ಶುಕ್ರವಾರ, ಜನವರಿ 27, 2023
19 °C

ಚೀನಾದಲ್ಲಿ ಪೊಲೀಸ್‌ ಸರ್ಪಗಾವಲು: ಪ್ರತಿಭಟನೆಗೆ ಅಂಕುಶ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಹಾಂಗ್‌ಕಾಂಗ್‌/ವಾಷಿಂಗ್ಟನ್‌: ಚೀನಾದಲ್ಲಿ ಸರ್ಕಾರ ಹೇರಿರುವ ಕೋವಿಡ್‌ ಕಠಿಣ ಲಾಕ್‌ಡೌನ್‌ ವಿರುದ್ಧದ ಜನಾಕ್ರೋಶ ಹತ್ತಿಕ್ಕಲು ಪ್ರತಿ ರಸ್ತೆ, ಬೀದಿಗಳಲ್ಲಿ ಪೊಲೀಸ್‌ ಪಡೆಗಳ ಸರ್ಪಗಾವಲು ‌ನಿಯೋಜಿಸಿರುವುದರಿಂದ ಮಂಗಳವಾರ ದೇಶದಲ್ಲಿ ಹೊಸದಾಗಿ ಎಲ್ಲಿಯೂ ಪ್ರತಿಭಟನೆ ಕಂಡುಬರಲಿಲ್ಲ.

ಬೀಜಿಂಗ್‌, ಶಾಂಘೈ, ನಾನ್‌ಜಿಂಗ್‌ ನಗರಗಳು ಸಹ ಶಾಂತವಾಗಿದ್ದವು. ಬೀಜಿಂಗ್‌ ನಗರದಲ್ಲಿ ಕೋವಿಡ್‌ ಸೋಂಕು ಕಂಡುಬರುವ ಅಪಾರ್ಟ್‌ಮೆಂಟ್‌ಗಳಿಗೆ ಬೀಗಮುದ್ರೆ ಹಾಕುವುದಿಲ್ಲವೆಂದು ನಗರದ ಆಡಳಿತ ಪ್ರಕಟಿಸಿದೆ. ಕೋವಿಡ್‌ ಸೋಂಕು ಶೂನ್ಯಕ್ಕಿಳಿಸುವ ಸರ್ಕಾರದ ಕಠಿಣ ಲಾಕ್‌ಡೌನ್‌ ವಿರೋಧಿಸಿ ಜನಾಕ್ರೋಶ ಕಳೆದ ವಾರ ಭುಗಿಲೆದ್ದಿತ್ತು. ಹಾಂಗ್‌ಕಾಂಗ್‌ನ ಚೀನಿ ವಿಶ್ವವಿದ್ಯಾಲಯದ ಸುಮಾರು 50ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಸೋಮವಾರ ಮೇಳದ ಬತ್ತಿ ಬೆಳಗಿ, ಪ್ರತಿಭಟನೆ ಬೆಂಬಲಿಸಿದರು. 

‌ಚೀನಾದಲ್ಲಿನ ಬೆಳವಣಿಗೆಯನ್ನು ಅಮೆರಿಕ ಸೂಕ್ಷ್ಮವಾಗಿ ಗಮನಿಸುತ್ತಿದೆ. ನಾಗರಿಕರ ಶಾಂತಿಯುತ ಪ್ರತಿಭಟನೆ ಹಕ್ಕನ್ನು ಬೆಂಬಲಿಸಲಾಗುವುದು ಎಂದು ಶ್ವೇತಭವನ ಮಂಗಳವಾರ ಹೇಳಿದೆ. ಬಿಬಿಸಿ ವರದಿಗಾರರೊಬ್ಬರನ್ನು ಶಾಂಘೈ ಪೊಲೀಸರು ಥಳಿಸಿ, ಕೈಕೋಳ ಹಾಕಿ ಬಂಧಿಸಿದ ಸಂಬಂಧ ಚೀನಾದ ರಾಯಭಾರಿಗೆ ಬ್ರಿಟನ್‌ ಸಮನ್ಸ್‌ ಜಾರಿ ಮಾಡಿ, ವಿವರಣೆ ಪಡೆದಿದೆ. 

‘ವಿದೇಶಿ ಪತ್ರಕರ್ತರು ದೇಶದ ಕಾನೂನುಗಳು ಮತ್ತು ನಿಬಂಧನೆಗಳನ್ನು ಪ್ರಜ್ಞಾಪೂರ್ವಕವಾಗಿ ಅನುಸರಿಸಬೇಕು’ ಎಂದು ಚೀನಾ ಪ್ರತಿಪಾದಿಸಿದೆ. 

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು