ಹೊಸ ನಿಯಮಗಳನ್ನು ಕಳೆದ ವಾರ ಪ್ರಕಟಿಸಲಾಗಿತ್ತು ಎಂದು ಸಚಿವಾಲಯ ಹೇಳಿದೆ.
ಬ್ರೆಜಿಲ್‌ನಲ್ಲಿ ಕೋವಿಡ್‌ನಿಂದಾಗಿ ಗುರುವಾರ 1,541 ಮಂದಿ ಮೃತಪಟ್ಟಿದ್ದಾರೆ. ಸಾಂಕ್ರಾಮಿಕ ಆರಂಭವಾದ ಬಳಿಕ ಅಲ್ಲಿ ದಿನವೊಂದರಲ್ಲಿ ಸಂಭವಿಸಿದ ಎರಡನೇ ಅತಿಹೆಚ್ಚು ಸಾವು ಇದಾಗಿದೆ. ಬ್ರೆಜಿಲ್‌ನಲ್ಲಿ ಸೋಂಕಿನಿಂದಾಗಿ ಈವರೆಗೆ 2,51,498 ಮಂದಿ ಮೃತಪಟ್ಟಿದ್ದಾರೆ.
